(وفا ناہید)
کل کارپوریشن کی جنرل بورڈ میٹنگ میں جاری مالیاتی سال 2020-21 کا بجٹ پیش کیا گیا. آج صبح شہر کی گلیاروں میں یہ خبر گشت کرنے لگی کہ2 روز قبل اسٹینڈنگ کمیٹی کی میٹنگ کورم پورا نہ ہونے کی وجہ سے رد کردی گئی تھی. جس کی وجہ سے دلبرداشتہ ہوکر اسٹینڈنگ چیئرمین ڈاکٹر خالد پرویز, ان کے والد یونس عیسی اور بھائی ماجد حاجی نے میئر آفس کے دالان میں گھس کر میئر طاہرہ شیخ اور ان کے شوہر سابق میئر شیخ رشید کے ساتھ بدزبانی کی اور انہیں جان سے مارنے کی دھمکی دی. جس کے بعد میئر میڈم نے قلعہ پولس اسٹیشن جاکر اس واقعے کی شکایت درج کروائی. اس واقعے کی سچائی جاننے کے لئے نمائندے نے جب قلعہ پولس اسٹیشن سے رابطہ کیا تو پتہ چلا کہ اس کیس کے تحقیقاتی آفیسر نیلیش دیوراج نائٹ ڈیوٹی کرکے گھر جاچکے ہیں. تب نمائندے نے اسٹینڈنگ چیئرمین ڈاکٹر خالد پرویز سے اس بابت دریافت کیا تو موصوف نے نہایت حیرت انگیز انکشاف کیا کہ مجھے بھی اخبار کے ذریعہ پتہ چلا. کل کارپوریشن کی جنرل بورڈ میٹنگ میں ہم ساتھ میں تھے. میں نے میئر کو بجٹ پیش کیا. سابق میئر شیخ رشید میرے ساتھ میں بیٹھے تھے. میں نے کب ان کو جان سے مارنے کی دھمکی دی یہ تو مجھے بھی نہیں معلوم. اسٹینڈنگ کمیٹی کی میٹنگ ہوئی, اس کے بعد جنرل بورڈ میٹنگ ہوئی. جو نہایت ہی خوشگوار ماحول میں اختتام پذیر ہوئی. سب نے میٹنگ میں اپنی اپنی بات رکھی. مجھے تو سمجھ میں نہیں آرہا ہے کہ کس بناء پر ان لوگوں نے کمپلین درج کی ہے. یہ ان کا پولیٹیکل اسٹنٹ ہے- اگر ان کو دوسرے پر حملہ کرنا ہوتا ہے تو پہلے بیس بناتے ہیں. مجھے لگتا ہے کہ ایسا کچھ حملہ وہ ہمارے اوپر کریں گے.
ڈاکٹر خالد پرویز سے بات کرنے کے بعد نمائندے نے میئر طاہرہ شیخ رشید سے سچائی جاننے کی کوشش کی تو انہوں کہا کہ سب سے پہلے تو ڈاکٹر خالد پرویز نے ان لیگل میٹنگ کال کی. آج رات میں ایجنڈہ ایشو کیا کل میٹنگ تھی. کبھی کبھی جنرل بورڈ میٹنگ بھی لیٹ ہوجاتی ہے. کورم نہیں ہوتا. مہاگٹھ بندھن کے لوگ بھی نہیں آئے تھے. شیوشینا کے بھی ایک یا 2 کارپوریٹر ہی تھے. ممبر کم ہونے کی وجہ سے میٹنگ نہیں لے سکتے تھے. اس لئے میٹنگ رد کردی گئی. جس کی وجہ ڈاکٹر خالد پرویز خاصے برہم تھے. ان کے مطابق ان کی بے عزتی ہوئی تھی. جس کو بنیاد بنا کر کانگریس کے کارپریٹرس کے ساتھ بدتمیزی کی اور ایک کارپوریٹر اسلم انصاری کو مارا بھی. اس کے بعد ڈاکٹر خالد نے اپنے والد, بھائی بھتیجوں کی گینگ کو فون کر کے بلا لیا. ان کے چھوٹے بھائی بے کہا کہ جلدی کرو, شیخ رشید خانوادے کو جان سے ختم کردو. میئر محترمہ کے مطابق جس وقت ڈاکٹر ان کے بھائی بھتیجوں کی گینگ کے ساتھ کارپوریشن میں تانڈو کررہے تھے اس وقت وہ اور سابق میئر شیخ رشید کارپوریشن سے جاچکے تھے. یہ تمام واقعہ ہمارے ییچھے ہوا سامنے نہیں. اس کے بعد مجھے فون آیا. میں واپس کارپوریشن پہنچی تب تک وہ لوگ جاچکے تھے. اب میرا یہ فرض بنتا تھا کہ میں شکایت درج کروں, کیونکہ ان لوگوں نے جان سے مارنے کی دھمکی دی تھی اور ہمارے ایک کارپوریٹر کو مارا بھی تھا. لہذا میں نے اس کی شکایت قلعہ پولس اسٹیشن میں داخل کی. یہ تمام ہنگامہ پرسوں یعنی 23 جون کا تھا اور اسی دن دوپہر کو اس سارے ہنگامے کی شکایت قلعہ پولس اسٹیشن میں درج کی جاچکی تھی- کل 24 جون کو 4 بجے جنرل بورڈ کی میٹنگ تھی. جس میں بجٹ پیش کیا جانا تھا. لہذا میں نے اپنی حفاظت کے پیش نظر قلعہ پولس اسٹیشن سے پولس پروٹیکشن کی ڈیمانڈ کی. اس طرح میں نے شکایت درج کرنے کے بعد پولس سپورٹ بھی حاصل کیا. اس کیس کی تحقیقات نیلش دیوراج کررہے ہیں. باقی باتوں کا خلاصہ تو تحقیقات مکمل ہونے کے بعد ہی ہوگا کہ کیا واقعی اسٹینڈنگ چیئرمین نے غنڈہ گردی کی ہے ؟ یا برسر اقتدار گروپ ان پر الزام عائد کررہا ہے.