اسپشیل اسٹوری :خیال اثر مالیگانوی
اسلام کی آمد سے پہلے عہد جاہلیت میں لوگ اپنی بیٹیوں کو بوجھ سمجھتے ہوئے زندہ درگور کردیا کرتے تھے. اسلام جیسے آفاقی مذہب نے اس گناہ عظیم سے معصوم بچیوں کو محفوظ رکھتے ہوئے انھیں پروان چڑھانے کا پیغام دیا تھا.بعد کے آنے والوں نے اس اسلامی فکر کو دوام بخشا لیکن زمانہ جیسے جیسے ترقی کرتا گیا بیٹیوں کو زندہ درگور کرنے کا چلن تو ختم ہو گیا لیکن بیٹیوں کو ان کے سسرال میں ظالمانہ طریقے سے نذر آتش کیا جانے لگا. جہیز کم لانے یا ساس بہو کے جھگڑوں میں معمولی تنازعات کی وجہ سے دنیا میں بے شمار دلہنوں کو انتہائی سفاکی سے زندہ جلا دیا گیا.
فی زمانہ اس سے بھی آگے بڑھتے ہوئے ناجائز تعلقات کے ساخشانے میں جنم لینے والے بچوں کو ظالم مائیں خود ہی کچروں کے ڈھیر پر پھینکتے ہوئے خود کو پاک دامن اور شریف ثابت کرتی رہیں ہیں. اسی طرح بے شمار واقعات ایسے بھی رونما ہوتے رہے ہیں جن میں مائیں خود ہی اپنے جگر گوشوں کو خود میں مگن رہتے ہوئے راہ چلتے ہوئے یا دوکانوں میں خریدی کرتے وقت بھول جایا کرتی ہیں. ایسا ہی ایک دلدوز واقعہ کل شام مالیگاؤں شہر کے مشہور معروف انجمن چوک کی روبی جنرل اسٹور میں پیش آیا. جس کے تعلق سے کہا نہیں جا سکتا کہ اپنی تین ماہ کی معصوم بچی کو خود اس کی ماں یا رشتے دار نقاب پوش خاتون جانے انجانے میں یا پھر مذکورہ خاتون جان بوجھ کر اسٹور میں بیٹھی ہوئی ایک لڑکی کو تھما کر راہ فرار اختیار کر لی.اس سے پہلے وسط جون میں صبح سات بجے کے قریب مالدہ شیوار میں جعفر سیٹھ کے کارخانے کے پاس کپڑوں میں لپٹی ہوئی ایک نوزائیداہ بچی عام افراد کو خونخوار جانوروں کے درمیان پڑی ہوئی ملی تھی جس پر اس علاقے میں چہ مگوئیاں ہوتی رہی تھیں اور لوگوں نے یقین کرلیا تھا کہ اس نومولود کو پھینکنے کا واقعہ ناجائز تعلقات کا ساخشانہ ہے .
برسوں پہلے طنز و مزاح کے مشہور شاعر سلیمان خطیب نے کہا تھا کہ
جس کی بیٹی جوان ہوتی ہے
کس مصبیت میں جان ہوتی ہے
اس واقعہ میں جوان ہونے کا انتظار بھی نہیں کیا گیا. ایک معصوم بچی سے اس کی معصومیت اور اس کا معصوم بچپن چھین کر سماج و معاشرہ میں آوارہ بن کر بھٹکنے کے لئےچھوٰڑ جانے کی بو آتی ہے. اس اسٹور میں لگے ہوئے سی سی ٹی وی کیمرے کے فوٹیچ دیکھنے کے بعد عیاں ہوا کہ مذکورہ نقاب پوش خاتون نے معصوم بچی کو اسٹور میں موجود ایک لڑکی کے ہاتھوں میں سونپ کر اپنی خریدی مکمل کی اور بچی کو لئے بغیر ہی راہ فرار اختیار کر لی. دوکان مالک نے بچی کے تعلق سے محمکہ پولیس کو اطلاع دی جس پر پولیس نے فوٹیچ کی مدد سے اپنی تفتیش کا آغاز کردیا ہے.ہو سکتا ہے کہ آنے والے دنوں میں اس دلدوز واقعہ کی حقیقت کا پردہ فاش ہوجائے. بتایا جاتا ہے کہ یہ معصوم بچی کسی مسلم گھرانے کی چشم و چراغ ہے کیونکہ بچی کے ماتھے پر رنگ حنا سے اللہ اور ہاتھ پر محمد لکھا ہوا ہے. یہ واقعہ مسلم معاشرے کے لئے لمحہ فکریہ کہلائے گا. کیونکہ شہر میں دن بدن نومولود بچوں کے سنسان علاقوں میں پھینکے جانے کے واقعات سامنے آتے رہے ہیں اور اب تو دلہنوں کو نذر آتش کئے جانے کے واقعات بھی ختم ہوکر رہ گئے ہیں لیکن یہ واقعہ ایک ماں اور اس کے اہل خانہ کے لئے شرمسار کردینے کے مترادف ہے. ساتھ ہی ایک ماں کی لاپرواہی کو اجاگر کرتا ہوا یہ المناک واقعہ اصلاح معاشرہ کے علمبرداروں کے لئے کسی تازیانہ سے کم نہیں. عیاں رہے کہ روبی جنرل اسٹور انجمن چوک کے مالک کی جانب سے آزاد نگر پولیس اسٹیشن میں فریاد درج کی گئی ہے گناہ داخل ہونے کے بعد قانونی طور پر لڑکی کو ناسک کے سرکاری ادارے میں بھیج دیا جائے گا. وہاں کا قانون ایسا ہے کہ بہت سے بے اولاد لوگ نمبر لگا کر انتظار میں رہتے ہیں کہ ایسا کوئی بچہ یا بچی آئے تو وہ اسے قانونی طور پر حاصل کرسکے مگر گمشدہ بچوں کی تلاش گروپ مالیگاؤں کے انصاری ضیاء الرحمن مسکان , علاؤالدین للے ,محفوظ الرحمن کاملی, انصاری نعمان ملک, امتیاز بلڈر؛ مسعود بلڈر, عزیز ریاض, ظہیر بھائی زیڈ ایس موبائل ملے کی مسجد اور گمشدہ بچوں کی تلاش گروپ مالیگاؤں کے دیگر اراکین کی جانب سے قانونی لڑائی لڑکر بچی کو حاصل کرنے کی کوشش کی جائے گی. پولیس تحقیقات جاری ہے کچھ اور انکشاف بھی ہوسکتا ہے وقت کا انتظار رہے گا.