(خیال اثر)
شہیدان بم بلاسٹ اور مجروحین کے طفیل تعمیر شدہ جدید اسپتال (سول ہاسپٹل) میں طبی خدمات کی انجام دہی کے لئے ملازمین کی فراہمی ٹھیکدار کے ذریعے کی جاتی ہے. کورونا جیسی وباء کے پھیلنے کے باعث اور لاک ڈاؤن کی پابندیوں کے طفیل شہر کے معاشی حالات دگر گوں ہوتے جارہے ہیں. شیدید معاشی حالات سے پریشان ٹھیکدار کی جانب سے مہیا کیا گیا ایک نوجوان ملازم اکرم خان طالب خان (30) ساکن نہال نگر نے اپنی بقایا تنخواہ کی عدم دستیابی کی وجہ سے زہر خورانی کرتے ہوئے خودکشی کرنے کی کوشش کی جو ان دنوں اسی اسپتال میں موت و زیست کی کشمکش میں مبتلا ہے.یہ معاملہ گزشتہ کل یہاں کے جنرل ہاسپٹل کی سیڑھیوں پر پیش آیا تھا.متاثرہ اکرم خان نے نمائندے کو بتایا کہ 12ہزار ماہانہ تنخواہ پر ہمیں نامزد کیا گیا تھا لیکن ٹھیکدار کی جانب سے اسے صرف 9ہزار روپیے ہی تنخواہ کی شکل میں ادا کیا جاتا تھا اور اس کی تین ماہ کی تنخواہ ٹھیکدار شرد دیورے کی جانب سے ادا نہ کئے جانے کی صورت میں پریشان ہو کر یہ انتہائی دم اٹھانے پر مجبور ہوگیا. انھوں نے مزید بتایا کہ کوویڈ سینٹروں پر ہم تمام ملازمین نے اپنی جانوں کی پرواہ نہ کرتے ہوئے ایماندارانہ طریقے سے اپنے فرائض منصبی کو ادا کیا ہے لیکن 10 ملازمین کے تعلق سے شرد دیورے نامی ٹھیکدار خاص طور پر مسلم طبقے سے تعلق رکھنے والے ملازمین کے ساتھ ہمیشہ ہی دو رخا رویہ اختیار کرتے ہوئے فرقہ پرستی کا مظاہرہ کرتا رہا ہے جو اس کی فرقہ پرستی پر مبنی سوچ کا مظہر ہے. متاثرہ کی یہ بھی سوچ تھی شاید ایسا قدم اٹھانے سے ٹھیکدار شرد دیورے راہ راست پر آ جائے لیکن اس حادثے کو دو دن گزر جانے کے باوجود ٹھیکدار اور شہری انتظامیہ کی جانب سے بات چیت کے لئے بھی کوئی نہیں آیا. مذکورہ نوجوان بی جے پی اقلیتی مورچہ کے ریاستی سیکریٹری شیخ ابراہیم شیخ اسلم المعروف پپو ممبر کے قریبی ساتھی اور بی جے پی کا رکن ہے. انھوں نے بر وقت اکرم خان سے ملاقات کرتے ہوئے گفت و شنید کی تو معلوم ہوا کہ ملازمین مہیا کرنے والے ٹھیکدار نے طبی خدمات کے لئے 36 ملازمین مہیا کئے تھے نیز ٹھیکدار کی جانب سے ملازمین کو وقت پر تنخواہ کی ادائیگی میں ٹال مٹول کی جاتی جاتی تھی اور ٹھیکدار جانب داری و فرقہ پرستی, ذات پات پر امادہ رہتا تھا. تنخواہ کی عدم دستیابی کی وجہ سے پریشانی کے عالم میں اکرم خان نے زہریلی دوا پی کر اپنے آپ کو ختم کرنے کا انتہا قدم اٹھا لیا. بھارتیہ جنتا پارٹی کے ریاستی سیکریٹری شیخ ابراہیم نے ناسک ضلع سول سرجن اور ریاستی ذمہ داران سے شکایت کرتے ہوئے انصاف کی گہار لگائی ہے تاکہ آنے والے دنوں میں دوسرا کوئی ملازم معاشی پریشانیوں سے نبرد آزما رہتے ہوئے خودکشی پر مائل نہ ہو. شیخ ابراہیم نے ذمہ داران کو یہ بھی انتباہ دیا کہ آنے والے دنوں میں اگر کوئی ایسا ہی واقعہ رونما ہوتا ہے تو اس کی تمام تر ذمہ داریاں انتظامیہ اور ٹھیکدار پر عائد ہوگی. مالیگاؤں کا یہ سول ہاسپٹل اول دن سے ہی مریضان وقت کو پریشانیوں میں مبتلا رکھنے کی آمجگاہ بنا ہوا ہے. معمولی بیماریوں کے شکار افراد کو دھولیہ سول ہاسپٹل اور مہنگے ترین اسپتالوں میں روانہ کردیا جاتا ہے. ایسے سنگین حالات میں شہری لیڈران اور میونسپل ذمہ داران بھی خاموش تماشائی بنے ہوئے ہیں. کوئی بھی اس ہاسپٹل کے بگڑے نظام کو راہ راست پر لانے کے لئے سنجیدہ دکھائی نہیں دیتا. یہ دیکھتے ہوئے دھولیہ سول ہاپسٹل میں اپنی بے لوث خدمات کی انجام دہی کے لئے مستعد و فعال خادمان خلق اب یہ کہنے لگے ہیں کہ مالیگاؤں سرکاری اسپتال سردی زکام اور کھانسی کے مریضوں کو بھی دھولیہ اور دیگر مہنگے اسپتالوں میں روانہ کرنے کی کگار پر ہے. اس سنگین مسئلے پر شہری ذمہ داران اور میونسپل ذمہ داران کو غور و خوض کرتے ہوئے ٹھوس اقدامات کرکے اسے عملی جامہ پہنانا چاہئے تبھی اس اسپتال کے فوائد شہریاں کو مہیا ہوں گے ورنہ یہ عالیشان سرکاری اسپتال” دور کے ڈھول سہانے ” کے مصداق نااہل و ناکارہ ثابت ہوتا رہے گا.