ممبئی آئی آئی ٹی بامبے میں گزشتہ شب ایک دل دہلا دینے والا واقعہ سامنے آیا ہے۔ انسٹی ٹیوٹ کے ایم ای ایم ایس ڈیپارٹمنٹ میں بی ٹیک کے آخری سال میں زیر تعلیم 22 سالہ طالب علم روہت سنہا کی عمارت کی 10ویں منزل سے گر کر موت ہو گئی۔ یہ واقعہ تقریباً 2.30 بجے پیش آیا۔ ‎پولیس ذرائع سے ملی اطلاع کے مطابق روہت اچانک عمارت کی چھت سے نیچے گر گیا۔ اسے فوری طور پر شدید زخمی حالت میں ہیرانندانی اسپتال لے جایا گیا، لیکن ڈاکٹروں نے اسے مردہ قرار دے دیا۔ ‎فی الحال یہ واضح نہیں کہ یہ محض ایک حادثہ تھا یا خودکشی۔ پوائی پولیس نے اس معاملے میں اے ڈی آر (حادثاتی موت کی رپورٹ) درج کی ہے اور تحقیقات جاری ہے۔
معلومات کے مطابق جس وقت روہت نیچے گرا اس وقت وہاں ایک اور طالب علم بھی موجود تھا جو فون پر بات کر رہا تھا۔ پولیس نے واقعے سے متعلق تمام پہلوؤں سے تفتیش شروع کردی ہے۔

روہت کا کنبہ بشمول اس کی والدہ اور خاندان کے دیگر افراد آج صبح دہلی سے ممبئی پہنچے۔ بیٹے کی بے وقت موت کے بعد ماں بے چین ومغموم تھی۔ روہت دہلی کا رہنے والا تھا اور انسٹی ٹیوٹ میں ایک اچھے طالب علم کے طور پر جانا جاتا تھا۔ ‎آئی آئی ٹی بامبے کی طلبہ برادری اور فیکلٹی مایوسی میں مبتلا ہے۔ ایک طالب علم کی موت روشن مستقبل کی امید کا اچانک ختم ہونا سب کے لیے ناقابل برداشت نقصان ہے۔ ‎پوائی پولیس نے روہت کے اہل خانہ کا بیان ریکارڈ کر لیا ہے اور معاملے کی تہہ تک پہنچنے کے لیے ہر زاویے سے معاملے کی جانچ کر رہی ہے۔

ممبئی ملک میں توہین رسالت اور اسلام مخالف پروپیگنڈہ کے خلاف سماجی کارکن جمیل مرچنٹ نے اشتعال انگیز اور نفرت انگیزی کے پر ممبئی پولس میں شکایت درج کی ہے۔ اپنی تحریری شکایت میں جمیل مرچنٹ نے کہا ہے کہ پانچ یوٹیوبر اور سوشل میڈیا پر فعال سستی شہرت حاصل کر کے متنازع اور قابل اعتراض ویڈیو وائرل کر کے دو فرقوں میں نفرت پیدا کرنے کے ساتھ نظم و ضبط خراب کرنے کی سازش میں ملوث ہے۔ اس کے ساتھ ان ویڈیو سے مسلمانوں کے مذہبی جذبات مجروح ہوئے ہیں, اس میں توہین رسالت کا ارتکاب کیا گیا ہے ایسے میں ان پانچوں یوٹیوبر اور سوشل میڈیا نفرتی افراد کے خلاف کارروائی کی جائے۔

سماجی کارکن جمیل مرچنٹ نے نفرت انگیز تقاریر کے حوالے سے شکایت درج کرائی ہے۔ ابھیشیک ٹھاکر، داس چودھری، ڈاکٹر پرکاش سنگھ، گورو اور امیت سنگھ راٹھور سوشل میڈیا پر پیغمبر اسلام اور اسلام مخالف پروپیگنڈے و اشتعال انگیز بیانات دے کر سماج میں نفرت پھیلا رہے ہیں۔ ان میں سے زیادہ تر یوٹیوبرز ہیں, جو خود کو ایک مخصوص کمیونٹی کا لیڈر بتا کر مسلمانوں کو نشانہ بنا رہے ہیں۔

