ویرج گیس ایجنسی کے کچھ ملازمین سے ۱۷۷؍ روپئے کا مطالبہ کررہے ہیں کہ مرکزی سرکار نے ہر ایک صارف کو ۵؍سال کا بیما دینے کا فیصلہ کیا
شہر دھولیہ میں مسلم علاقوں میں غیر تعلیم یافتہ عوام کو متعدد طریقوں سے بیوقوف بنانے کا کام کیاجاتا ہے۔ کسی بھی اسکیم کے نام پر ٹھگ لیا جاتا ہے۔ شہر کے حاجی نگر اور آزاد نگر میں غریب بیواؤں سے ۸۰۰۰؍ روپئے جمع کئے جارہے تھے انہیں بتایا جارہاتھا کہ حکومت آپ کو ایک لاکھ روپئے تک کا لون دیں گی جو کہ غریبوں کے لیے مختص ہیں اس کے عوض میں آپ کو کوئی رقم حکومت کو واپس نہیں کرنا پڑے گی۔شروع میں ۸۰۰۰؍روپئے ادا کرنے ہوں گے، غیر تعلیم یافتہ بیواؤں نے ۸۰۰۰؍روپئے کا بندوبست کرکے رقم انہیں دے دی ۔ روپئے دینے سے قبل تحقیقات نہیں کی گئی تھی کہ کس سرکاری کاغذات کی بنیاد پر بات کی جارہی ہے۔ ایک خاتون نے صرف ایک سوال کرلیا تھاکہ ہمارے ساتھ دھوکا تو نہیں ہوگا؟ بدعنوان شخص نے کہا کہ مجھ پر بھروسہ نہیں ؟ میں دوسرے شہر سےآیا ہوں؟ تمہارے روپئے لے کر فرار ہوجاؤں گا؟ایک سوال کے بدلے کئی سوالات کرڈالے جسے دیکھ کر دوسری خواتین کا مزید سوال پوچھنے کا ارادہ ترک ہوگیا تھا۔ روپئے جمع کرنے کے بعد سال پر سال گزررہے ہیں لیکن انہیں نہ ہی لون دیا جارہا ہے اور نہ ہی ان کے روپئے لوٹائے جارہے ہیں۔ روپئے لینے والے نے کئی خواتین کو کہہ دیا کہ تم نے مجھے کچھ نہیں دیا ۔روپئے دینے والی بھی مسلم سماج کی غریب خواتین اور روپئے لینے والا بھی مسلم سماج کا بدعنوان سیٹھ ہیں۔چونکہ اس معاملہ میں تحریری شکل میں کاغذات موجود نہیں ہے،اور غریب خواتین پولس میں شکایت درج کرانے میں ہچکچاہٹ محسوس کررہی ہے ،اسی بناء پر معاملہ التو میں پڑا ہوا ہے۔ روزنامہ ممبئی رابطہ کے اسٹاف رپورٹر سے رابطہ کرکے جلیل احمد نے بتایا کہ آج میرے گھر ایچ پی گیس کے کچھ ملازمین یونیفارم پہن کر گلے میں شناختی کارڈ لٹکا کر گھر آئے اور کہا کہ ہم ایچ پی گیس کمپنی کی طرف سے آئے ہیں جوشخص بات کررہا تھا وہ اپنی شناخت وسیم شیخ کے نام سے بتاکر بات کررہا تھا کہ مرکزی حکومت کی طرف سے بیما پالیسی شروع ہیں پانچ سال میں ایک مرتبہ ۱۷۷؍ روپئے آپ کو ایچ پی گیس کو دینا ہوگا۔ اس کے بدلے میں گیس سلنڈر سے ہونے والے نقصانات کا تحفظ ایچ پی کمپنی کے ذمہ ہوگا۔ صارف جلیل احمد نے کہا کہ میں نے ان سے سوالات کئے تو گڑبڑا گئے ۔ میں نےان سے پوچھا کہ ہم جو قیمت کمپنی کو دیتےہیں ان میں ہی تمام چیز یں شامل ہوتی ہیں پھر ۱۷۷؍ روپئے زائد کیوں ادا کروں؟ انہوں نے کہا کہ ۱۷۷؍ روپئے کو ۵؍ سے تقسیم کریں گے تو آپ کو سالانہ کچھ رقم نہ کے برابر ادا کرنی پڑ رہی ہے۔ صارف نےایچ پی کمپنی کے ملازمین سے کہا کہ میں فضول کیوں ۱۷۷؍ روپئے ادا کروں ؟ آپ حکومت کا حوالہ پیش کررہے ہیں تو آپ کے پاس حکومت کو کونسا نوٹیفیکشن ہے مجھے بتاؤ۔ کوئی جی آر آیا ہے؟ ان سوالوں کے بعد انہوں نے کہا کہ ہمیں صرف روپئے اکٹھا کرنے کا حکم دیا گیا ہے ،آپ گیس ایجنسی میں جاکر معلومات حاصل کرلو۔ جلیل احمد نے ان کا جواب سن کر کہا کہ میرے موبائل میں ویرج گیس ایجنسی کا نمبر موجود ہیں میں ان سے بات چیت کرتا ہوں ۔ جب ویرج گیس ایجنسی پر فون پر رابطہ ہوا اور بات چیت کے دوران گیس ایجنسی والوں نے کہا کہ ہمارے پاس ایسی کوئی جانکاری نہیں ہے۔ ہم نے کسی کو ۱۷۷؍ روپئے وصول کرنے کا حکم دیا ہی نہیں فون پر بات چیت ہونے کے بعد وہ ملازمین وہاں سے رفوچکر ہوگئے۔ گیس سلنڈر کے نام پر بدعنوانی بہت پہلے سی ہی کی جارہی ہے۔ جلیل احمد نے مزید کہا کہ میں پڑھا لکھا شخص ہوں اس لیے تصدیق کرلی ، شہر میں ایسے کتنے غیر تعلیم یافتہ لوگ ہیں جو ان کی باتوں میں پھنس کر اپنی محنت کی کمائی کا حصہ انہیں دے کر بدعنوانی کے فروغ میں تعاون کا شکار ہورہے ہیںاور انہیں خبر تک نہیں ہورہی ہے کہ انہیں ٹھگا جارہا ہے۔ اس ضمن میں اخبارات کا اور میڈیا کا سہارا لے کر بدعنوانی کا پردہ فاش کرنا بےحد ضروری ہے۔