ممبئی :اسمبلی انتخابات میں تمام چینلوں کی سروے رپورٹ کے مطابق بی جے پی شیوسینا اتحاد کی سیٹیں اکثریت کے ساتھ جیتنے پر ریاست پر قابض ہونے والی ہے، جبکہ کانگریس واین سی پی کو بہت کم سیٹیوں پر فتح حاصل ہونے پر احساس کمتری کے دلدل میں ڈھکیل دیا ہے۔ کانگریس میں خوف وہراس کا اندازہ اس بات سے لگایا جاسکتا ہے کہ ٹی وی چینلوں پر بحث میں حصہ لینے سے کترانے والی قومی سطح کی پارٹی کی کشتی ڈوب رہی ہیں۔ اپنی صفائی میں بھی کچھ چیزیں بولنے سے قاصر رہنے والے لیڈران نے میڈیا کے سامنے اپنے گھٹنے ٹیک دیئے ہیں۔ جبکہ اپنی غلطیوں کا اعتراف کرکے رائے دہندگان کو اعتماد میں لینا چاہیے تھا۔ کانگریس پارٹی کی طرف سے اچانک اعلان جاری کردیا گیا ہے، کہ پارٹی کے ترجمان یا لیڈران ٹی وی چینلوں پر بحث میں حصہ نہیں لیں گے۔ آخر کیا وجہ ہے کہ کانگریسی لیڈران چینلوں پر کیوں نہیں آنا چاہ رہے ہیں؟ مزید بے عزتی ہونے کی وجہ سے؟ رائے دہندگان کو متاثر نہیں کرنے کی وجہ سے؟ اپنی شکست قبول کرنے کی وجہ سے؟ بات چیت نہیں کرنے کی وجوہات کو پیش کرنا چاہیے تھا۔ اگر یہی بات چیت بحث و مباحثہ ہندو مسلم کے موضوع پر ہوتا یا انڈیا پاکستان کے موضوع پر ہوتا تو کیا کانگریسی بائیکاٹ کرتے؟ جب اپنی باری آئی تو میڈیا کا بائیکاٹ کررہے ہیں، جب کسی مظلوم طبقہ پر، گھوٹالے پر، بے بنیاد الزامات پر، کسی مخصوص مذہب کو بدنام کرنے پر، حساس موضوعات پر بحث ومباحثہ کیا جاتا تھا تو کانگریس کیوں بائیکاٹ نہیں کرتی تھی؟ بلکہ خوشی خوشی حصہ لیتی تھی۔ ہر عروج کا زوال ہوتا ہے، کانگریس نے اپنے عروج کے وقت فسادات سے لے کر مخصوص طبقے کی ترقی روکنے میں، ملک کی سالمیت کو خطرے میں ڈالنے والی فرقہ پرست تنظیموں کو کھلی چھوٹ دینے میں اہم رول ادا کرنے والی پارٹی نے اپنی آنکھوں سے زوال کو دیکھا ہے۔ دوسروں پر تنقید کرنے کا کوئی حق کانگریس کو نہیں رہا، ناانصافی اور ظلم کی حکومت کو تو اوپر والا بھی پسند نہیں کرتا۔ دیگر پارٹیوں پر الزام عائد کرنے سے پہلے اپنی کمزوری، کمی اور کوتاہی کو جانچنا چاہیے کہ اقتدار میں رہنے کے بعد قومی سالمیت کے لیے کیا کام کیا؟ اگر ہر ایک کوان کا حق پہنچایا جاتا، ظالموں کو کیفر کردار تک پہنچایا جاتا تو آج میڈیا اور چینلوں سے چھپنے کی ضرورت پیش نہیں آتی۔ حالات اتنے بدتر ہوچکے ہیں کہ چینلوں پر بات کرنے میں بھی خوف محسوس ہورہا ہے۔ مرکزی وزیر سلمان خورشید نے خود بیان دیا تھا کہ مسلمانوں کے خون کے دھبے کے داغ کانگریس کے ہاتھ پر آج بھی موجود ہیں۔ کرسی کے لیے جان لینا، دیش کے روپئے کو بلیک منی کے روپ میں بیرون ملک منتقل کرنا، اربوں روپئے کے گھوٹالے کرنا، اسکیم کے نام پر غریبوں کا استحصال کرنا تمام ظلم کو انجام دینے کے بعد زوال کی دلدل میں پھنسنے والی پارٹی کے لیڈران چینلوں پر جم کر بحث کرنے والے بھی اپنا چہرہ چھپانے میں عافیت سمجھ رہے ہیں۔ انہیں علم ہے کہ اپنا چہرہ چھپانے میں ہی عزت چھپ سکتی ہے ورنہ پارٹی کی پالیسی تو بے نقاب ہوگئی تھی، اب لیڈران کے چہرے بھی بے نقاب ہوسکتے تھے۔