بھیونڈی (فہیم انصاری)
بھیونڈی میں بچوں کی مزدوری کو روکنے کے لئے، اسسٹنٹ لیبر کمشنر نے ایک زوردار مہم شروع کی ہے جس کے تحت بچوں کے ذریعے کام نا کروانے کے لئے این جی او کی مدد سے شہر میں عوامی بیداری کے لئے ریلی نکالی جارہی ہے۔ بلکہ جگہ جگہ اسٹیکر لگاکر بچوں سے کام نہ کروانے کی نصیحت بھی دی جارہی ہے۔ اسی کے ساتھ ہی شہر اورآس پاس کے گلی کوچے میں نکڑ سبھا کاانعقاد کرکے اس کو روکنے کی اپیل بھی کی جارہی ہے تاکہ بال مزدوری پر مکمل طور پر لگام لگایا جاسکے.
واضح ہوکہ بھیونڈی اسسٹنٹ لیبر کمشنر، سان دابھاڑے کی رہنمائی میں، 6 دسمبر کو صبح 10 بج کر 30 منٹ پر بال مزدوری روکنے کے لئے عوامی بیداری ریلی نکالی گئی تھی جس میں اسسٹنٹ کمشنر آفس کے نریندر تیلم، منوہر واترے، ککتکر، شوبھا پھالکے کے ساتھ ادارہ اور اسکول کے طلباء ‌‌‌‌نے اس ریلی میں بڑھ چڑھ کر حصہ لیا۔ مذکورہ ریلی دھامنکر ناکا سے نکل کر کالج روڈ، پدما نگر ہوتے ہوئے کلیان روڈ پہنچی۔ راستے میں ریلی میں شامل لوگوں نے بال مزدوری روکنے کے لئے پاور لوم علاقے کے ساتھ بھیڑ بھاڑ والی جگہوں پراسٹیکر لگا کر لوگوں کو بال مزدوری کے جرم سے متعلق آگاہ کرنے کے ساتھ ہی بچوں سے کام نہ کرانے کی اپیل بھی کی۔ اس تناظر میں اسسٹنٹ لیبر کمشنر دابھاڑے نے بتایا کہ اس سے قبل پولیس کے اشتراک سے متعدد علاقوں میں عوامی بیداری ریلی نکالی جاچکی ہے اوراس کے ساتھ ہی مزدور اکثریتی علاقے کے لوم مزدوروں، مالکوں، ہوٹل والوں کے ساتھ نکڑ سبھا کاانعقاد کر انہیں بچوں سے کام نہ کروانے کی ہدایت دی گئی ہے۔ ساتھ ہی ایس ٹی اسٹینڈ میں چائلڈ لیبر کے خلاف دستخطی مہم بھی چلائی گئی۔ لیبر کمشنر دابھاڑے نے بتایا کہ اس مہم کی شروعات ڈسٹرکٹ کلکٹر کے دفتر سے ہوئی تھی، جو 7 نومبر سے شروع ہوئی، عوامی بیداری مہم 7 دسمبر تک جاری رہے گی انہوں نے کہاکہ اگراس کے باوجود کوئی کاروباری بچوں سے مزدوری کراتے ہوئے پایا جاتا ہے تو پھراس کے خلاف سخت سے سخت کارروائی کی جائے گی۔
آٹھ بچوں کو چائلڈ لیبر سے آزاد کرایا جاچکا ہے، تین کے خلاف معاملہ درج کیا گیا ہے اور چار کو نوٹس دیا گیا ہے۔
چائلڈ لیبر کو روکنے کے لئے چلائی جارہی عوامی بیداری مہم کے تحت اسسٹنٹ لیبر کمشنر کے ذریعے ہوٹلوں اور گیراج پر چھاپہ مار کر کل آٹھ بچوں کو چائلڈ لیبر سے مستثنیٰ کرایا گیا ہے۔ ساتھ ہی بچوں سے کام کروانے والے تین ہوٹلوں پر معاملہ درج کرنے کے ساتھ ہی چار افراد کو نوٹس بھی دیا گیا ہے۔ جس کی وجہ سے پیسہ بچانے کے لیے بال مزدوروں سے کام کروانے والوں میں سراسیمگی پھیلی ہوئی ہے۔
بھیونڈی اسسٹنٹ لیبر کمشنر دابھاڑے کی ہدایت پر لیبر محکمہ کے لوگوں نے مقامی مولچند کمپاؤنڈ کے کھانے کی بسی، فیضان کمپاؤنڈ کے طیب ہوٹل اور پیرانی پاڑا کے سلیم کینٹین پر چھاپہ مارکر 9 سے 14 سال سے نیچے کے بچوں کو بال مزدوری سے آزاد کرانے کے ساتھ ہی مذکورہ کاروباریوں پر مختلف پولیس اسٹیشنوں میں چائلڈ لیبرایکٹ کے تحت معاملہ درج کرایا گیا ہے۔ جبکہ دھامنکر ناکا کے سپر گیریج، ناوی پاڑا کے احباب ہوٹل اور کھونی گاؤں کے منگل ہوٹل پر چھاپہ مارکر، لیبر حکام نے 14 سے 18 سال تک کے چار بچوں کو بال مزدوری سے آزاد کراتے ہوئے مذکورہ لوگوں کو نوٹس دیا گیا ہے۔ آزاد کراۓ گئے آٹھوں بچوں کو چلڈرن ہوم میں بھیج دیا گیا ہے۔ اسسٹنٹ لیبر کمشنر دابھاڑے نے کہا ہے کہ بچوں سے مزدوری کرانے والوں کو کبھی نہیں بخشا جائے گا۔ اسسٹنٹ لیبر کمشنر کے سخت رویہ کی وجہ سے پیسہ بچانے کیلئے چائلڈ لیبروں کا استحصال کرنے والوں کے سامنے بڑی مشکل کھڑی ہوگئی ہے.