(وفا ناہید)
کسی کا مرڈر کرنا آج کل بہت آسان ہوگیا ہے. ذرا ذرا سی بات ہر مشتعل ہوکر لوگ کسی کی زندگی کا چراغ گل کر دیتے ہیں. دینی شہر مالیگاؤں میں بھی اب کسی کا مرڈر کرنا ایک دم آسان ہوگیا ہے. ذرائع سے موصولہ اطلاعات کے مطابق کل رات 11بج کر 20 منٹ پر پوار واڑی پولس اسٹیشن کی حد میں زیتون حجن مسجد کے پیچھے گلشن مدینہ گلی نمبر 4, میں گھر نمبر 1034 کمال پورہ, حافظ شیرا علی چوک کا ساکن 40 سالہ شاہداحمد محمد سلیم المعروف راجو بانگڑو دادا کے مرڈر سے پورے علاقے میں سنسنی پھیل گئی ہے. اس ضمن میں جب نمائندے نے راجو بانگڑو کے اہل خانہ سے رابطہ قائم کرنے کی کوشش کی تو پتہ چلا کہ راجو بانگڑو کے والدین کافی ضعیف ہے. نوجوان بیٹے کے قتل کی خبر سن کر بوڑھے باپ کے کندھے جھک گئے. راجو بانگڑو کی والدہ بیٹے کی مرگ ناگہانی سے نڈھال ہے . مقتول کا بھائی اس صدمے کو برداشت نہیں کرپارہا ہے اور بار بار بے ہوش ہو رہا ہے تو دوسری طرف مقتول کی بیوی اپنے شوہر کی اچانک موت کی وجہ سے غموں سے چور ہے. اس کی آنکھوں کے سوتے خشک ہونے کا نام نہیں لے رہے ہیں. راجو بانگڑو کے چھوٹے چھوٹے معصوم بچے یہ سمجھنے سے قاصر ہے کہ گھر میں یہ کہرام کیوں مچا ہوا ہے. معصوم بچے اپنے باپ کی راہ تک رہے ہیں. اس غم زدہ ماحول میں نمائندے کو کوئی بھی کچھ بتانے سے قاصر تھا. تب پوار واڑی پولس اسٹیشن کے پی آئی گلاب راؤ پاٹل سے رابطہ کیا گیا تو موصوف نے اس قتل کے رازسے پردہ اٹھایا. پی آئی پاٹل صاحب نے بتایا کہ شاہد عرف راجو بانگڑو پہلے سے شادی شدہ تھا. 2 سال قبل اس نے مالدہ شیوار کے گلشن مدینہ گٹ نمبر 41 گھر نمبر 46 کے ساکن اخلاق احمد کی صاحبزادی سے نکاح ثانی کیا. شادی تو کافی ارمانوں سے ہوئی مگر راجو بانگڑو کو یہ دوسری شادی راس نہیں آئی. کچھ ہی دنوں میں میاں بیوی کے اختلافات منظر عام پر آنے لگے . کسی طرح کچھ دنوں تک ان کی شادی شدہ زندگی کی گاڑی ڈگمگاتی ,لڑکھڑاتی چلتی رہی. آخر ایک دن اس رشتے کا دی اینڈ ہوگیا. راجو بانگڑو نے اپنی دوسری بیوی کو طلاق دے دی. دوسری بیوی سے مقتول کو ایک بچہ بھی ہوا مگر وہ بدنصیب بچہ اپنے والدین کے درمیان کی خلیج کو پاٹ نہیں سکا. غصے میں راجو بانگڑو نے 6 ماہ قبل اپنے سسر کے آٹو رکشے میں آگ لگادی تھی. گذشتہ دنوں عیدالفطر پر راجو بانگڑو کو بیٹے کی یاد آئی. باپ کی شفقت کو راجو بانگڑو دبا نہیں پایا اور بروز بدھ مورخہ 27 مئی کو اپنے بچے کے لئے کپڑے لے کر اس سے ملنے اپنی سابقہ بیوی کے گھر پہنچ گیا. اب ایسا ہوگیا کہ راجو بانگڑو کو اس کے سالے سعود مشیر اخلاق احمد نے روک دیا. اخلاق احمد کا کہنا تھا کہ راجو بانگڑو اس سے قبل اس کے والد کی آٹو رکشا جلا چکا ہے. اس لئے اب اسے یہاں نہیں آنا چاہئے. جس پر دونوں میں تکرار ہوئی . بہن کے طلاق سے سعود مشیر , راجو بانگڑو سے دل میں بغض رکھے ہوئے تھا. جب قاتل اور مقتول میں تکرار ہونے لگی تو سعود مشیر نے پہلے راجو بانگڑو کی آنکھوں میں لال مرچ ہاؤڈر ڈال کر اسے بے بس کیا . اس کے بعد تیز دھار ہتھیار سے اس کا گلا کاٹ دیا. خون میں لت پت راجو بانگڑو کٹے ہوئے شہتیر کی طرح زمین بوس ہوگیا. راجو بانگڑو کے قتل کی اطلاع ملتے ہی پورے علاقے میں کہرام مچ گیا. فورا پوار واڑی ہولس کے پی آئی گلاب راؤ پاٹل اپنے پولس عملے کے ساتھ پہنچ گئے. لاش کا پنچ نامہ کرکے اسے دھولیہ سول ہاسپٹل بھیج دیا. کورونا وائرس کی وجہ سے مقتول کا سویپ نمونہ لیا گیا ہے. رپورٹ آنے کے بعد ہی فیصلہ کیا جائے گا کہ آیا پوسٹ مارٹم کرنا ہے یا نہیں. کیونکہ اگر کورونا ہوزیٹیو آتا ہے تو پوسٹ مارٹم نہیں ہوگا اور لاش کی تدفین سویپ رپورٹ آنے کے بعد ہی عمل میں آئے گی. پوار واڑی پولس نے گناہ رجسٹر نمبر 53/2020 تعزیرات ہند کی دفعہ 302 کے تحت سعود مشیر کے خلاف قتل کا مقدمہ درج کرلیا ہے. راجو بانگڑو قتل کی تحقیقات پوار واڑی پولس اسٹیشن کے پی آئی گلاب راؤ پاٹل کررہے ہیں.