ممبئی : مانخورد۔شیواجی نگر کے ایم ایل اے کو بابائے قوم مہاتما جیوتی راؤ پھولے کی دو صد سالہ پیدائش کے موقع پر منعقدہ مہاتما پھولے سمان تقریبمیں باوقار “جیون گورو ایوارڈ” سے نوازا گیا۔ یہ اعزاز انہیں سماجی انصاف، اور سماجی خدمت کے میدان میں ان کی مسلسل خدمات پر تفویض کیا گیا۔ ایوارڈ کو قبول کرتے ہوئے ایم ایل اے نے کہا کہ یہ اعزاز ان کے لیے ایک بڑی ذمہ داری کے ساتھ ساتھ باعث افتخار بھی ہے۔ بابائے قوم مہاتما جیوتی راؤ پھولے کی پیدائش دو صد سالہ مہوتسو کمیٹی سے اظہار تشکر کرتے ہوئے، انہوں نے کہا، “میں کمیٹی کا تہہ دل سے شکر گزار ہوں کہ انہوں نے مجھے اس اعزاز کے قابل سمجھا۔ میں دل سے کپل پاٹل جی،دنیشور مہاراؤ جی، ڈاکٹر ظہیر قاضی ، کپل پاٹل جی کا شکریہ ادا کرتا ہوں۔ ابرہانی صاحب اور اس تنظیم سے وابستہ تمام معزز ممبران کا بھی مشکور ہوں ۔ سماجی انصاف اور پھولے امبیڈکری نظریہ سے وابستگی مہاتما جیوتی راؤ پھولے، کرانتی جیوتی ساوتری بائی پھولے اور فاطمہ شیخ کے اپنے اسمبلی حلقہ مانخوردشیواجی نگر میں عظیم الشان حصارکی تخلیق کا حوالہ دیتے ہوئے، انہوں نے کہا کہ یہ ان کے عظیم نظریات کو عوام تک پہنچانے کی ایک عاجزانہ کوشش ہے۔ انہوں نے کہا کہ ہم سماجی انصاف، مساوات،اور بھائی چارے کے راستے پر چلتے ہوئے، پسماندہ اور کمزور طبقات کے حقوق اور انصاف کی جنگ لڑ رہے ہیں، ہم ان کے نظریے کو اپنا رہنما سمجھ کر معاشرے کی خدمت کرتے رہیں گے۔

فرقہ وارانہ ہم آہنگی پر زور دیا۔ اس وقت سماج میں نفرت پھیلانے کی کوششوں پر تشویش کا اظہار کرتے ہوئے انہوں نے کہا کہ “ایسے مشکل وقت میں ہمیں مہاتما پھولے جی کے دکھائے گئے ہندو مسلم اتحاد، باہمی بھائی چارے اور انسانیت کے راستے پر چلتے ہوئے ملک کو مضبوط کرنا ہے، یہی ان کی جدوجہد اور نظریات کو حقیقی خراج عقیدت ہوگا۔” انہوں نے واضح کیا کہ یہ ایوارڈ ان کے لیے صرف ایک اعزاز نہیں ہے بلکہ عوامی خدمت اور سماجی ہم آہنگی کے لیے مزید لگن کے ساتھ کام کرنے کی تحریک ہے۔ یہ بات قابل غور ہے کہ اس پروقار تقریب میں صحافت، ادب، نظریاتی، تعلیمی اور سماجی شعبوں میں بہترین خدمات انجام دینے والی دیگر شخصیات کو بھی اعزاز سے نوازا گیا۔ ایم ایل اے نے تمام معززین کو دل کی گہرائیوں سے مبارکباد اور نیک خواہشات کا اظہار کیا۔

ممبئی گستاخ رسول نازیہ الہی خان اور اس کا انٹرویو نشر کرنے کیلئے اپنا پلیٹ فارمز فراہم کرنے والی دیواسنگھ کے خلاف ممبئی پولس نے پہلا کیس درج کیا ہے پائیدھونی پولس میں دونوں ملزمہ کے خلاف مذہبی جذبات مجروح کرنے اور اشتعال انگیزی کا مظاہرہ کرنے کا کیس درج کر لیا ہے ممبئی میں دونوں کے خلاف ایف آئی آر درج کرنے کا مطالبہ رضا اکیڈمی کے سربراہ سعید نوری ، مولانا اعجاز کشمیری نے کیا تھا ایڈوکیٹ عرفان شیخ کی شکایت پر پولس نے یہ کیس درج کیا ہے اس میں عرفان شیخ نے بتایا کہ انہوں نے ایک انسٹاگرام اکاؤنٹ پر توہین رسالت کا ارتکاب کرتے ہوئے ناز یہ الٰہی اور اس کی میزبان دیوا سنگھ کو پایا جس کے سبب میرا اور مسلمانوں کا جذبات مجروح ہوا اس سلسلے میں ہم نے پولس کو نازیہ الٰہی سے متعلق تمام دستاویزات بھی پیش کئے ہیں جس میں الیکٹرانک ثبوت بھی ہیں اس معاملہ میں پائیدھونی پولس نے کیس درج کر لیا ہے اس معاملہ میں اس سے قبل ممبئی پولس کمشنر دیوین بھارتی نے علما کرام کو یقین دلایا تھا کہ ۴۸ گھنٹے میں ایف آئی آر درج کرلی جائے گی دیوین بھارتی نے اپنا وعدہ وفا کرتے ہوئے پولس کو ایف آئی آر درج کرنے کی ہدایت جاری کی جس کے بعد ایف آئی آر درج کر لی گئی ہے اس لئے علما کرام نے مسلمانوں سے اپیل کی ہے کہ وہ صبر و ضبط کا مظاہرہ کرے اور اشتعال انگیزی سے گریز کرے کیونکہ قانونی طریقے سے نازیہ الٰہی پرکارروائی جاری ہے ممبئی میں ایف آئی آر کے اندراج کے بعد اسے صفر نمبر سے دلی اور کولکاتا پولس کے سپرد کردیا گیا ہے جو اس معاملہ کی تفتیش کرے گی فی الوقت مسلمانوں کے جذبات کی قدر کرتے ہوئے ممبئی پولس نے ایف آئی آر درج کر کے حالات کو پرامن بنایا ہے ۔

