خیال اثر مالیگانوی
مہاراشٹر میں کورونا متاثرین کے علاج و معالجہ کے لئے بنائے گئے انتہائی نگہداشت والے کوویڈ سینٹروں میں خواتین کے ساتھ چھیڑ چھاڑ اور آبروریزی کے واقعات میں روز بروز اضافے کی خبریں منظر عام پر آرہی ہیں. مذکورہ واقعات میں کوویڈ سینٹروں میں تعینات ملازمین ہی سامنے آرہے ہیں. 12 پازیٹو خواتین کے ساتھ چھیڑ چھاڑ اور 2 پازیٹو مریضہ کی عصمت ریزی نے حفاظتی دستے پر بہت سے سوال اٹھا دیئے ہیں.
مانخورد, پنویل, نیو ممبئی, کولہا پور, پونہ سمیت دیگر شہروں میں کوویڈ سینٹروں میں زیر علاج خواتین سے چھیڑ چھاڑ اور عصمت دری کے واقعات روشنی میں آنے سے خواتین میں خوف و دہشت کا ماحول ہے. ایک معاملہ پنویل کے کوویڈ سینٹر میں پیش آیا جہاں 40 سالہ پازیٹو مریضہ کی عصمت وہاں کے صفائی ملازم نے تار تار کر دی. صفائی ملازم جانچ کے لئے نقلی ڈاکٹر کا روپ دھار کر مریضہ کے پاس پہنچا. مریضہ نے جب بدن میں درد کی شکایت کی شکایت کی تو اس جعلی ڈاکٹر نے مریضہ کو یہ کہہ کر کپڑے اتارنے کے لئے کہا کہ بدن کا مساج کرنا ضروری ہے اور پھر اس نے مریضہ کا منہ دبا کر عصمت ریزی کی . یہ واقعہ کوویڈ سینٹر کے پانچویں منزلے پر پیش آیا تھا. پولیس نے ملزم کے خلاف 376,354 کے تحت معاملہ درج کیا ہے. اسی طرح کا ایک واقعہ کولہا پور کے شیوا جی ودھیا پیٹھ انسی ٹیوٹ میں بنے کوویڈ سینٹر کے 13ویں منزلے پر رونما ہوا جہاں پر نابالغ مریضہ کو اپنی درندگی کا شکار بنایا گیا. متاثرہ کے شور و غل مچانے پر عیادت کے لئے آنے والے افراد نے ملزم کو زد و کوب کرتے ہوئے پولیس کے حوالے کیا.
اسی طرح مانخورد پولیس نے کوویڈ سینٹر میں زیر علاج 17 سالہ لڑکی سے دست درازی کے الزام میں 20 سالہ نوجوان کو گرفتار کیا ہے. پولیس کے مطابق متاثرہ لڑکی مذکورہ سینٹر میں داخل ہے اور ملزم دیپیش سالوی شب میں 3 بجے کے قریب بلڈنگ کی 13ویں منزل پر واقع کمرے میں پہنچا اور روم صاف کرنے کا جھانسہ دے اندر داخل ہوگیا. روم میں داخل ہوتے ہی ملزم نے متاثرہ لڑکی سے دست درازی کی. متاثرہ کے شور مچانے پر ملزم بھاگ نکلا. پولیس نے مقدمہ درج کرنے کے بعد ملزم کو گرفتار کیا. پولیس نے ملزم کے خلاف پوسکو ایکٹ کے تحت کاروائی کی ہے. تھانے کے گلوبل کوویڈ سینٹر کے پانچویں منزلے پر خواتین کی بیت الخلاء کے پاس ایک مشتبہ کی جم کر پٹائی کی گئی. میرا روڑ کے واقع مہا نگر پالیکا کے کے کوویڈ سینٹر میں 20سالہ شادی شدہ مریضہ کی حفاظتی دستے کے ایک رکن نے کئ بار عصمت دری کی اور مسلسل دھمکی دیتا رہا. یہ معاملہ اس وقت بے نقاب ہوا جب متاثر خاتون دو ماہ کی حاملہ ہو گئی.
کورونا سے متاثر خاتون مریضوں کے ساتھ دست درازی اور ان عصمت ریزی کے بڑھتے ہوئے واقعات کو دیکھ کر یہ کہا جا سکتا ہے کہ سماج و معاشرہ کس درجہ تنزلی کا شکار ہوتا جارہا ہے. کورونا سے متاثر ہونے والی خواتین پہلے ہی اس خطرناک وبائی بیماری سے زندگی اور موت کی کشمکش میں مبتلا ہیں لیکن انسان نما درندے اپنی حوانیت کا مظاہرہ کرتے ہوئے اپنی درندگی کا ثبوت دے رہے ہیں. انھیں یہ بھی خوف نہیں ہے کہ کورونا سے متاثر خواتین کے ساتھ غلط برتاؤ کرنے کی وجہ سے وہ خود اور ان کے اہل خانہ بھی کورونا کا شکار ہو سکتے ہیں یا پھر کورونا کا عذاب ان پر بھی مسلط ہو سکتا ہے. بہرحال ایک بات یہ طے ہے کہ قانون قدرت ایسے خاطی افراد کے خلاف ضرور اپنا جلوہ دکھائے گی اور ایسی حرکت کرنے والے افراد ضرور بہ ضرور عذاب الہی کا شکار ہو جائیں گے. ارباب حکومت اور محمکہ پولیس کو چاہیے کہ اس طرح کی غلط حرکات کا ارتکاب کرنے والے خاطی افراد کو گرفتار کرتے ہوئے سخت سے سخت دفعات کا نفاذ کرکے عدالت کے کٹہروں میں کھڑا کرنے کی کوشش کریں تاکہ اس طرح کی نازیبا حرکتوں پر قدغن لگ سکے. اس کے لئے ارباب حکومت اور محمکہ پولیس کو تمام کوویڈ سینٹروں پر سی سی ٹی وی کیمرے اور رات دن کے پہرے داروں کا تقرر کرتے ہوئے انتہائی نگہداشت کے مذکورہ مقامات کی فعالیت کے ساتھ نگرانی کرے تاکہ ایسے واقعات پر روک لگنے میں معاونت ہو اور خواتین کی عزت و آبرو محفوظ رہے ورنہ روز بروز ہونے والے ان واقعات سے کوویڈ سینٹروں کے علاوہ حکومت اور محمکہ پولیس بھی بدنامی اور شک کے گھیرے میں آ جائے گی.
آج ضرورت ہے کہ بلا تفریق غیرے تمام کوویڈ سینٹروں پر اپنی ذمہ داری کا احساس کرتے ہوئے خواتین کی عزت و ناموس کی حفاظت کا معقول انتظام کرکے اپنے ذمہ دارانہ فرائض کی انجام دہی میں نمایاں کردار ادا کریں یہی خواتین کے حق میں بہتر ثابت ہوگا اور خواتین بھی تمام کوویڈ سینٹروں پر علاج و معالجہ سے صحت یاب ہو کر پھر سے سماج و معاشرہ میں سرگرم عمل ہو جائیں گی.