قومی شہریت قانون، قومی شہری رجسٹر اور قومی آبادی رجسٹر کے خلاف جامعہ ملیہ اسلامیہ میں ہونے والے مظاہرے اور پولیس کا لائبریری میں گھس کے کی گئی وحشیانہ کارروائی کے خلاف 16دسمبر سے جامعہ کے گیٹ نمبر سات پر مسلسل مظاہرہ جاری ہے جو تقریباً چھ بجے ختم ہوجاتا ہے لیکن کچھ طلبہ اور طالبات ایسے ہیں جو اس کے بعد سے رات کے چار بجے تک ترنگا لپیٹے‘، آئین کی تمہید اور تختی اٹھائے احتجاج کرتے ہیں۔
اس طرح کے احتجاج کرنے والے وہ طلبہ و طالبات ہیں جن لوگوں کو جامعہ کی لائبریری میں گھس کر پولیس نے زدوکوب کا نشانہ بنایا اور پولیس نے ہاٹھ اٹھاکر ایک مجرم کی طرح ان طلبہ کی پریڈ کروائی تھی۔ان طلبہ میں سے رضی انور‘ صادق خاں،ساجد اور فراز نے بتایا کہ ہم لوگوں نے اس پولیس کارروائی کے خلاف شکایت کی تھی لیکن کوئی کارروائی نہ ہونے پر ہم لوگوں 17دسمبر سے مسلسل چھ بجے سے رات کے چار پانچ بجے تک ترنگا لپیٹے، آئین کی تمہید لئے اور آئین کی حمایت میں تختی لئے کھڑے ہوتے ہیں۔
یو این آئی اردو سروس جب ان سے اس سخت سردی اور رات کے کڑاکے کی ٹھنڈ میں کھڑے ہوکر احتجاج کرنے کی وجہ سے پوچھے جانے پر کہاکہ جب اسٹیٹ پر تشدد پر اتر آئے اور آئین کے خلاف کام کرنے لگے تو عوام کو احتجاج کے لئے سڑکوں پر اترنا ہی ہوتا ہے۔ جمہوریت ہمیں احتجاج کرنا سکھاتی ہے اور اپنے حقوق اور خاص طور پر آئین کی حفاظت کے لئے ہر شہری کو سڑکوں پر اترنا چاہئے اور حکومت کو مجبور کرناچاہئے کہ وہ کوئی ایسا غیر آئینی کام نہ کرے۔
انہوں نے جامعہ ملیہ اسلامیہ کی لائبریر اور لڑکیوں کے ہاسٹل پر پولیس کے حملے کو ہندوستان کی سیاہ ترین باب قرار دیتے ہوئے کہاکہ دنیاکی کسی یونیورسٹی اس طرح کا حملہ نہیں ہوا ہے اور پولیس نے کسی طرح کی بربریت لائبریری میں گھس کر نہیں کی تھی۔انہوں نے کہاکہ حکومت نہ صرف غیر آئینی کام کر رہی ہے بلکہ غیر قانونی زبان اوردنگائیوں کی زبان استعمال کر رہی ہے۔
واضح رہے کہ جامعہ ملیہ اسلامیہ اور علی گڑھ مسلم یونیورسٹی میں پولیس کی وحشیانہ کارروائی کے خلاف جامعہ اور شاہین باغ کے علاوہ ملک کے دیگر حصے میں احتجاج جاری ہے۔
شاہین مظاہرین کا نظام دیکھنے والوں میں سے ایک محترمہ صائمہ خاں نے بتایا کہ جواہر لال نہرو یونیورسٹی، جامعہ ملیہ اسلامیہ، دہلی یونیورسٹی کے طلبہ سمیت مختلف یونیورسٹیوں کے طلبہ نے اس مظاہرہ میں شریک ہوکر خواتین کا حوصلہ بڑھارہے ہیں۔ انہوں نے کہا کہ زبردست سردی کے موسم میں خواتین کا کہنا ہے کہ حکومت کو ہم بتانا چاہتے ہیں کہ اس کا قدم کس قدر غلط ہے اور اس نے مذہبی بنیاد پر قانون بناکر لوگوں کو تقسیم کرنے کی کوشش کی ہے۔ ان خواتین نے کہاکہ ہم سخت ترین سردی کے موسم میں مظاہرہ کرکے یہ پیغام دینے کی کوشش کر رہے ہیں کہ حکومت ہمارے درد کو سمجھے۔شاہین باغ میں اتوار کو لاکھوں مرد و خواتین نے جمع ہوکر یہ دکھادیا کہ وہ لوگ کتنے متحد ہیں اور اسی کے ساتھ شاہین باغ مظاہرین اسکوائر پر پنڈتوں نے ہون، سکھوں نے کیرتن، بائبل اور قرآن کی تلاوت کرکے صلح کل کا پیغام دے رہے ہیں۔
محترمہ صائمہ خاں نے بتایا کہ اس دھرنا اور مظاہرہ میں شریک ہونے والے مقررین نے شہریت ترمیمی قانون (سی اے اے) واپس لینے اور قومی شہری رجسٹر (این آر سی) اور قومی آبادی رجسٹر (این آر پی) کا بائیکاٹ کی اپیل کرتے ہوئے کہاکہ اس کا مقصد ملک کو تقسیم کی جانب دھکیلنا ہے۔ یہ قانون نہ صرف آئین کے خلاف ہے بلکہ ملک کی سیکولر اقدار و روایات کے بھی خلاف ہے۔انہوں نے کہاکہ اس کے علاوہ شاہین باغ میں پورے ہندوستان کا سنگم نظر آئے گا۔
انہوں نے بتایا کہ شاہین باغ مظاہرین کی حمایت میں ہون بھی کیا گیا اور مسلم خواتین نے ٹیکے بھی لگائے۔ یہ اس بات ثبوت ہے کہ اس مظاہرہ میں صرف ایک فرقہ کے لوگ نہیں بلکہ ہندو، مسلم، سکھ اور عیسائی سب شامل ہیں۔ بڑی تعداد میں لوگ آکر شاہین باغ خواتین مظاہرین کی حمایت کررہے ہیں اور پورے ملک سے مردو خواتین آکر شاہین باغ خواتین کی حمایت کر رہے ہیں۔