(خیال اثر)
آج 3 دسمبر عالمی یوم معذور کے طور ساری دنیا میں دھوم سے منایا جاتا ہے. ارباب حکومت اور دیگر اکابرین معذوروں سے اظہار ہمدردی کرتے ہوئے ان کے تحفظ و بقاء اور فلاح و بہبود کا دم بھرتے ہیں لیکن اس کے برعکس ان کے تمام اعلانات ہمیشہ ہی دور کے ڈھول سہانے ثابت ہوتے رہے ہیں یہ دیکھ کر آج ہر معذور یہ کہنے پر مجبور ہو گیا ہے کہ ان سے صرف ہمدردی کا اظہار کیا جاتا ہے. ان کے لئے کوئی بھی مخلصانہ کوشش نہیں کرتا. ایسے تمام معذورین کا کہنا ہے کہ جسم معذور ہو سکتے ہیں لیکن صلاحتیں معذور نہیں کے مصداق انھوں نے اپنی تمام تر صلاحتوں کو بروئے کار لاتے ہوئے اپنے حقوق حاصل کرنے کے لئے خود کو مجتمع کرکے ایک نئی جنگ چھیڑنے کا اعلان کردیا ہے. ساتھ ہی ان کا یہ بھی کہنا ہے کہ ابھی یہ تو آغاز ہے ہم انجام تلک اپنی ہر کوشش کرتے ہوئے اپنا حق حاصل کرکے رہیں گے. مالیگاؤں شہر کے معذور افراد نے اپنی بقاء کے لئے دیویانگ نامی تنظیم کی بنیاد گزاری کی ہے. آج جبکہ ساری دنیا میں معذروں کے نام سے معذور دن مناتے ہوئے ہمدردی کا اظہار کیا جا رہا ہے لیکن مالیگاؤں کے معذور دھرنے پر بیٹھے ہیں-
المیہ یہ ہے کہ معذوروں کے لئے خوش آئند اعلانات بھی کئے جاتے ہیں. ارباب حکومت اور میونسپل ذمہ داران کے ذریعے معذورین کی فلاح و بہبود کے لئے خطیر فنڈ مختص کیا جاتا رہا ہے. مالیگاؤں شہر کے معذورین کو جب ان تمام باتوں کا علم ہوا تو انھوں نے اپنے حق کے لئے آواز بلند کی. آج مالیگاؤں شہر کے تمام معذور افراد ایک پلیٹ فارم پر آ کر اپنے حقوق کی پاسداری کے لئے آواز بلند کرنے پر مجبور ہو گئے ہیں. مالیگاؤں کے ان معذورین میں میونسپل انتظامیہ سے مانگ کی ہے کہ انھیں ان کی آفس کے لئے جگہ مہیا کی جائے. ان کے لئے ضروری دستاویزات فراہم کرنے کا خصوص نظم کیا جائے. ان کے لئے مختص شدہ فنڈ اور وظیفہ جات کی ترسیل کا معقول انتظام کیا جائے نیز یہ بھی بتایا جائے کہ اول دن سے تا حال معذورین کے لئے مختص شدہ فنڈ کن کن کی تجوریوں میں جاتا رہا ہے. شہری میونسپل انتظامیہ بھی ان کی ہر تحریک اور آواز کو سننے کے بعد وعدوں پر ٹالنے کا کام کررہی ہے. گزشتہ دنوں مالیگاؤں کے ان معذورین نے ایک مٹینگ کا انعقاد کرتے ہوئے ارباب حکومت اور میونسپل انتظامیہ کو انتباہ دیا ہے کہ اگر ان کے حقوق کی ایمانداری سے ترسیل نہیں کی گئی تو وہ تمام گفت و شنید کو بالائے طاق رکھتے ہوئے طوفان بلا خیز بن جائیں گے کیونکہ اب معذورین کے پاس یہی ایک راستہ باقی رہا ہے جس کے ذریعے وہ اپنے حقوق کو حاصل کر سکتے ہیں. میٹنگ میں صدر دیویانگ سوسائٹی مدثر رضا نے بر ملا اظہار کرتے ہوئے کہا کہ ہم میں سے ہر فرد معذور ہے. ان کے پاس محنت و مشقت کرنے کا کوئی ذریعہ نہیں ہے. یہ دیکھنے کے باوجود ارباب حکومت اور میونسپل انتظامیہ ہمیں ہمارا حق دینے کی بجائے مسلسل بے رحمی کا مظاہرہ کررہی ہے. مالیگاؤں شہر کے ان معذورین نے ماضی میں بھی کئی بار اپنے حقوق کی بازیابی کے دھرنا آندولن اور بھوک ہڑٹال بھی کی تھی لیکن ان کی ہر کوشش منظم سازش کے تحت ناکام بنا دی گئی یہ دیکھتے ہوئے مالیگاؤں دیویانگ سوسائٹی کے معذورین نے آج عالمی یوم معذور کے موقع پر ایک بار پھر کارپوریشن پر دھرنا دے دیا ہے