حضرت محمد ﷺ کو اپنی زندگی کا انمول حصہ بنانے کی اپیل کرتے ہوئے آل انڈیا تنظیم علماء حق کے قومی صدر مولانا محمد اعجاز عرفی قاسمی نے کہا کہ بھارتیہ جنتا پارٹی کی حکومت ہندوستان اور بیرون ملک ہونے والے احتجاج کے باوجود نوپور شرما اور نوین جندل کے خلاف کوئی کارروائی نہ کرنا نہایت افسوسناک امر ہے۔ انہوں نے گزشتہ رات تنظیم علماء حق کے زیر اہتمام ’تحفظ ناموس رسالت ﷺ اور ہماری ذمہ داریاں‘ کے عنوان سے کانفرنس کی صدارت کرتے ہوئے کہی۔

انہوں نے کہا کہ بی جے پی کے ان دونوں رہ نماؤوں کی اس مذموم حرکت پر نہ صرف ہندستانی مسلمان بلکہ خلیجی ممالک سمیت پورا عالم اسلام سراپا احتجاج بنا ہوا ہے، اور جس سے ہمارے ملک کی عزت ووقار کو ٹھیس پہنچ رہی ہے، عالمی پیمانے پر ہونے والے اس احتجاج اور بائیکاٹ کو دیکھتے ہوئے حکمراں پارٹی بی جے پی نے ان دونوں رہ نماؤوں کے خلاف معطلی کی جو کارروائی کی ہے، وہ نا کافی ہے۔ ان دونوں کے خلاف قانون کے دائرے میں سخت قدم اٹھانے کی ضرورت ہے۔

انھوں نے حکومت ہند سے یہ مطالبہ کیا کہ مذہب اور مقدس شخصیات کی توہین سے متعلق قانون کو مزید سخت بنانا از حد ضروری ہے، تاکہ اظہار خیال کی آزادی کے نام پر کوئی شخص کسی مذہب یا کسی مقدس شخصیت کے خلاف لب کشائی اور زبان درازی کی جرأت نہ کرسکے۔ انھوں نے کہا ہندستان ایک سیکولر اور جمہوری ملک ہے، کثرت میں وحدت اس کی پہچان ہے، یہاں تمام مذاہب و ادیان اور مذہبی شخصیات کا احترام کیا جاتا ہے، دستور و آئین کی روشنی میں ہندستان میں بسنے والے ہر شخص کو اپنے مذہب پر عمل کرنے اور اس کی توسیع و اشاعت کا حق حاصل ہے، مگر جمہوریت کا ناجائزہ فائدہ اٹھاکر جو لوگ مذہب، مذہبی کتابوں اور مذہبی شخصیات کے خلاف دریدہ دہنی کا مظاہرہ کر رہے ہیں، ان کے خلاف سخت قانونی قدم اٹھانے اور انھیں قرار واقعی سزا دلوانے کی بھی ضرورت ہے، تاکہ مستقبل میں کسی کو بھی اس قسم کے جرم کے ارتکاب کرنے کی ہمت نہ ہو۔

انہوں نے کہاکہ ہم حکومت ہند سے مطالبہ کرتے ہیں توہین رسالت کے مجرموں کو قرار واقعی سزا ملنی چاہئے۔

تنظیم کے جنرل سکریٹری مولانا اسعد مختار نے کہا کہ محمد ﷺ اور اماں عائشہ کے بارے میں ان دونوں رہنماؤں کا بیان اس عظیم ترین ملک کی پیشانی پر بدنما داغ ہے،اس کے سبب نہ صرف عالم عرب میں بلکہ پوری دنیا میں جمہوری اقدارو کردار کے حامل ہمارے وطن کو رسوائی اٹھانی پڑرہی ہے۔ اس اہانت رسول کے معاملے کو لے کر پوری دنیا غضب ناک ہے۔

وشو شانتی پریشد کے فیض احمد فیض نے کہا کہ سوشل میڈیا اور دیگر ذرائع ابلاغ پر جس طرح کی باتیں چل رہی ہیں وہ افسوسناک ہیں۔ ہمارے علمائے کرام کو اس ضمن میں دھیان دینے کی ضرورت اور جو بات صحیح اسے پیش کرنے کی ضرورت ہے۔ اس کے علاوہ دیگر مقررین میں جماعت اسلامی سے مولانا ارشد سراج الدین مکی، آل انڈیا مشاورتی کونسل کے صدر مولانا انور علی قاسمی، عالمی اردو فاؤنڈیشن کے جناب سید باری، فریدآباد سے مولانا محمد احمد ندوی، مولانا حارث عظیم، مولانا شاہ خالد مصباحی، حافظ عبدالسمیع ہردوئی اور سماجی کارکن حمید خان نے کہا کہ اس اہانت کے سلسلہ میں جو لوگ احتجاج کر رہے ہیں، حکومت ان کے خلاف سخت قدم اٹھا رہی ہے، اور امن کے نام پر بے قصور افراد کو گرفتار کر رہی ہے۔ اس قسم کی یکطرفہ کاروائی سے مجرمین کے حوصلے اور بلند ہوں گے۔ آج کے یہ کانفرنس حکومت سے یہ مطالبہ کرتی ہے کہ وہ خاطیوں کو پابند سلاسل کرے، اور بے قصور افراد مظاہرے کی وجہ سے گرفتار کئے گئے ہیں، حکومت انہیں جلد باعزت رہا کرے۔ آج کے یہ کانفرنس تمام اسلامیان عالم کا ممنون ومشکور ہیں، خاص کر اسلامی جمہوریہ ایران اور اس کے وزیر خارجہ نے اس اہانت رسول کے معاملے کو لے کر جو جرات مندانہ اقدام کئے وہ لائق تحسین ہیں۔