نئی دہلی، 3 دسمبر، دہلی میونسپل کارپوریشن (ایم سی ڈی) کے 12 وارڈوں میں ہوئے ضمنی انتخابات کے نتائج کا بدھ کو اعلان کیا گیا، جس میں بھارتیہ جنتا پارٹی (بی جے پی) نے سات اور عام آدمی پارٹی (اے اے پی) نے تین نشستیں حاصل کیں۔ کانگریس نے سنگم وہار-اے سیٹ جیت کر شہری باڈی میں اپنا کھاتہ بھی کھولا۔ بی جے پی کی ریکھا رانی نے وارڈ نمبر 128، ڈیچاون کلاں سے کامیابی حاصل کی، جبکہ سرلا چودھری نے وارڈ نمبر 198، ونود نگر سے کامیابی حاصل کی۔ وینا اسیجا نے وارڈ نمبر 65، اشوک وہار سے کامیابی حاصل کی، اور سمن کمار گپتا نے وارڈ نمبر 74، چاندنی چوک سے کامیابی حاصل کی۔ اس کے علاوہ، بی جے پی کی انیتا جین نے وارڈ نمبر 56، شالیمار باغ جیت لیا۔ باقی سیٹوں سے، انجم منڈل نے گریٹر کیلاش سے جیت حاصل کی، اور منیشا دیوی نے بی جے پی کے لیے دوارکا بی سیٹ حاصل کی۔ اے اے پی نے تین سیٹوں پر کامیابی حاصل کی، جس میں رام سوروپ کنوجیا نے دکشن پوری میں کامیابی حاصل کی، انیل نے منڈکا سیٹ حاصل کی، اور راجن اروڑہ نے نارائنا سے کامیابی حاصل کی۔ سنگم وہار وارڈ 163اے سے کانگریس کے سریش چودھری نے کامیابی حاصل کی جبکہ چاندنی محل میں آل انڈیا فارورڈ بلاک کے محمد عمران نے کامیابی حاصل کی۔

جن 12 وارڈوں میں 30 نومبر کو ووٹنگ ہوئی تھی، ان میں سے 9 پہلے بی جے پی کے پاس تھے اور باقی اے اے پی کے پاس تھے۔ ووٹر ٹرن آؤٹ 38.51 فیصد رہا جو کہ 250 وارڈوں میں منعقدہ 2022 کے ایم سی ڈی انتخابات کے دوران ریکارڈ کیے گئے 50.47 فیصد سے کم تھا۔ کانجھا والا، پتم پورہ، بھارت نگر، سول لائنز، راؤس ایونیو، دوارکا، نجف گڑھ، گول مارکیٹ، پشپ وہار اور منڈاولی میں دس گنتی مراکز قائم کیے گئے تھے۔ ریاستی الیکشن کمیشن نے ایک بیان میں کہا کہ ہر مرکز نے نامزد وارڈوں کی گنتی کا انتظام کیا اور محفوظ اسٹرانگ رومز اور کنٹرولڈ رسائی پوائنٹس سے لیس تھا۔ ضمنی انتخابات سے پہلے، 250 رکنی ایم سی ڈی ہاؤس میں بی جے پی کے 115، آپ کے 99، اندرا پرستھ وکاس پارٹی کے 15، اور کانگریس کے 8 ارکان شامل تھے۔ ضمنی انتخابات کو بی جے پی کی حالیہ اسمبلی انتخابات میں کامیابی کے بعد پہلی بڑی انتخابی امتحان کے طور پر دیکھا جا رہا ہے۔ دریں اثنا، اے اے پی اور کانگریس نے اس مقابلے کو قومی دارالحکومت میں اپنی پوزیشن مضبوط کرنے کا موقع سمجھا۔ ضمنی انتخابات میں 26 خواتین سمیت کل 51 امیدواروں نے مقابلہ کیا۔ بی جے پی نے سب سے زیادہ آٹھ خواتین امیدواروں کو میدان میں اتارا، اس کے بعد چھ کے ساتھ اے اے پی اور پانچ کے ساتھ کانگریس دوسرے نمبر پر ہے۔ ضمنی انتخابات کے انتظامات کے لیے دہلی پولیس کے تقریباً 1,800 اہلکار اور 10 نیم فوجی کمپنیاں تعینات کی گئی تھیں۔ کمیشن نے مزید کہا کہ ووٹوں کی گنتی کے لیے تقریباً 700 عملے کو تفویض کیا گیا تھا، اور امیدواروں اور ان کے مجاز ایجنٹوں کو مناسب سہولیات فراہم کی گئی تھیں۔

