ممبئی بلدیاتی انتخابات میں سماجوادی پارٹی لیڈر اور رکن اسمبلی ابوعاصم اعظمی نے پارٹی ٹکٹ سے محروم دعویداروں سے اپیل کی ہے کہ کسی وجہ سے اگر کسی امیدوار کو پارٹی کا ٹکٹ نہیں ملا ہے, آئندہ انہیں پارٹی قیادت موقع فراہم کرے گی, لیکن اس الیکشن میں عوام کے مسائل اور اس کے حق کے لئے سماج وادی پارٹی کے امیدواروں کے ساتھ رہ کر اتحاد کا مظاہرہ کرے. انہوں نے کہا کہ بی ایم سی انتخاب میں سماجوادی پارٹی نے ۱۵۰ نشستوں کو امیدوار اتارنے کا فیصلہ کیا تھا تاکہ سماجوادی نظریہ کو فروغ ملے. پارٹی ٹکٹ کے امیدواروں کو ٹکٹ میسر ہوئے اور امیدواروں نے چرچہ نامزدگی بھی داخل کیا, لیکن بدقسمتی سے کئی دعویداروں کو ٹکٹ نہیں ملی کیونکہ ٹکٹ فراہمی تقسیم میں کئی دشواریاں بھی تھیں. ممبئی میں پارٹی کی ٹکٹ پر الیکشن لڑنے اور پارٹی کے نظریہ کو فروغ دینے کے لیے ہر ایک کا شکریہ کئی وارڈوں میں مرحلہ وار طریقے سے امیدواروں کا اعلان کیا گیا تھا اور انتخابی مرحلہ کے لیے ۱۵۰ امیدواروں کو انتخابی میدان میں اتارا گیا ہے. ابوعاصم اعظمی نے کہا کہ میری تمام کارکنان اور دعویداروں سے اپیل ہے کہ وہ ٹکٹ کی محرومی پر ناراض ہونے کے بجائے پارٹی امیدوار کے لئے کام کرے, کیونکہ پارٹی کو مستحکم بنانا اور سماج وادی پارٹی کے نظریہ کو فروغ دینا ہی ہماری ذمہ داری ہے. جس امیدواروں کو اس مرتبہ موقع فراہم نہیں ہوا ہے وہ نالاں نہ ہو, انتخاب صرف ایک امیدوار کا نہیں بلکہ پارٹی کا نظریہ ہے, ٹکٹ چاہے کسی کو بھی دی گئی ہے, وہ سماج وادی پارٹی کا چہرہ اور امیدوار ہے, اس لئے پارٹی امیدوار کا ساتھ دے کر پارٹی کو مستحکم کرے اتحاد کی فتح ہے, شہریوں کے مسائل پر آواز بلند کرنے کے لیے آپ تمام سماجوادی پارٹی کے لیے کام کریں گے اور مجھے پورا یقین ہے کہ سماج وادی پارٹی اس مرتبہ تاریخ رقم کرے گی۔

ممبئی : میونسپل کارپوریشن کے عام انتخابات جمہوریت کا بہت اہم عمل اس کو کامیابی، شفاف اور منصفانہ طریقے سے انجام دینے کی ذمہ داری تمام متعلقہ مرکزی اور ریاستی افسران اور ملازمین پر عائد ہوتی ہے۔ ضابطہ اخلاق کی مدت کے دوران قواعد کے مطابق ہر عمل کو درست اور بروقت ریکارڈ کرنا لازمی ہے۔ نظم و ضبط، امن اور انصاف انتخابی عمل کے بنیادی پہلو ہیں اور ان پر سختی سے عمل کیا جانا چاہیے۔ میونسپل کمشنر اور ڈسٹرکٹ الیکشن آفیسربھوشن گگرانی نے سخت وارننگ دی ہے کہ کسی بھی قسم کی غلطی، غفلت یا قواعد کی خلاف ورزی برداشت نہیں کی جائے گی۔ انتخابی قوانین اور رہنما اصولوں پر ہر مرحلے پر سختی سے عمل درآمد کیا جائے۔ شری گگرانی نے یہ بھی بتایا کہ اگر ان ہدایات پر عمل کیا جائے تو انتظامیہ پر شہریوں کا اعتماد مضبوط ہوگا۔ممبئی میونسپل کارپوریشن کے عام انتخابات 2025-26 کے سلسلے میں، میونسپل کمشنر اور ضلع انتخابی افسر بھوشن گگرانی نے آج چیف مانیٹرنگ کمیٹی کی میٹنگ کی۔ میونسپل کارپوریشن ہیڈکوارٹر میں منعقدہ اس میٹنگ میں قبل از انتخابات کی تیاریوں، امن و امان، ضابطہ اخلاق کی سختی سے پابندی، مختلف فلائنگ اسکواڈز کے کام کے علاوہ مشکوک اور بڑے پیمانے پر ہونے والے لین دین کی نگرانی پر تفصیلی تبادلہ خیال کیا گیا۔ اس موقع پر گگرانی نے متعلقہ اداروں کو ضروری ہدایات دیں۔