جمیل مرچنٹ نے اپنی شکایت میں ان افراد کی انسٹا آئی ڈی بھی شیئر کی ہیں, جو اس طرح کی تقاریر کے ذریعے دو برادریوں کے درمیان نفرت پھیلا رہے ہیں۔ شکایت میں مطالبہ کیا گیا ہے کہ ایسے لوگوں کے خلاف فوری طور پر ایف آئی آر درج کی جائے۔ مرچنٹ نے پولیس حکام کے ساتھ ساتھ ریاستی انسانی حقوق کی تنظیموں کو بھی اپنی شکایت درج کرائی ہے۔ انسٹاگرام اور یوٹیوب چلانے والے میٹا کو بھی اس بارے میں تحریری شکایت دے کر ان کی آئی ڈیز پر پابندی لگانے کو کہا گیا ہے۔ جمیل مرچنٹ اس سے قبل مہاراشٹر حکومت کے وزیر نتیش رانے کے خلاف نفرت انگیز تقاریر کے معاملہ میں کارروائی کیلئے سپریم کورٹ میں اپیل کی تھی اور اشتعال انگیز تقاریر کے معاملہ میں جمیل مرچنٹ نے عرضی داخل کی تھی۔ اس پر عدالت عالیہ نے سخت احکامات بھی جاری کیا تھا اور اشتعال انگیز تقاریر پر پابندی عائد کرنے کے لئے اداروں اور سرکاروں کو ایسے عناصر پر سخت کارروائی کا حکم بھی جاری کیا تھا جو نفرت انگیزی کا مظاہرہ کرکے ماحول خراب کرنے کی کوشش کرتے ہیں اور ایک طبقہ کو نشانہ بناتے ہیں۔ جمیل مرچنٹ ان پانچ عرضی گزاروں میں سے ایک ہیں جنہوں نے وقف بورڈ ترمیمی ایکٹ کو لے کر سپریم کورٹ میں عرضی داخل کی تھی، جس پر فیصلہ ابھی باقی ہے۔

پونے/کولہاپور : عدالت کے حکم پر ‘مہادیوی’ ہاتھی کو مہاراشٹر کے کولہاپور ضلع کے نندنی مٹھ سے گجرات کے جام نگر کے ونتارا بھیج دیا گیا۔ اب مہادیوی کو مہاراشٹر سے گجرات بھیجے جانے کے خلاف لوگ ناراض ہو گئے ہیں۔ اس کی وجہ سے کولہاپور کے 700 سے زیادہ گاؤں میں لوگوں نے ریلائنس کی خدمات کا بائیکاٹ کرنا شروع کر دیا ہے۔ مقامی میڈیا رپورٹس میں کہا گیا ہے کہ لوگ اس فیصلے سے ناخوش ہیں۔ جذباتی طور پر وہ جیو سم کارڈ پورٹ کرکے اس فیصلے کے خلاف احتجاج کررہے ہیں۔ اطلاعات کے مطابق ونتارا کے سی ای او بھی صورتحال کا جائزہ لینے کولہاپور پہنچے۔ 28 جولائی کو جب مہادیوی ہاتھی کو نندنی مٹھ سے ونتارا لے جایا گیا تو لوگوں کی بڑی بھیڑ جمع ہوگئی۔ نندنی مٹھ پر لوگوں کا گہرا اعتماد ہے۔ یہ خانقاہ 1200 سال سے زیادہ پرانی ہے۔

جنگلی حیات کی دیکھ بھال کے لیے صنعت کار مکیش امبانی کے بیٹے اننت امبانی نے جام نگر میں ریلائنس فاؤنڈیشن کے تحت عالمی معیار کی سہولیات کے ساتھ ونتارا قائم کیا ہے، لیکن یہاں کے لوگ کولہاپور ضلع میں نندنی مٹھ کی مشہور مہادیوی ہاتھی پر خاص اعتماد رکھتے ہیں۔ یہ ہاتھی گزشتہ 33 سالوں سے نندنی مٹھ میں منعقد ہونے والے مذہبی پروگراموں کا ایک لازمی حصہ ہے۔ مہاراشٹر کے وزیر پرکاش ابیتکر نے کہا کہ کولہاپور میں آج ایک میٹنگ میں ونتارا کے عہدیداروں نے یقین دلایا کہ وہ مہادیوی کو کولہاپور ضلع کے نندنی واپس لانے کی کوششوں میں تعاون کریں گے۔ لوگوں کا کہنا ہے کہ وہ مہادیوی ہاتھی کو یاد کر رہے ہیں۔

جانوروں کے حقوق کی تنظیموں، خاص طور پر پیٹا، محکمہ ماحولیات اور جنگلات اور بعد میں بامبے ہائی کورٹ اور سپریم کورٹ کی شکایات کے بعد، ہاتھی کو گجرات کے ونتارا منتقل کرنے کا فیصلہ کیا گیا۔ عدالتی حکم کا احترام کرتے ہوئے، ہیڈ پجاری اور گاؤں والوں نے آخر کار ہاتھی کو دل سے الوداع کر دیا، لیکن اب وہ مہادیوی کو یاد کر رہے ہیں۔ اب وہ مہادیوی کو واپس نندنی مٹھ بھیجنے کا مطالبہ کر رہے ہیں۔ گاؤں والوں نے ریلائنس گروپ پر ان کے پیارے ہاتھی کو یہاں سے لے جانے کا الزام لگایا ہے۔ لوگ مطالبہ کر رہے ہیں کہ امبانی کو ان کا مہادیوی ہاتھی جلد واپس کرنا چاہیے۔ مہاراشٹر حکومت کے ایک وزیر پرکاشراؤ ابیتکر نے لوگوں کو ان کی واپسی میں مدد کی یقین دہانی کرائی ہے۔ شیوسینا لیڈر ابیتکر کولہاپور ضلع کے ایک اسمبلی حلقے سے ایم ایل اے ہیں۔