ممبئی 3 نومبر
مالیگاؤں 2008 بم دھماکہ معاملہ کے کلیدی ملزم کرنل شریکانت پروہت نے ممبئی ہائی کورٹ میں بم دھماکہ متاثرین کی جانب سے داخل کردہ مداخلت کار کی درخواست کو مستر د کیئے جانے کی عدالت سے گذارش کی۔ کرنل پروہیت کے وکیل سابق اٹارنی جنرل آف انڈیا موکل روہتگی نے ممبئی ہائی کورٹ کی دو رکنی بینچ کے جسٹس ایس ایس شندے اور جسٹس کارنک کو بتایا کہ اس معاملے میں بم دھماکہ متاثرین کو بولنے کا موقع نہیں دیا جانا چاہئے کیونکہ ملزم کرنل پروہت آرمی آفیسر ہے اور اس کی جانب سے داخل کردہ عرضداشت کا تعلق صرف اس کی غیر قانونی گرفتاری سے ہے۔
اسی درمیان جمعیۃ علماء مہاراشٹر (ارشد مدنی) قانونی امداد کمیٹی کی جانب سے بم دھماکہ متاثرین کے لیئے پیش ہوئے سابق وزیر قانون اور سابق ایڈیشنل سالیسٹرجنرل آف انڈیا بی اے دیسائی نے عدالت کو بتایا کہ اس معاملے میں بم دھماکہ متاثرین کو عدالت کے روبرو بحث کرنے کی اجازت دی جائے کیونکہ مالیگاؤں 2008 بم دھماکہ معاملہ میں قومی تفتیشی ایجنسی NIAایماندارانہ طور پر اپنی ذمہ دارایاں نبھانے سے قاصر ہے۔
ایڈوکیٹ بی اے دیسائی نے عدالت کو بتایا کہ ماضی میں ٹرائل کورٹ سے لیکر سپریم کورٹ تک نے بم دھماکہ متاثرین کو بحث کرنے کی اجازت دی ہے۔
کرنل پروہت کے وکیل نے عدالت کو بتایا کہ بم دھماکہ متاثرین عدالت کا وقت بربادکرنا چاہتے ہیں لہذا انہیں اجازت نہیں دی جانی چاہئے جس پر ایڈوکیٹ بی اے دیسائی نے موکل روہتگی کو کہا کہ وہ عدالت میں ایسا کوئی بھی مشاہدہ پیش کریں جس میں یہ تحریر ہو کہ بم دھماکہ متاثرین نے عدالت کا وقت برباد کیا ہو اس کے برعکس بم دھماکہ متاثرین نے ہمیشہ عدالت کی مدد کی ہے۔
فریقین کے دلائل کی سماعت کے بعد دو رکنی بینچ نے حکم دیا کہ ملزم کرنل پروہیت کے وکیل 25 نومبر کو بم دھماکہ متاثرین کی جانب سے داخل کردہ مداخلت کار کی درخواست پر بحث کریں۔
جمعیۃ علماء قانونی امداد کمیٹی کے سربراہ گلزار اعظمی نے ہائی کورٹ میں زیر سماعت اس مقدمہ کے تعلق سے کہا کہ ملزم کرنل پروہیت نے اسے مقدمہ سے ڈسچارج کرنے کی عرضداشت داخل کی ہے جس میں اس نے عدالت کو بتایا کہ اسے گرفتار کرنے سے قبل کریمنل پروسیجر کوڈ کی دفعہ (2) 197کے تحت ضروری خصوصی اجازت نامہ یعنی کے سینکشن آرڈر حاصل نہیں کیا گیا تھا لہذا اس کے خلا ف قائم مقدمہ غیر قانونی ہے جسے ختم کیاجائے۔
گلزار اعظمی نے مزید بتایا کہ اس سے قبل بھی ملزم کرنل پروہیت نے ممبئی ہائی کورٹ میں دو پٹیشن داخل کرکے یو اے پی اے قانون کے اطلاق کے لیئے ضروری اجازت نامہ میں خامی ہونے کا دعوی کرتے ہوئے اس کے اور دیگر ملزمین کے خلاف قائم مقدمہ کو ختم کرنے کی گذارش کی تھی، یو اے پی اے قانون کو چیلنج کرنے والی پٹیشن زیر سماعت ہونے کے باوجود لاک ڈاؤن کا فائدہ اٹھاتے ہوئے کرنل پروہیت نے نہایت خاموشی سے تازہ پٹیشن ممبئی ہائی کورٹ میں داخل کرکے عدالت سے اسے مقدمہ سے ڈسچارج کرنے کی گذارش کی جس پر ہائی کورٹ نے استغاثہ (قومی تفتیشی ایجنسی NIA) کو نوٹس جاری کرتے ہوئے ان سے جواب طلب کیا ہے۔
گلزار اعظمی نے کہا کہ ملزم کرنل پروہیت کی جانب سے داخل پٹیشن کا علم ہونے پر ایڈوکیٹ شاہد ندیم نے ہائی کورٹ میں مداخلت کار کی درخواست داخل کی تھی جس پر آج سماعت عمل میں آئی جس کے دوران سینئر ایڈوکیٹ بی اے دیسائی کے ہمراہ ایڈوکیٹ شاہد ندیم، ایڈوکیٹ کریتیکا اگروال و دیگر پیش ہوئے۔
خیال رہے کہ کسی بھی پبلک سرونٹ کو گرفتار کرنے سے قبل کریمنل پروسیجر کوڈ کی دفعہ(2) 197 کے تحت اعلی افسر سے اجازت لینا ضروری ہوتا ہے لیکن کرنل پروہت کا دعوی ہیکہ اسے گرفتار کرنے سے قبل انسداد دہشت گرد دستہ (ATS) نے اعلی افسر سے خصوصی اجازت حاصل نہیں کی تھی جس کی وجہ سے اس کے خلاف قائم مقدمہ ہی غیر قانونی ہے لہذا س پر قائم مقدمہ ختم کیا جائے۔ اس مقدمہ میں ٹرائل کورٹ میں ابتک 140 گواہوں کی گواہی عمل میں آچکی ہے لیکن کرونا وباء کی وجہ سے عدالتی کارروائی فی الحال التواء کا شکا ر ہے۔