ممبئی : ممبئی میں بابری مسجد کی شہادت کی برسی اور ڈاکٹر بابا صاحب امبیڈکر کے یوم وفات کے پیش نظر ممبئی پولیس نے دادر چیتنہ بھومی پر سخت حفاظتی انتظامات کا دعوی کیا ہے اس کے ساتھ ہی دادر علاقہ میں سڑک کو یک طرفہ ٹریفک کیلئے بند کر دیا ہے کئی سڑکوں کو مکمل طور پر مقفل کر دیا ہے ممبئی میں 6 دسمبر بابری مسجد کے شہادت کی برسی اور ڈاکٹر بابا صاحب امبیڈکرکے یوم وفات پر پولیس الرٹ جاری کیا ہے دادر میں سیکورٹی میں اضافہ کیا گیا ہے اس کے ساتھ ہی بی ایم سی نے دادر چیتنہ بھومی پر حاضری دینے والے زائرین کیلئے ضروری انتظامات کرنے کا بھی دعوی کیا ہے بی ایم سی زائرین کیلئے کھانا سمیت پینے کے پانی اور دیگر ضروری سہولیات کا اہتمام کرتی ہے چیتنہ بھومی پر حاضری دینے کیلئے لاکھوں زائرین 6دسمبر کو ریاست بھر سے یہاں حاضر ہوتے ہیں ایسے میں پولیس نے ضروری حفاظتی انتظامات کا بھی دعوی کیا ہے پولیس نے ممبئی شہر میں الرٹ جاری کیا ہے چیتنہ بھومی پر ڈاکٹر بابا صاحب امبیڈکر کو خراج عقیدت پیش کر نے کیلئے قدآور سیاسی لیڈران سمیت وزیر اعلی دیویندر فڑنویس بھی یہاں حاضری دیتے ہیں۔ ممبئی پولیس نے 6 دسمبر سے قبل ضروری میٹنگ کا انعقاد کیا تھا جس میں حفاظتی انتظامات کا معائنہ بھی کیا گیا ہے۔ ڈی سی پی زون 5 مہندر پنڈت نے بتایا ہے کہ 6 دسمبر کے پس منظر میں پولیس نے حفاظتی انتظامات سخت کئے ہیں اس کے ساتھ ہی 5 دسمبر سے ماہم کا میلہ بھی شروع ہوگا اس لئے بھی پولیس مستعد ہے اور پہلا صندل ماہم پولیس اسٹیشن پیش کر ے گی انہوں نے کہا کہ دادر میں چیتنہ بھومی پر خصوصی انتظامات کئے گئے ہیں اس کے علاوہ پولیس افسران و اہلکاروں کو الرٹ رہنے کی ہدایت جاری کی گئی ہے ممبئی میں چیتنہ بھومی پر بھیڑ بھاڑ ہوتی ہے اس دوران عوام سے پولیس نے اپیل کی ہے کہ وہ الرٹ رہے اور مشتبہ اور مشکوک افراد سمیت لاوارث اور نامعلوم شے کی اطلاع پولیس کو دے اور افواہوں پر توجہ نہ دے پولیس نے 6 دسمبر کے پیش نظر سوشل میڈیا پر بھی نگرانی شروع کردی ہے۔

میرا روڈ :
جماعتِ اسلامی ہند میرا روڈ کے زیرِ اہتمام “سیرت النبی ﷺ و اتحادِ اُمت“ کے عنوان سے ایک شان دار اور پرشکوہ کانفرنس این ایچ اسکول گراؤنڈ میں منعقد ہوئی، جس میں 3500 سے زائد مرد و خواتین کی غیر معمولی شرکت نے اسے ایک تاریخی اجتماع بنا دیا۔

افتتاحی کلمات ڈاکٹر طارق شاہ (امیرِ مقامی جماعت اسلامی ہند ، میرا روڈ) نے پیش کیے اور واضح کیا کہ کانفرنس کا بنیادی مقصد اُمتِ مسلمہ میں اتحاد و یکجہتی کو فروغ دینا، سیرتِ نبوی ﷺ کی روشنی میں اسلامی کردار سازی کرنا، اور معاشرے میں نبوی مشن کے احیاء کی جدوجہد کو مضبوط بنانا ہے ۔ ساتھ ہی جماعت اسلامی کی سرگرمیوں، ذیلی تنظیموں اور پروجیکٹس کے بارے میں بھی وضاحت کی۔اور اُنہوں نے کہا کہ اس اجتماع کا بنیادی مقصد سیرتِ نبوی ﷺ کی روشنی میں اُمت کو ایک مرکز پر جمع کرنا اور معاشرے میں مثبت تبدیلی کی جدوجہد کو مضبوط بنانا ہے۔
صدارتی خطاب جماعت اسلامی ہند کے نائب صدر مولانا ولی اللہ سعیدی فلاحی نے فرمایا، جسے سامعین نے بے حد پسند کیا۔مولانا نے خطاب میں کہا کہ امت کی کامیابی سیرتِ نبوی ﷺ کی مکمل پیروی میں ہے۔ اگر مسلمان نبی کریم ﷺ کے اخلاق، عدل، اور دعوتی حکمت کو اختیار کریں تو معاشرہ امن و انصاف کا گہوارہ بن سکتا ہے۔ سیرت رسول اللہ کی روشنی میں رہنمائی کی اور کہا کہ کہ دین ہمیں عدل، دیانت اور خدمتِ خلق کا حکم دیتا ہے، اور یہی اوصاف ایک مضبوط قوم اور ترقی یافتہ سماج کی بنیاد بنتے ہیں۔

خطاب عام سے امیرِ حلقہ جماعت اسلامی ہند مہاراشٹر مولانا الیاس خان فلاحی، ناظم شہر جماعت اسلامی ہند ممبئی جناب راشد خان ، مہتمم دارالعلوم عزیزیہ مولانا عبداللہ قاسمی، امام حیدری مسجد سید حسن امام، اور سیاسی رہنما سید مظفر حسین نے خطاب کیا۔
دیگر مقررین نے ملک کی تعمیر و ترقی میں مسلمانوں کے کردار، خاندانی نظام کی مضبوطی، اسلامی تحریکات میں خواتین کے فعال رول، اور نبی کریم ﷺ کے مشن— پیغامِ دین کی اشاعت اور بہترین اخلاقی کردار کی تشکیل— جیسے اہم موضوعات پر جامع روشنی ڈالی۔ آخر میں کانفرنس انچارج عطاءالحق نے تمام شرکاء، سماجی و دینی قائدین، عوام، اور تنظیمی شعبہ جات— ایس آئی او، جی آئی او اور یوتھ موومنٹ— کی خدمات کا خصوصی طور پر شکریہ ادا کیا۔اجتماع کا اختتام مولانا زکریا صاحب کی پُرسوز دعا پر ہوا۔