ممبئی : ریاست میں بھی یکساں شہری قانون، یکساں سول کوڈ (یو سی سی) کے نفاذ کا راستہ ہموار ہوگیا ہے اور وزیر اعلیٰ نے یکساں قانون کے نفاذ کو یقینی بنانے کے لیے اس کیلئے ۷ رکنی قانونی مسورہ سازی کمیٹی کو منظوری دی ہے۔ اس کے بعد ۷ رکنی کمیٹی کو آج تشکیل دیا گیا ہے, جو یو سی سی کا مسودہ تیار کرے گی اور اسے آئندہ ناگپور اسمبلی میں پیش کیا جائے۔ اتراکھنڈ پہلی ریاست تھی جس نے یو سی سی کا نفاذ کیا ہے, اب ریاست مہاراشٹر نے یو سی سی کے نفاذ میں پیش رفت کی ہے۔

ریاست میں یکساں سول کوڈ یو سی سی کے نفاذ کے لیے آج ریاستی ایوان اسمبلی میں وزیر اعلی دیویندر فڑنویس نے ۷ رکنی کمیٹی تشکیل دی ہے یہ کمیٹی جسٹس رنجنا دیسائی کی سربراہی میں تشکیل دی گئی ہے, اور ۶ ماہ میں اسے رپورٹ پیش کرنا ہے۔ یہ تفصیل یہاں ایوان اسمبلی میں ریاستی وزیر اعلی دیویندر فڑنویس نے پیش کی ہے۔ انہوں نے کہا کہ ملک کے دستور نے صوبائی سرکاروں کو یکساں سول کوڈ یو سی سی کے نفاذ کا اختیار فراہم ہے۔ اسی نہج پر کئی ریاستوں نے یو سی سی کا مسودہ بھی منظور کر لیا ہے اور یہاں یو سی سی کا اطلاق بھی ہو چکا ہے۔ اس کے ساتھ ہی اب مہاراشٹر میں یو سی سی کے نفاذ کو یقینی بنانے کے لئے ۷ رکنی کمیٹی کی تشکیل دی گئی ہے۔ اس کمیٹی کے تجزیاتی و مطالعاتی رپورٹ کے بعد یو سی سی کا اطلاق ہو گا۔ یہ رپورٹ ۶ ماہ کی مدت میں پیش ہو گی اور توقع ہے کہ آئندہ ناگپور سرمائی اجلاس میں اسے پیش کیا جائے گا۔ یو سی سی کے مسودہ سے متعلق وزیر اعلیٰ دیویندرفڑنویس نے اس سے قبل کمیٹی سازی کاُ اعلان کیا تھا۔ آج اس کمیٹی کی تشکیل کو منظوری دیدی گئی ہے, اور اب یو سی سی سے متعلق تجزیاتی رپورٹ یہ کمیٹی پیش کرے گی۔

ممبئی : بھیونڈی ایسٹ سے سماج وادی پارٹی کے ایم ایل اے رئیس شیخ نے مطالبہ کیا ہے کہ یکساں سول کوڈ (یو سی سی) ایکٹ کا مسودہ تیار کرنے کے لیے جمعرات (9 تاریخ) کو وزیر اعلیٰ دیویندر فڑنویس نے قانون ساز اسمبلی میں جس کمیٹی کا اعلان کیا تھا اس میں تمام اقلیتی برادریوں کو مناسب نمائندگی نہیں دی گئی ہے اور اس کمیٹی میں مسلم برادری کو نمائندگی دی جانی چاہیے۔

