بھیونڈی مشرقی حلقہ اسمبلی اور مغربی حلقہ اسمبلی میں سہ رخی مقابلے اور دیہی حلقہ اسمبلی میں براہ راست مقابلے کے امکانات دکھائی دے رہے ہیں۔ واضح ہو کہ بھیونڈی مشرقی حلقہ اسمبلی میں بی جے پی ‘شیوسینا اتحاد کے امیدوار روپیش مہاترے ، کانگریس کے سنتوش ایم شیٹی اور سماج وادی پارٹی کے رئیس شیخ کے درمیان سہ رخی لڑائی ہونے کا امکان ہے۔ اسی طرح ، بھیونڈی مغرب میں ، بی جے پی – شیوسینا اتحاد کے امیدوار مہیش چوگلے ، کانگریس کے شعیب گڈو اور اے آئی ایم آئی ایم کے حمایت یافتہ آزاد امیدوار خالد مختار شیخ کے بیچ سہ رخی مقابلے کے آثار ہیں۔ لیکن دیہی حلقہ اسمبلی میں شیوسینا-بی جے پی اتحاد کے امیدوار شانتارام مورے اور راشٹروادی کانگریس پارٹی کی مادھوری مہاترے میں براہ راست مقابلے کے امکانات ہیں۔
بھیونڈی مشرقی حلقہ اسمبلی سے پانچ امیدواروں کی پرچہ نامزدگی واپس لینے کے بعد ، شیوسینا کے روپیش مہاترے ، کانگریس کے سنتوش شیٹی ، سماج وادی پارٹی کے رئیس شیخ ، ونچت بہوجن اگھاڑی سے بودھیش جادھو ، ایم این ایس سے منوج گلوی ، بہوجن سماج پارٹی سے نذیر احمد صدیق انصاری، سماجوادی فارورڈ بلاک سے عبدالسلام انصاری ، بہوجن مہا پارٹی سے نارائن ونگا اور پیس پارٹی کے حبیب الرحمٰن خان سمیت 14 امیدوار انتخابی میدان میں ہیں۔ جس میں شیوسینا ، کانگریس ۔ سماج وادی پارٹی میں سہ رخی مقابلے کے امکانات ہیں۔ جس میں سماج وادی پارٹی کے ووٹوں کی تقسیم یہ فیصلہ کرے گی کہ اس سے کس کو فائدہ پہونچنے والا ہے۔ بی جے پی – شیوسینا اتحاد کے امیدوار روپیش مہاترے اور بی جے پی کے ضلع صدر کا عہدہ چھوڑ کر کانگریس سے انتخاب لڑنے والے بی جے پی کے کارپوریٹر سنتوش شیٹی 2014 کے اسمبلی انتخابات میں بھی آمنے سامنے تھے ، جس میں سنتوش شیٹی 3393 ووٹوں سے ہار گئے تھے۔ جس کی وجہ سے اس اسمبلی انتخابات میں ان کا حوصلہ کافی بلند ہے۔ بی جے پی – شیوسینا اتحاد کے امیدوار ایم ایل اے روپیش مہاترے ہیٹ ٹرک لگانے کے لئے تیسری بار انتخاب لڑ رہے ہیں۔ان کے حامیوں کا خیال ہے کہ اس بار روپیش مہاترے کے جیتنے پر انہیں یقینی طور پر کابینہ میں جگہ دی جائے گی۔اسی کے ساتھ ہی ، سماج وادی پارٹی سے ممبئی کے کارپوریٹر رئیس شیخ اپنی قسمت آزمانے آئے ہیں ، رئیس شیخ ممبئی کے کارپوریٹر ہونے کی وجہ سے سے بھیونڈی کے ووٹروں سے ناواقف ہیں لہذا یہ دیکھنا ضروری ہوگا کہ سماجوادی پارٹی کے ریاستی صدر ابو عاصم اعظمی کے نام پر انہیں کتنے ووٹ ملیں گے۔ حالانکہ رئیس شیخ کا نام کراماتی کارپوریٹرز میں شمار کیا جاتا ہے۔ جس کی وجہ سے سماجوادی پارٹی کی قیادت یہ ظاہر کرنے کی کوشش کر رہی ہے کہ بھیونڈی مشرق کی ترقی کے لئے کارپوریٹر رئیس شیخ کو جیتنا انتہائی ضروری ہے۔ اب دیکھنا یہ ہے کہ سماجوادی پارٹی کے امیدوار اقلیتوں کے ووٹوں کی پولرائزیشن پر کیا کردار ادا کرتی ہے۔ اسی طرح مغربی اسمبلی حلقہ میں بی جے پی ‘کانگریس‘ اے آئی ایم آئی ایم کے حمایت یافتہ آزاد امیدوار میں سہ رخی مقابلے کے امکانات ہیں، بھیونڈی مغربی اسمبلی حلقہ سے بی جے پی کے رکن اسمبلی مہیش چوگلے ، کانگریس سے شعیب گڈو ، ونچت بہوجن اگھاڑی سے سوہاس بونڈے ، ایم این ایس سے ناگیش مقادم ، بی ایس پی سے ابوسہما خان اور آزاد امیدوار ،محمد خالد مختار شیخ اے آئی ایم آئی ایم کے حمایت یافتہ سمیت کل سات امیدوار انتخابی میدان میں ہیں ، جس میں بی جے پی کے مہیش چوگلے اور کانگریس کے شعیب گڈو کے درمیان براہ راست مقابلہ ہے ایسا قیاس کیا جا رہا ہے ، لیکن اچانک AIMIM کے حمایت یافتہ آزاد امیدوار محمد خالد مختار شیخ کے انتخابی میدان میں اترتے ہی سہ رخی مقابلے کا امکان ظاہر کیا جارہا ہے۔ AIMIM کے حمایت یافتہ امیدوار محمد خالد مختار شیخ کے ذریعے ہی یہ طے ہوگا کہ اونٹ کس کروٹ بیٹھے گا۔ قابل ذکربات یہ ہے کہ راشٹروادی کانگریس پارٹی کے ضلع صدر کا عہدہ چھوڑ کر ، محمد خالد مختار شیخ نے اے آئی ایم آئی ایم میں شامل ہو گئے تھے اور انہوں نے اے آئی ایم آئی ایم اور آزاد امیدوار کے طور پر کاغذات نامزدگی داخل کروائے تھے لیکن جانچ کے دوران اے آئی ایم آئی ایم کے کاغذات نامزدگی رد ہو گیا تھا۔ جس کی وجہ سے وہ آزاد امیدوار ہو گئے تھے، محمد خالد مختار شیخ کا اے آئی ایم آئی ایم کی پرچہ نامزدگی رد ہونے کے بعد کانگریس نے راحت کی سانس لی تھی۔ لیکن اے آئی ایم آئی ایم کے حمایت یافتہ امیدوار کے اعلان کے بعد صورتحال بدل گئی ہے۔اسی طرح دیہی اسمبلی حلقہ انتخاب میں شیوسینا ۔ اور راشٹروادی کانگریس پارٹی آمنے سامنے ہیں ، بھیونڈی دیہی حلقہ اسمبلی میں ، بی جے پی شیوسینا مہاگٹھ بندھن کے ایم ایل اے شانتارام مورے ، این سی پی کی مادھوری مہاترے ، ونچت بہوجن اگھاڑی سے سوپنل کولی ، ایم این ایس سے شوبھانگی گوواری ، سی پی آئی سے کامریڈ نتیش مہسے اور مارکسوادی کمیونسٹ پارٹی سے کامریڈ لکشمن واڈو سمیت سات امیدوار انتخابی میدان میں ہیں۔ جس میں شیوسینا- بی جے پی مہاگٹھبندھن کے امیدوار شانتارام مورے اور این سی پی کی مادھوری مہاترے کے درمیان براہ راست مقابلے کے امکانات ہیں۔ بھیونڈی دیہی اسمبلی حلقہ کا علاقہ بھیونڈی تعلقہ کے دیہی علاقوں سمیت واڑا تک پھیلا ہوا ہے۔ جس کی وجہ سے امیدواروں کو سخت محنت کرنی پڑے گی۔