ممبئی: مدھیہ پردیش ہائی کورٹ میں زیرِ سماعت بوج شالہ۔ کمال مولا مسجد مقدمے کے تناظر میں سرحدی گاندھی میموریل سوسائٹی کے زیرِ اہتمام ممبئی کے تاریخی اسلام جمخانہ، میرین لائنز میں ایک اہم عوامی اجلاس منعقد کیا گیا۔ اس پروگرام کا عنوان “عبادت گاہوں کی قسمت ایکٹ, 1991” رکھا گیا تھا، جس میں ملک کے نامور قانون دانوں، مؤرخین، ماہرینِ تعلیم اور سماجی دانشوروں نے شرکت کرکے اپنے خیالات کا اظہار کیا۔

اس اہم اجلاس کی صدارت معروف مؤرخ، مصنف اور سماجی مفکر پروفیسر ڈاکٹر رام پونیا نی نے کی، جبکہ پٹنہ ہائی کورٹ کے سابق چیف جسٹس، جسٹس (ریٹائرڈ) اقبال احمد انصاری مہمانِ خصوصی کی حیثیت سے موجود رہے۔ اجلاس میں معروف مؤرخ پروفیسر حسنین رضوی، سینئر ایڈوکیٹ مہیر دیسائی، سپریم کورٹ کے وکیل ایڈوکیٹ زیڈ کے فیضان، فادر فریزر مسکارینہاس (سینٹ زیویئرز کالج)، درگاہ اجمیر شریف کے سجادہ نشین سید سرور چشتی، مولانا زاہد رضا رضوی اور ٹائمز آف انڈیا کے سینئر اسسٹنٹ ایڈیٹر محمد وجیہ الدین سمیت متعدد اہم شخصیات نے خطاب کیا۔

اپنے خطاب میں جسٹس (ریٹائرڈ) اقبال احمد انصاری نے ہندوستانی دستور کی روح، عدالتی توازن اور ملک میں سماجی ہم آہنگی برقرار رکھنے کی ضرورت پر تفصیلی روشنی ڈالی۔ جبکہ پروفیسر حسنین رضوی نے تاریخی حقائق اور ہندوستان کی مشترکہ تہذیبی وراثت کی اہمیت کو اجاگر کیا۔ فادر فریزر مسکارینہاس نے مختلف مذاہب اور طبقات کے درمیان مکالمہ، بھائی چارہ اور باہمی احترام کو فروغ دینے کا پیغام دیا۔ مقررین نے کہا کہ قانونِ عبادت گاہ 1991 مذہبی مقامات کی تاریخی حیثیت کو برقرار رکھنے اور ملک میں امن و سکون قائم رکھنے میں نہایت اہم کردار ادا کرتا ہے۔

مقررین نے اس بات پر زور دیا کہ ہندوستان کی اصل شناخت اس کی کثرت میں وحدت، رواداری، گنگا جمنی تہذیب اور مشترکہ ورثے میں پوشیدہ ہے، اور اس ورثے کا تحفظ ہر ہندوستانی کی مشترکہ ذمہ داری ہے۔ پروگرام کا آغاز ایڈوکیٹ سید جلال الدین، قومی صدر سرحدی گاندھی میموریل سوسائٹی کے استقبالیہ خطاب سے ہوا۔ اس کامیاب پروگرام کے انعقاد میں سلطان ملدار (صدر مہاراشٹر) اور ارشد امیر (صدر ممبئی) کی خصوصی کاوشیں قابلِ ستائش رہیں۔ اس موقع پر معروف سماجی کارکن غفار خان صاحب، ایڈیٹر ظفر صدیقی، عثمان خان لالہ سمیت شہر کی ممتاز سماجی، تعلیمی، مذہبی، سیاسی اور تجارتی شخصیات کے علاوہ مختلف سماجی تنظیموں کے ذمہ داران اور عوام کی بڑی تعداد موجود تھی۔ اجلاس کے اختتام پر ملک میں امن، بھائی چارے، اتحاد، سماجی یکجہتی اور دستوری اقدار کو مزید مضبوط بنانے کے عزم کا اظہار کیا گیا۔