مالیگاؤں (وفا ناہید) 21 اکتوبر کو مالیگاؤں میں اسمبلی الیکشن کا مرحلہ پرامن طریقے سے مکمل ہوا تھا، کل (آج) جمعرات اکتوبر کی صبح ساڑھے 8 بجے ووٹوں کی گنتی چھترپتی شیواجی مہاراج جمخانہ میں شروع ہوگی. آوٹر حلقہ اسمبلی 115 کا اسٹرانگ کیمپ روٹری اسپتال کے پاس واقع سرکاری گودام ہے، 1.24 سب سے پہلے پوسٹل ووٹوں کی گنتی کی جائے گی، ایک اندازے کے مطابق ساڑھے 8 سو کے قریب پوسٹل ووٹ ہے، پوسٹل ووٹوں کی گنتی کے بعد ووٹنگ مشینوں کو متعلقہ ٹیبل تک پہنچایا جائے گا. نمائندے کو اس ضمن میں ملی تفصیلات کے مطابق الیکشن محکمہ نے ووٹوں کی گنتی کے لئے 14 ٹیبل کا انتظام کیا ہے، ایک ٹیبل پر 4 ملازمین کو تعینات کیا جائے گا،اس طرح 150 ملازمین ووٹوں کی گنتی کریں گے،ووٹوں کی گنتی کے لئے ایک امیدوار کو 16 کاؤنٹنگ ایجنٹ نامزد کئے جانے کی اجازت دی گئی ہے،امیدواروں کے ذریعے نامزد کئے جانے والے کاؤ نٹنگ ایجنٹ کا فوٹو اور نمونہ فارم کی خانہ پری کئے جانے کا کام آج دوپہر مکمل کر لیا گیا ہے، تمام مشینیں اسٹرانگ روم میں رکھ کر پورے روم کو سیل کردیا گیا ہے اور ساتھ ہی 24 گھنٹے کے لئے نیم فوجی دستوں کی تعیناتی کردی گئی ہے، جو 8 گھنٹے کے حساب 3 شفٹ میں اپنی ڈیوٹی کی انجام دہی کررہے ہیں، اسٹرانگ روم کے باہر سی سی ٹی وی کیمرہ کی تنصیب کردی گئی ہے، ساتھ ہی غیر ضروری افراد کا داخلہ اسٹرانگ روم کے قریب ممنوع ہے، کاؤنٹنگ والے روز عوام کو اسٹرانگ روم سے 500 میٹر ہی روک دیا جائے گا، صرف کاؤنٹنگ ایجنٹ اور اخباری نمائندوں کو الگ الگ دروازوں سے اندر داخل ہونے کی اجازت ہے، مشرقی دروازے سے کسی شخص کے داخلے کی اجازت نہیں ہے شیواجی جمخانہ کے شمالی اور جنوبی دروازے سے داخلے کی اجازت ہے، 24 اکتوبر کو ٹھیک ساڑھے 8 بجے ووٹوں کی گنتی شروع ہوجائے گی 14 ٹیبل پر ووٹوں کی گنتی ہوگی اور ہر راؤنڈ کے مکمل ہونے کے بعد کس امیدوار کو کتنے ووٹ ملے ہیں اس کا اعلان کیا جائے گا. قیاس لگایا جارہا ہے کہ 20 راؤنڈ میں گنتی کا مرحلہ مکمل ہوجائے گا اور حتمی نتائج کا اعلان کردیا جائے گا، واضح رہے کہ اسمبلی الیکشن کے لئے ووٹرس کی تعداد 2 لاکھ 96 ہزار 667 تھی، اس طرح 21 اکتوبر کو ہونے والے اسمبلی الیکشن میں 1, لاکھ 99 ہزار 812 ووٹرس پولنگ میں حصہ لیا. دیکھا جائے تو 96 ہزار 855 ووٹرس نے ووٹنگ نہیں کی اور الیکشن سے غیر جانبدار رہے. اس اسمبلی الیکشن میں این آر سی کا خوف عوام پر شدت سے نظر آیا. اسی طرح دوسری ریاستوں اور بیرون شہر تلاش معاش کے حصول میں سرگرداں حضرات نے بھی این آر سی کے ڈر کی وجہ سے اپنے کام سے چھٹی لے کر پولنگ کے دن شہر پہنچ گئے اور ووٹنگ میں حصہ لیا. تاکہ ان کے جمہوری حق کا ریکارڈ حکومت کے پاس محفوظ رہے. ذرائع سے ملی مزید معلومات کے مطابق جن 96 ہزار 855 ووٹرس نے ووٹنگ نہیں کی ان کے بارے میں جب معلومات لی گئی تو جو وجوہات سامنے آئیں اس کے مطابق جن ووٹروں کا نام الیکشن یادی میں موجود نہیں تھا. جن کے ناموں میں غلطی کی نشاندہی ہوئی تھی، اور جن ووٹروں کے نام دوسرے پولنگ بوتھ پر ٹرانسفر کر دیئے گئے تھے. علاوہ ازیں جو ووٹرس بیمار بیمار تھے. تو کچھ ووٹروں کو وقت پر ووٹر سلپ نہیں مل سکی تھی. ایسے تمام ووٹرس اپنے حق رائے دہی کے استعمال سے محروم رہ گئے. چونکہ اسمبلی انتخاب دو رخی تھا اور شروع سے ہی کانگریس اور مجلس اتحاد المسلمین کے کارکنان کے درمیان گروہی تصادم ہوتے ہوتے رہ گیا. لہذا نتائج کے اعلان کے بعد کسی طرح کے تصادم سے بچنے کی غرض سے دونوں پارٹیوں کے حامیوں کے لئے الگ الگ مقام پر نتائج کا انتظام کیا جائے گا. ریٹرنگ آفیسر وجیہ آنند شرما کے مطابق قرعہ اندازی کے ذریعے 5 پولنگ بوتھ WPAT مشینوں کی پرچیاں گنی جائے گی. تاکہ کس امیدوار کو کتنے ووٹ ملے ہے اس کا اندراج برابر ہے یا نہیں اس کی جانچ کی جائے گی. اس طرح آوٹر حلقہ اسمبلی میں پولنگ بوتھوں کی تعداد 300 سے زائد ہے. لہذا آوٹر حلقہ اسمبلی کی گنتی کے لئے 22 راؤنڈ لگ سکتے ہیں.