اس موقع پر ایڈیشنل میونسپل کمشنرڈاکٹر اشونی جوشی، جوائنٹ کمشنر آف پولیس (لا اینڈ آرڈر) مسٹر ستیہ نارائن چودھری، میونسپل کارپوریشن کے اسپیشل ڈیوٹی آفیسر (الیکشن) مسٹر وجے بالموار، جوائنٹ کمشنر (ٹیکس اسیسمنٹ اینڈ کلیکشن) مسٹر وشواس شنکروار، ڈپٹی کمشنر (میونسپل آفس) کے ایڈیشنل کلکٹر مسٹر پرایش شنکروار۔ (کونکن ڈویژن) فروگ مکدم، اسسٹنٹ کمشنر (ٹیکس اسیسمنٹ اینڈ کلیکشن) مسٹر گجانن بیلے کے ساتھ ریزرو بینک آف انڈیا، معروف ڈسٹرکٹ بینک، ایئر پورٹ اتھارٹی آف انڈیا، سنٹرل انڈسٹریل سیکورٹی فورس، سنٹرل ریزرو پولیس فورس، ریلوے پروٹیکشن فورس، انڈین کوسٹ گارڈ اور اسٹیٹ ڈپارٹمنٹ کے دیگر محکمہ جات کے نمائندے موجود تھے۔میونسپل کارپوریشن کمشنر اور ضلع الیکشن آفیسر بھوشن گگرانی نے کہا کہ میونسپل کارپوریشن انتظامیہ اور انتخابی مشینری اس بات کو یقینی بنانے کے لیے پابند عہد ہے کہ ممبئی میونسپل کارپوریشن کے عام انتخابات 2025-26 مکمل طور پر بے خوف، آزاد، شفاف اور نظم و ضبط کے ماحول میں منعقد ہو۔ اس سلسلے میں جامع اور وسیع تیاریاں کی گئی ہیں۔ پورے انتخابی عمل میں مختلف مشینری کا کردار بہت اہم ہے۔ جمہوری اقدار کو فروغ دینے اور انتخابی عمل کے منصفانہ، شفاف اور قابل اعتبار رہنے کو یقینی بنانے کے لیے تمام مرکزی اور ریاستی مشینری کو ریاستی الیکشن کمیشن کے وضع کردہ ضابطہ اخلاق پر سختی سے عمل کرنا چاہیے اور میونسپل کارپوریشن انتظامیہ کے ساتھ مکمل تعاون کرنا چاہیے۔گگرانی نے اپیل کی کہ انتخابی عمل میں ایک مثبت، مثالی اور قابل تقلید مثال پیدا کرنے کے لیے اچھی منصوبہ بندی کی جائے۔جوائنٹ کمشنر آف پولیس (لا اینڈ آرڈر) ستیہ نارائن چودھری نے کہا کہ میونسپل کارپوریشن کے انتظامی ڈویژنوں میں قائم فلائنگ اسکواڈز کے لیے ضروری پولیس اہلکار دستیاب کرائے گئے ہیں۔ جس جگہ الیکٹرانک ووٹنگ مشین (ای وی ایم) رکھی گئی ہے اور گنتی کے مرکز پر ضروری سیکورٹی تعینات کر دی گئی ہے۔ الیکٹرانک ووٹنگ مشین کی نقل و حمل کے دوران پولیس سیکیورٹی فراہم کی جائے گی۔ پولس ڈیپارٹمنٹ کی جانب سے انتخابات کے لیے ممکنہ کارروائی کا منصوبہ تیار کر لیا گیا ہے۔ اسلحہ ضبط کرنے کا عمل شروع کر دیا گیا ہے۔ ممبئی پولیس ڈیپارٹمنٹ کے ذریعے تمام ہتھیار رکھنے والوں کو نوٹس بھیجے گئے ہیں۔ مقامی تھانے کی رپورٹ کے مطابق اسلحہ ضبط کرنے کے احکامات جاری کیے گئے ہیں۔ احتیاطی تدابیر اور ملک بدری کے ضروری مقدمات کو فوری طور پر نمٹا دیا جا رہا ہے۔ امن و امان برقرار رکھنے کے لیے ڈپٹی کمشنر، اسسٹنٹ کمشنر، پولیس انسپکٹر کو ضروری کارروائی کی ہدایات دی گئی ہیں۔ سوشل میڈیا کی آزادانہ نگرانی کی جا رہی ہے۔ چودھری نے بتایا کہ اس کی ذمہ داری پولیس کے سائبر سیل کو سونپی گئی ہے۔
ہوائی اڈوں اور ریلوے اسٹیشنوں پر غیر قانونی رقوم کی منتقلی ہو رہی ہے تو اس حوالے سے باقاعدہ کارروائی کی جائے۔ مشتبہ اور بڑی مالیت کے لین دین کی اطلاع موجودہ طریقہ کار کے مطابق محکمہ انکم ٹیکس کو دینے کے لیے کارروائی کی جانی چاہیے۔ اس میٹنگ میں یہ بھی ہدایت دی گئی کہ بڑی اور مشکوک رقم نکالنے اور گفٹ کارڈز کی اطلاع بھی فوری طور پر محکمہ انکم ٹیکس کو دی جائے۔