اس سلسلے میں بات کرتے ہوئے ایم ایل اے رئیس شیخ نے کہا کہ مہاراشٹر میں اقلیتی برادری 20 فیصد ہے۔ اس میں چھ برادریاں شامل ہیں یعنی مسلمان، عیسائی، بدھسٹ، جین، سکھ اور پارسی۔ ان کمیونٹیز میں سب سے زیادہ تعداد صرف مسلم کمیونٹی کی ہے جو ریاست کی کل آبادی کا 11 فیصد ہے۔ وزیر اعلی دیویندر فڑنویس نے آج قانون ساز اسمبلی میں 7 رکنی کمیٹی کا اعلان کیا ہے۔ اس میں ایک بھی مسلم نمائندہ شامل نہیں کیا گیا ہے۔ یکساں سول کوڈ کا سب سے زیادہ گہرا تعلق مسلم کمیونٹی سے ہے۔ اس ضابطہ سے متعلق مسلم کمیونٹیز میں الجھن اور خوف ہے۔ اس لیے اس کمیٹی میں مسلم کمیونٹی کو نمائندگی دینے کی ضرورت ہے،ریاستی حکومت مسلم برادری یا مجموعی طور پر اقلیتی برادری کو اعتماد میں لیے بغیر یکساں سول کوڈ کو نافذ نہیں کرسکتی۔ حکومت اس قانون کے حوالے سے یکطرفہ فیصلہ نہ کرے۔ رئیس شیخ نے مطالبہ کیا کہ سابق جسٹس رنجنا دیسائی کی سربراہی میں 7 رکنی کمیٹی میں مسلم کمیونٹی کے ایک نمائندے کو شامل کرکے کمیٹی کی تشکیل نو کی جائے۔ ایم ایل اے رئیس شیخ نے بھی کہا کہ ہم اس سلسلے میں جلد ہی وزیر اعلیٰ دیویندر فڑنویس سے ملاقات کریں گے۔

ممبئی : مہاراشٹر اسمبلی نے ریاست میں ڈانس باروں کے ضابطہ کار کو مزید مؤثر اور شفاف بنانے کے مقصد سے ڈانس بار قانون میں ترمیمی بل منظور کر لیا ہے۔ حکومت کے مطابق اس ترمیم کا مقصد ان قانونی خامیوں کو دور کرنا ہے جن کے باعث بعض ادارے ڈانس بار کے لیے درکار لائسنس حاصل کیے بغیر دیگر اقسام کے تفریحی لائسنس کے تحت سرگرمیاں انجام دے رہے تھے۔

حکومت کا کہنا ہے کہ ترمیم کے بعد ڈانس پرفارمنس یا اسی نوعیت کی تفریحی سرگرمیاں پیش کرنے والے تمام ادارے ایک ہی قانونی نظام کے تحت آئیں گے۔ اس اقدام سے لائسنس جاری کرنے کے عمل میں شفافیت بڑھے گی اور متعلقہ محکموں کو قانون پر مؤثر عمل درآمد میں سہولت حاصل ہوگی۔

اسمبلی میں بحث کے دوران حکومت نے کہا کہ اس ترمیم کا مقصد آرکسٹرا یا لائیو تفریح کی اجازت کے غلط استعمال کو روکنا اور اس بات کو یقینی بنانا ہے کہ ڈانس بار سے متعلق تمام سرگرمیاں مقررہ قانونی ضوابط کے مطابق انجام دی جائیں۔ اس کے ساتھ قانون کی پابندی کرنے والے اداروں کے لیے یکساں اصول نافذ کیے جائیں گے۔

حکومت نے مزید کہا کہ اس ترمیم کا مقصد عوامی نظم و ضبط کو برقرار رکھنا، اس شعبے میں کام کرنے والی خواتین کے وقار اور حقوق کا تحفظ کرنا اور غیر قانونی سرگرمیوں کی مؤثر روک تھام کرنا ہے۔ اس کے علاوہ لائسنسنگ اور نگرانی کے نظام کو مزید منظم اور جوابدہ بنانے پر بھی زور دیا گیا ہے۔ ترمیمی قانون ضروری آئینی اور قانونی مراحل مکمل ہونے کے بعد نافذ العمل ہوگا۔ اس کے بعد ریاستی حکومت متعلقہ محکموں اور لائسنس جاری کرنے والے اداروں کے لیے تفصیلی رہنما ہدایات جاری کرے گی۔