ممبئی : پوری مارواڑی برادری (36 کمیونٹیز) اور کاروباری تنظیموں نے میرا بھائیندر میں جودھ پور مٹھائی کے تاجر پر مراٹھی زبان پر حملہ کے خلاف احتجاج میں 3 جولائی کو بند کی کال دی ہے۔ یہ بندش صبح 11 بجے سے شام 5 بجے تک رہے گی۔ تمام تاجروں سے اپیل کی گئی ہے کہ وہ اپنے ادارے بند رکھ کر اس پرامن احتجاج میں شامل ہوں۔ میرا روڈ پر دکانوں کو تالے پڑے ہوئے ہیں۔ تاجر سڑکوں پر ہیں۔ کچھ لوگوں نے سڑک پر اس ایکٹ کے خلاف نعرے لگائے۔ تاجروں نے کہا کہ اگر سخت ایکشن نہ لیا گیا تو وہ اپنے احتجاج کو مزید تیز کریں گے۔ ممبئی کی مارواڑی تنظیموں نے بھی اس بند کی حمایت کی ہے۔ تاجروں کا کہنا ہے کہ اگر آج اس قابل مذمت واقعہ پر سخت ایکشن نہ لیا گیا تو مستقبل میں کسی بھی تاجر کے ساتھ ایسا ہو سکتا ہے۔

اس سلسلے میں تمام تاجر جمعرات کو صبح 11 بجے سیما میں واقع ایمتا بھون (وڈیر بھون) کے احاطے میں جمع ہوں گے اور وہاں سے وہ ڈپٹی کمشنر آف پولیس کے دفتر جائیں گے اور ایک میمورنڈم پیش کریں گے۔ میرا-بھائیندر میڈیکل ایسوسی ایشن کے شریک سیکرٹری ڈاکٹر دنیش چودھری نے کہا، ‘ہم کسی زبان کی مخالفت نہیں کرتے، لیکن ہم تشدد اور حملہ کی سختی سے مخالفت کرتے ہیں۔’ میرا روڈ میں مارواڑی تاجر پر حملہ کے واقعہ پر جمعرات کو بند کی کال دی گئی ہے، بی جے پی اور شندے سینا نے اس واقعہ کی مذمت کی ہے۔ ہندی بولنے والے لیڈروں نے زبان کے نام پر ایم این ایس کارکنوں کے تشدد کی مذمت کی ہے۔ قائدین نے کہا کہ مراٹھی سیکھنا ضروری ہے کیونکہ اس سے عوام کو فائدہ ہوگا، لیکن لڑائی جھگڑا ٹھیک نہیں ہے۔

بی جے پی کے نائب صدر آچاریہ پون ترپاٹھی نے کہا کہ مراٹھی زبان ہماری ترجیح ہے لیکن زبان نہ جاننے پر کسی کو مارنا سراسر غلط ہے۔ ہم اس کی شدید مخالفت کرتے ہیں۔ میرا بھائیندر میں 60% سے زیادہ لوگ ہندی بولنے والے ہیں۔ کوئی بھی قانون اپنے ہاتھ میں نہ لے۔ مہاراشٹر میں قانون کی حکمرانی ہے۔ لڑنا درست نہیں۔ جب تک سی ایم فڑنویس موجود ہیں کسی کو فکر کرنے کی ضرورت نہیں ہے۔

نئی دہلی : ایوان کا مانسون اجلاس 21 جولائی کو شروع ہو کر 21 اگست کو ختم ہوگا۔ اس لیے خیال کیا جاتا ہے کہ اس عرصے میں کافی کام ہو گا۔ پارلیمانی امور کے وزیر کرن رجیجو نے کہا کہ صدر دروپدی مرمو نے 21 جولائی سے 21 اگست تک اجلاس بلانے کی حکومت کی تجویز کو منظوری دے دی ہے۔ ‘ایکس’ پر ایک پوسٹ میں انہوں نے کہا کہ یوم آزادی کی تقریبات کے پیش نظر 13 اور 14 اگست کو کوئی اجلاس نہیں ہوگا۔ پہلے یہ سیشن 12 اگست کو ختم ہونا تھا لیکن اب اسے ایک ہفتہ بڑھا دیا گیا ہے۔ اجلاس میں توسیع کا فیصلہ ایک ایسے وقت میں کیا گیا ہے جب حکومت کئی اہم بلوں کو متعارف کرانے کی منصوبہ بندی کر رہی ہے جن میں سے ایک جوہری توانائی کے شعبے میں نجی شعبے کے داخلے کو سہولت فراہم کرنا ہے۔

