(خیال اثر)
شب و روز لوہے سے نبرد آزما مالیگاوں ان دنوں تھم سا گیا ہے. کرونا وائرس نے اس شہر حسیں کی ساری رونقیں چھین لی ہیں. لاک ڈاون نے گلیوں کو سونا اور سڑکوں کو سنسان کرکے رکھ دیا ہے. مرد و خواتین کے چہروں پر اداسیوں کا پہرہ ہے تو بچوں کی آنکھوں میں سوالات کا ہجوم ہے کہ اب کیا ہوگا. کہنا یہ چاہئے کہ اس درجہ تفرک نے جمع رکھا ہے ڈیرہ گھر میں بچے بھی اب پہلے سی شرارت نہیں کرتے
شب و روز لوہے سے لڑنے والا یہ شہر حسیں 2001 کے خونی و المناک فساد کے بعد 2006 اور 2008 میں ہونے والے بم دھماکوں کے غمناک حصار سے نکلنے بھی نہیں پایا تھا کہ آج لاک ڈاون کی مصیبت سے نبرد آزما ہے. ارباب سیاست و حکومت کی عدم توجہی اس شہر کی ساری رونق کو گہن آلود کرنے کے در پے ہے. کہنا چاہئے کہ ساز دل خاموش ہوا ہے. ہر حساس دل یہ کہنے پر مجبور ہے کہ دل تو اپنا اداس ہے ناصر شہر کیوں سائیں سائیں کرتا ہے-
شہر کا سارا کاروبار منجمد ہو کر رہ گیا ہے تو مزدور طبقہ بھکمری کے دہانوں پر پہنچ چکا ہے. شہر کے بے شمار مخیر حضرات اور ادارے حسب استطاعت سلم و مضافاتی علاقوں میں ریلیف کی تقسیم کاری کررہے ہیں لیکن چونکہ ان کے پاس کوئی منظم پروگرام یا ترتیب نہیں ہے اس لئے وہ طبقہ جو اپنے انا و خوداری کو کھونا نہیں چاہتا حد درجہ پریشان ہے. یہ وہ طبقہ ہے کہ جو سڑکوں, چوک چوراہوں پر آ کر ہاتھ پھیلانا پسند نہیں کرتا ان کے درد کا درماں کسی صاحب ثروت کے پاس نہیں. شہر کے مخیر حضرات اور متعبر علمائے کرام کو چاہئے کہ وہ مل بیٹھ کر ایسا کوئی پروگرام ترتیب دیں کہ شہر میں ایک معاشرے کی تشکیل ہو جائے. ان ساری باتوں سے پرے پولیس محکمہ بھی لاک ڈاون کو لے کر سنجیدگی کی بجائے بے رحمی کا مظاہرہ کررہا ہے. اپنی ضروریات کی تکمیل کے لئے سڑکوں, گلیوں, چوک چوراہوں پر نکلنے والے افراد کی بے دردی سے پٹائی کسی دن کسی بڑے ہنگامے کا سبب بن سکتی ہے اس لئے محکمہ پولیس کو چاہئے کہ سنجیدگی کا مظاہرہ کرتے ہوئے کچھ سجھوتا کر لے. گزشتہ دنوں ضلع ایس پی شریمتی ڈاکٹر آرتی سنگھ نے 2006 بڑا قبرستان و مشاورت چوک بم دھماکوں کی برسی کے تناظر میں مالیگاوں کا دورہ کیا اور شہریان سے گزارش کی کہ شب برات کا موقعہ اور بم دھماکوں کی برسی کے پیش نظر قبرستان یا چوک چوراہوں پر جمع نہ ہوں جس سے لاء اینڈ آرڈر میں کوئی پریشانی کا سامنا کرنا پڑے.
اب دیکھنا یہ ہے کہ بم بلاسٹ کا سانحہ جھیلنے والا مالیگاوں لاک ڈاون کے عمل سے گزرتے ہوئے کس طرح اپنے آپ کو سنبھالے رکھتا ہے کیونکہ 2006 اور 2008 بم دھماکوں کے بعد یہ پہلی برسی ہوگی جس میں بم دھماکوں کے شہیدان کی قبروں پر ان کے اہل خانہ نہیں پہنچ سکیں گے. اس تناظر میں کل جماعتی تنظیم اور ساتھی نہال احمد کے ذریعے بنائی گئی ندھرمی سنگھٹنا کا رول رہتا ہے یا یہ شہریان کو کیا پیغام دینا چاہتے ہیں اس کی وضاحت نہیں ہو پائی ہے حالانکہ قبرستان کے ٹرسٹٹان نے اپنے بیان سے واضح کردیا ہے کہ شب برات کے موقع پر اہالیان شہر اپنے اہل خانہ کی قبروں کی زیارت یا دعا اور نماز کے لئے قبرستان کی جانب رخ نہ کریں. ٹرسٹٹان کے پیش نظر یہ اعلان اور فیصلہ بروقت اور صحیح بھی ہے کیونکہ شب برات کے موقع پر قبرستان میں لاکھوں کا مجمع ہو جاتا ہے. راستے چوک چوراہے محدود ہو جاتے ہیں جس کی وجہ سے لاک ڈاون کا مسئلہ ہی فوت ہو جاتا ہے. کرونا وائرس جیسی خطرناک اور جان لیوا بیماری کو شکست دینے کے لئے شہریان کا بھی اخلاقی فریضہ ہے کہ وہ لاک ڈاون کے پیش نظر خود کو بھی بچائیں اور اپنے اہل خانہ کے علاوہ پورے شہر کو اس خطرناک وباء سے بچانے کی سعی میں سختی سے کاربند رہیں کیونکہ اس موقع پر ذرا سی غلطی بڑی تباہی کا پیش خیمہ ہو سکتی ہے.