ممبئی : پولس نے سال نو اور ۳۱ نائٹ کے جشن کے پیش نظر حفاظتی انتظامات سخت کرنے کا دعوی کیا ہے اس موقع پر پولس نے شہر میں الرٹ جاری کیا ہے سال نو پر کسی بھی قسم کی کوئی گڑبڑی اور ناخوشگوار واقعہ پیش نہ آئے اس لئے پولس نے مستعدی کا مظاہرہ کیا ہے اہم مقامات پر خصوصی انتظامات سمیت تفریحی مقامات پر بھی پولس فورس کو الرٹ رہنے کی ہدایت جاری کی گئی ہے ۔سال نو کے جشن پر پولس نے جگہ جگہ ناکہ بندی اور مستقل پوائنٹس بھی تعینات کئے ہیں ۔ تفصیلات کے مطابق شہر میں ۱۰ ایڈیشنل کمشنر، ۳۷ ڈی سی پی ، ۶۱ اے سی پی ۲۷۹۰پولس افسر اور ۱۴۲۰۰ اہلکاروں کی تعیناتی کو یقینی بنایا گیا ہے اس کے علاوہ ناکہ بندی اور تلاشی مہم میں بھی شدت پیدا کردی گئی ہے اہم مقامات پر ناکہ بندی کے ساتھ ایس آر پی ایف، کیو آر ٹی ، بی ڈی ڈی دستہ ، ایس آر پی ایف اور ہوم گارڈ کو بھی تعینات کیا گیا ہےاس کے ساتھ بھیڑ بھاڑ والے علاقوں اور سا ل نو کے جشن کی تقریبات میں پولس کی خصوصی نظر رہے گی ممبئی میں مذہبی مقامات چرچ ، شاپنگ مالس ، دیگر مقامات پر سال نو کے جشن کی تقریبات منعقد کی جاتی ہے اس لیے یہاں خصوصی سیکورٹی انتظامات کئے گئے ہیں ممبئی پولس نے دعویٰ کیا ہے کہ وہ سال نوکے جشن کے لیے تیار ہے اور شہریوں سے اپیل کی ہے وہ بھیڑ بھاڑ والے علاقوں میں مشتبہ اور مشکوک افراد پر نظر رکھے اور اگر کوئی مشتبہ افراد شئے یا لاوارث بیگ نظر آتا ہے تو اس کی اطلاع پولس کو دے یا کنٹرول روم سے رابطہ کرے شہریوں کو محتاط رہنے کی بھی ہدایت ممبئی پولس نے کی ہے سال نو کے موقع پر اکثر ڈرنک اینڈ ڈرائیو کے کیس میں بھی اضافہ ہوتا ہے اور اس سے حادثات کا خطرہ ہوتا ہے اس لیے پولس نے شہریوں سے اپیل کی ہے کہ وہ سال نو کا جشن منانے کے ساتھ شراب پی کر ڈرائیونگ نہ کرے اس سے متعلق بیداری مہم بھی ممبئی ٹریفک پولس نے شروع کردی ہے اور سڑکوں پر ٹریفک قوانین کی پاسداری کے لئے ڈرائیوروں کو تابع بھی کیا جارہا ہے اس کے علاوہ ممبئی شہر میں سال نو کے جشن کے دوران گیٹ وے آف انڈیا سمیت دیگر تفریحی مقامات پر شہریوں کا ہجوم ہوتا ہے اور عوامی مقامات پر آتش بازی بھی ہوتی ہے ایسے میں ان مقامات پر پولیس کا خاص بندوبست ہو گا اس کی تصدیق ممبئی پولس کے ڈی سی پی آپریشن اکبر پٹھان نے کیا ہے انہوں نے کہا کہ ممبئی پولیس شہریوں کی حفاظت اور سال نو کے جشن کے لیے پوری طرح مستعد ہے اور ضروری حفاظتی انتظامات بھی کئے گئے ہیں اس لیے شہریوں سے اپیل ہے کہ وہ پولیس کے ساتھ تعاون کرے تاکہ پولس فوری طور پر ان کی مدد کرسکے ۔ انہوں نے کہا کہ خواتین اور اطفال کی حفاظت کے لیے بھیڑ بھاڑ والے علاقوں اور جشن کے دوران سادہ لباس میں پولیس کی تعیناتی ہو گی اس کے علاوہ منشیات کے خلاف بھی پولیس کارروائی کرے گی ۔ انٹی نارکوٹکس سیل نے بھی سال نو کے موقع پر الرٹ جاری کیا ہے اور منشیات فروشوں کے خلاف کریک ڈاؤن میں شدت پیدا کردی ہے اور کہا ہے کہ اگر کوئی منشیات استعمال کرتے ہوئے پایا گیا تو اس پر کارروائی ہو گی یہ انتباہ ڈی سی پی انٹی نارکوٹکس سیل کے ڈی سی پی نوناتھ ڈھولے نے دیا ہے ۔