حکومت نیوکلیئر ڈیمیج ایکٹ 2010، اور جوہری توانائی ایکٹ میں ترمیم کرنے کا منصوبہ بنا رہی ہے تاکہ جوہری شعبے کو نجی کمپنیوں کے لیے کھولنے کے لیے مرکزی بجٹ میں کیے گئے اعلان کو نافذ کیا جا سکے۔ سیشن شروع ہونے سے پہلے ہی، اپوزیشن آپریشن سندھور پر بحث کا مطالبہ کر رہی ہے، جس کے تحت ہندوستانی مسلح افواج نے پہلگام میں 22 اپریل کو ہوئے دہشت گردانہ حملے کے جواب میں پاکستان میں دہشت گردوں کے ٹھکانوں پر حملہ کیا تھا۔ حزب اختلاف کی جماعتیں بھی امریکی صدر ڈونلڈ ٹرمپ کے پاک بھارت تنازع کے دوران جوہری جنگ کو روکنے کے لیے ثالثی کرنے کے دعوؤں پر حکومت سے ردعمل کا مطالبہ کر رہی ہیں۔ تاہم حکومت نے ٹرمپ کے دعووں کو مسترد کر دیا ہے۔ وزیر اعظم نریندر مودی نے گزشتہ ماہ ٹرمپ کو فون پر کہا تھا کہ ہندوستان نے کبھی ثالثی کو قبول نہیں کیا ہے اور نہ ہی مستقبل میں اسے قبول کریں گے۔ مودی نے ٹرمپ کو یہ بھی بتایا کہ فوجی کارروائی روکنے کا فیصلہ پاکستان کی درخواست پر کیا گیا۔

ممبئی : مہاراشٹر قانون ساز اسمبلی میں چوتھے روز واری کو اربن نکسل قرار دینے پر اپوزیشن نے ہنگامہ کرتے ہوئے سرکار پر واری کی توہین کرنے کا سنگین الزام عائد کیا ہے۔ مہاراشٹر قانون ساز اسمبلی کے چوتھے روز اپوزیشن نے ودھان بھون کی سیڑھوں پر احتجاجی مظاہرہ کرتے ہوئے سرکار کے وزراء پر کئی سنگین الزامات عائد کئے ہیں۔ ریاستی سرکار کی کابینہ میں شامل وزراء اپنے اختیارات کا غلط استعمال کر تے ہوئے ریاست میں سرکاری زمینات پر قبضہ کر رہے ہیں۔ جس طرح حکمراں محاذ ہندو مذہب کی مقدس یاترا واری کو بدنام کرنے کی کوشش کر رہی ہے۔ وٹھورائے اور وارکروں کو اربن نکسل شہری ماؤ نواز قرار دے کر واری پالکھی کی توہین کر رہی ہے, یہ قابل مذمت ہے۔ مہاوکاس اگھاڑی کے اراکین نے حکمراں محاذ کے خلاف ودھان بھون کی سیڑھوں پر پرزور احتجاجی مظاہرہ کیا اور سرکار پر واری کا توہین کا الزام عائد کیا۔

اس مظاہرہ میں اراکین نے سرکار پر لعنت ملامت کر تے ہوئے نعرہ بازی بھی کی اور کہا کہ لعنت ہے گھوٹالہ باز سرکار پر کسان بھوکے مر رہے ہیں اور وزراء وارکری کو شہری نکسل اربن نکسلی قرار دے رہے ہیں۔ اس احتجاجی مظاہرہ میں شیوسینا لیڈر اپوزیشن امباداس دانوے، وجئے وردیتوار، سچن اہیر، جتندر آہواڑ وغیرہ شریک تھے۔