(خیال اثر )
زندگی… ۔…ادب…….. آرٹ وہ متحرک سمتیں ہیں جن کی دشائیں ہمیشہ رخ بدلتی رہتی ہیں اور وہی فنکار فنون لطیفہ کی اصناف پر عبور حاصل کرتا ہے جو اپنے پائے استقلال میں کبھی بھی جنبش نہیں ہونے دیتا ہے اور خود کو مصروف سفر رکھتے ہوئے جوانمردی سے تمام طوفانوں کا مقابلہ کرتے رہتا ہے. فروغ علی جعفری ایک ایسے ہی فنکار کا نام تھا جو کل تک کسی نا کسی موڑ پر رخ بدلتے ہوئے نئ سمتوں کی جانب گامزن رہتا تھا اور آج یہ مصروف سفر رہنے والا مسافر آبلہ پا تھک کر مٹی کی تہوں کے نیچے ابدی نیند سو گیا ہے. شاید یہ کہتے ہوئے کہ
تم نہ کر پاؤ گے اندزاہ تباہی کا میری
تم نے دیکھا ہی نہیں کوئی کھنڈر شام کے بعد
لیکن ہم یہاں یہ کہنے پر حق بجانب ہیں کہ یہ کھنڈر کبھی ایک حیسن و جمیل عمارت تھی. مالیگاؤں شہر کے معمر و کہنہ مشق صحافی اور شیعہ جماعت سے منسلک عبدالطیف جعفری کے جواں سال صاحبزادے فروغ علی جعفری کل دوپہر 12بجے اچانک انتقال کر گئے.
مرحوم فنون لطیفہ کی ہر صنف سے واقفیت رکھتے تھے. شاعری, ڈرامہ نگاری, صحافت کے علاوہ مالیگاؤں میں تیار ہونے والی فلموں کے لئے بھی وہ ہمشیہ متحرک رہا کرتے تھے.مالیگاؤں شہر میں جس وقت فلم نگری یعنی “مالی ووڈ “کا قیام عمل میں آیا تو اسے استحکام عطا کرنے میں بھی ان کا مخلصانہ تعاون شامل رہا. مالی ووڈ کی جانب سے بنائی جانے والی فلموں کو فروغ دینے کے لئے بھی فروغ علی جعفری کی کوششیں شامل حال رہی ہیں. فروغ علی جعفری کے انتقال کر جانے سے ان کے والد متحرم عبدالطیف جعفری کو جو صدمہ عظیم پہنچا ہے وہ کسی قیامت صغری سے کم نہیں. بہرحال ہر نفس کو ایک نہ ایک دن موت کا مزہ چکھنا ہے اور یہی قانون قدرت بھی ہے اس لئے مالیگاؤں کی صحافتی و فلمی شخصیات نے فروغ علی جعفری کے انتقال پر ملال پر ان کے اہل خانہ کو صبر کی تلقین کرتے ہوئے دعائے خیر کا اظہار کیا ہے.
فروغ علی جعفری ایک بلند حوصلہ شخصیت کا نام تھا. والدہ کے انتقال کے بعد انھیں اپنی جواں سال دختر کے انتقال سے بے حد صدمہ ہوا تھا لیکن انھوں نے ان سارے غموں سے نبردآزما رہتے ہوئے زندگی کرنے کی کوشش میں خود کو مصروف سفر رکھا تھا. بلاآخر ان کا یہ سفر مسلسل موت کی تیز و تند آندھیوں نے مسدود کردیا اور اس طرح فنون لطیفہ سے جڑا ہوا ایک زمینی فنکار پیوند زمین ہوکر اپنی عزیز و اقرباء کو بحر اشک میں غرقاب کر گیا. فروغ علی جعفری کے انتقال پر ملال پر مالی ووڈ نے اپنے رنج و غم کا اظہار کرتے ہوئے کہا کہ مرحوم نے ممبئی میں رہتے ہوئے روز نامہ صحافت میں اپنی صحافتی خدمات انجام دی تھیں. بالی ووڈ کے فنکاروں سے بھی ان کے قریبی روابط تھے.کچھ عرصہ پہلے قومی کونسل برائے فروغ اردو کے مالی تعاون سے بچوں کے لئے ان کا ایک ناول بھی منظرعام پر آیا تھا جو ان کی قلمی خدمات کا اعتراف نامہ تھا. ہزارہا افراد کی موجودگی میں مرحوم جسد خاکی بعد نماز عصر شیعہ قبرستان میں سپرد خاک کیا گیا.