ممبئی : مہاراشٹر سماجوادی پارٹی لیڈر و رکن اسمبلی ابوعاصم اعظمی نے آپریشن سندور کی کامیابی پراظہار مسرت کرتے ہوئے کہا کہ پاکستانی دہشت گردوں کے اڈوں پر فضائی حملہ کر کے ہندوستانی سرکار نے ایک اہم پیغام دیا ہے۔ اور یہ واضح کیا ہے کہ ہم دہشت گردوں کے خلاف سخت کارروائی کرتے ہیں۔ آپریشن سندور کی کامیابی پر ہم مسلح افواج کو مبارکباد پیش کرتے ہیں۔ لیکن ساتھ ہی یہ بھی کہتے ہیں کہ دہشت گردوں کا کوئی مذہب نہیں ہوتا اور جس طرح سے پہلگام حملہ کے بعد کشمیریوں کو تشدد کا نشانہ بنایا گیا وہ سراسر غلط ہے۔ انہوں نے کہا کہ دہشت گردانہ حملہ کے بعد کشمیریوں نے سیاحوں کی جو مہمان نوازی کی وہ عیاں ہے, عادل نے اپنی جان کی قربانی دیدی نزاکت نے جو حسن سلوک کیا اس کے باوجود فرقہ پرست پہلگام حملہ کی آڑ میں کشمیریوں کو نشانہ بنا رہے ہیں۔ انہوں نے کہا کہ پہلگام حملہ کے بعد مغربی بنگال میں ایک ڈاکٹر نے حاملہ خاتون کا علاج کرنے سے انکار کر دیا تھا۔ پاکستان زندہ باد کا نعرہ فرقہ پرست لگاتے ہیں, اور اس میں مسلمانوں کو پھنسایا جاتا ہے یہ بات آگرہ میں ثابت ہوئی ہے, انہوں نے کہا کہ ایسے فرقہ پرستوں پر کارروائی بھی ضروری ہے جو مسلمانوں کو نشانہ بناتے ہیں۔ ابوعاصم اعظمی نے وزیر اعظم نریندر مودی اور امیت شاہ سے اپیل کی ہے کہ وہ ایسے عناصر پر کارروائی کرے, جو ملک کا امن وامان خراب کرتے ہیں۔ انہوں نے کہا کہ ممبئی میں ایک برقعہ پوش خاتون کو جئے شری رام کا نعرہ لگانے کیلئے مجبور کیا گیا ایسے عناصر پر کارروائی ضروری ہے, جو ملک میں ہندو مسلم کے نام پر نفرت پیدا کرتے ہیں۔

ممبئی : سیوڑی آر اے قدوائی مارگ پولیس اسٹیشن کی حدود میں جین مندر میں نقب زنی کرنے والے تین نقاب پوش لٹیروں کو پولیس نے گرفتار کرنے کا دعوی کیا ہے۔ 22 اپریل کی نصف شب 2 بجے تین نامعلوم لٹیرے جین مندر کا قفل توڑ کر داخل ہوئے, مندر میں موجود مورتی کے زیورات سونے کا ٹیکا، سونے کی کاپٹی، چاندی کا مکوٹ عطیات بکس کی رقم کل 7 لاکھ سے زائد کے زیورات اور نقدی چوری کر کے فرار ہوگئے تھے۔ چوری کے دوران نامعلوم نقب زنوں نے سی سی ٹی وی کیمرے اور ویڈیو فوٹیج کو نقصان پہنچایا تھا اور اس کے وائر بھی منقطع کر دئیے تھے, اس لئے ان کی تلاش مشکل تھی لیکن پولیس ٹیم نے یہاں علاقہ میں 29 مقامات پر تقریبا 70 سے زائد سی سی ٹی وی فوٹیج کا معائنہ کیا جس میں ان ملزمین کی شناخت ہوگئی ملزمین نے منہ پر ہاتھ رومال سے اپنا چہرہ ڈھانپ لیا تھا تاکہ اس کی شناخت نہ ہو سکے, لیکن پولیس نے ٹکنالوجی کا استعمال کرتے ہوئے تینوں چور سنیل سنگھ سورج سنگھ، راہل سنگھ پروین سنگھ،جگر دنیش سنگھ واگھیلا کو گرفتار کر لیا ملزمین کے قبضے سے مسروقہ مال اور ساز وسامان کی برآمد ہوگئی ہے۔ یہ کارروائی ممبئی پولیس کمشنر دیوین بھارتی کی سر براہی میں جوائنٹ پولیس کمشنر ستیہ نارائن چودھری اورڈی سی پی راگسودھا کی ایماء پر کی گئی ہے۔

ممبئی : اتر پردیش اور بہار کے شمالی ہندوستانیوں کے لئے ٹرین ٹکٹوں کی عدم دستیابی کے تناظر میں، سماج وادی پارٹی کے قانون ساز اسمبلی رئیس شیخ نے ہفتہ کو مطالبہ کیا کہ ریلوے ممبئی سے ان ریاستوں کے لئے خصوصی ٹرینیں چلائے۔ شیخ نے اس وقت مطالبہ کیا جب ٹرینوں کی لائنوں اورریلوے پلیٹ فارم پر عوام کی بھیڑ و عام شہری سہولیات فقدان سوشل میڈیا پرعام ہوا ۔ شمالی ہندوستانی کمیونٹی کے افراد کی ایک بڑی تعداد مناسب ٹرین خدمات کی کمی کی وجہ سے پریشان ہے۔ ‎وزیر ریلوے اشونی وشنو کو لکھے اپنے خط میں شیخ نے کہا کہ باندرہ ٹرمینس، لوک مانیا تلک ٹرمینس (ایل ٹی ٹی) اور دادر جیسے ریلوے اسٹیشنوں پر ٹکٹوں کے لیے مسافروں کا ہجوم ہے۔ شمالی ہندوستانیوں کی ایک بڑی تعداد گرمیوں کے دوران اتر پردیش اور بہار کا سفر کرتی ہے، جو شادیوں کے موسم کے ساتھ موافق ہوتا ہے۔ کافی ٹرینوں کی کمی اور اس کے نتیجے میں زیادہ بھیڑ ممبئی میں شمالی ہندوستانی برادری کو سخت مشکلات کا سامنا ہے۔

ایم ایل اے رئیس شیخ نے کہا کہ انہوں نے مطالبہ کیا کہ ریلوے فوری طور پر ممبئی سے گورکھپور، پٹنہ اور پوروانچل کے دیگر مقامات کے لیے خصوصی ٹرینیں چلائے، جو باندرہ، ایل ٹی ٹی اور سی ایس ٹی اسٹیشنوں سے روانہ ہو ۔شیخ نے مزید کہا، “ریلوے کو بھیڑ کو منظم کرنے اور مسافروں کی مدد کے لیے ممبئی کے بڑے اسٹیشنوں پر مناسب ہیلپ ڈیسک اور جی آر پی امدادی بوتھ بھی قائم کرنے چاہئے۔ انہوں نے رش کو ایڈجسٹ کرنے کے لیے یوپی جانے والی تمام ٹرینوں میں اضافی جنرل اور سلیپر کوچز شامل کرنے کی ضرورت پر مزید زور دیا۔ انہوں نے ریلوے پر بھی زور دیا کہ وہ متعلقہ حکام کے ساتھ بہتر تال میل کو یقینی بنانے کے لیے تمام ضروری اقدامات کرے۔