(وفاناہید)
حال ہی میں پارلیمنٹ میں منظور کردہ شہریت تر میمی بل کے خلاف آج جمعیۃ علماء مہاراشٹر کی اپیل پر ممبئی سمیت پوری ریاست میں مسلمانوں نے دھرنے آندولن کی نئی تاریخ رقم کرتے ہوئے تمام کمشنریٹ ضلعی کلکٹریٹ، اور تحصیلداردفاتر کے سامنے زبردست احتجاج اور دھرنا منعقد کرکے متعلقہ افسران کو میمورنڈم سونپا۔ اس اس دھرنے میں ریاست بھرکی بیشتر مسلم تنظیموں اور این جی اوز نے بلا لحاظ مسلک ملت شریک ہوئیں جس کی قیادت جمعیۃ علماء مہاراشٹر نے کی۔ اس آ ندولن کی خاص بات یہ رہی مظاہرین ہاتھوں میں پلے کارڈ لئے تھے جس میں اس سیاہ بل کے خلاف نعرے لکھے ہوئے تھے۔اس موقع پر جمعیۃ علماء مہا راشٹر کے صدر مولانا حافظ محمد ندیم صدیقی نے آزاد میدان ممبئی کے دھرنے میں بنفس نفیس شر کت کی اور خطاب کرتے ہوئے کہا کہ شہریت تر میمی بل ملک کے سیکولر کردار اور آئین کے بنیادی ڈھانچے کے خلاف ہے،ملک کے دستور کو ختم کر نے کی طرف ایک سازش ہے،یہ بل محض مسلمانوں پرمظالم سے متعلق نہیں ہے بلکہ دستور ہند پر ایک زور دار طمانچہ ہے جس کے خلاف اٹھ کھڑا ہونا ضروری ہے۔ انہوں نے مزید کہا کہ حکومت بیکاری،بے روزگاری،اور معیشت کی گرتی ہوئی صورت حال اور اپنی ناکامیوں کو چھپانے کے لئے ہر 6 مہینے میں اس قسم کی بل پیش کرکے عوام کے ذہنوں کو بھٹکایا جا رہا ہے اور ہندو مسلم پالیسی کے تحت عوام میں منافرت پیدا کرنے کی کوشش کی جا رہی ہے۔
مولانا صدیقی نے مزید کہا کہ اس متنازعہ بل کے خلاف ملک بھرمیں ہو رہے احتجات سے ثابت ہور ہا ہے کہ ہندوستانی عوام کی ایک بہت بڑی تعداد خاص طور پر برادران وطن ا س بل کے خلاف ہیں اس کے باوجود حکومت نے اس بل کو پاس کر دیا ہے،کوئی بھی طاقت عوام کی طاقت سے بڑھ کر نہیں ہے،پارلیمنٹ میں جن کی اکثریت تھی وہ بھلے ہی جیت گئے لیکن ملک کی اکثریت نے یہ ثابت کر دیا ہے کہ وہ اس قانون کو بھارت کی نظریہ کے خلاف سمجھتے ہیں،ایسے وقت میں جمعیۃ علماء پوری طاقت سے عوام کے جذبات کو ظاہر کرنا چاہتی ہے،یہ کوئی ہندو مسلم مسئلہ نہیں ہے بلکہ ایکٹ بنام آئین ہند ہے،وہ آئین جس کی تعمیر میں جمعیۃ علماء ہند کے اکابر نے قربانی دی ہے اسے اکثریتی سونچ کے دباؤ میں یوں ہی پامال ہوتے نہیں دیکھ سکتی۔ ریاست بھر کے جمعیۃ علماء کے ذمہ داران سے ملی اطلاع کے مطابق یہ دھرنے دوپہر دو بجے سے شروع ہوگئے تھے اور4 بجے تک تمام ضلعی مقامات اور تعلقہ جات میں لوگوں نے بڑی تعداد میں شرکت کی،ہزاروں کی تعداد میں لوگ گھروں سے نکل کر متعلقہ سرکاری افسران کے دفاترکے سامنے دھرنے پر بیٹھے۔ یہ دھرنے نہایت پرامن رہے، کہیں بھی کسی قسم کا ناخوشگوار واقعہ پیش نہیں آیا۔ یہ آندولن اس قدر منظم اور منصوبہ بند تھا کہ ریاست کے کچھ کلکٹریٹ پرشرکاء کی تعداد ہزاروں میں بتائی گئی ہے۔
مولانا ندیم صدیقی نے مزید کہا کہ آج ریاست بھر کے36ضلع میں سے35ضلع کے 410 شہروں اورتعلقوں میں ہماراآندولن ہوا ہے جس میں مجموعی طورلاکھوں افراد شریک ہوئے ہیں۔احتجاج میں اس بات کا اعادہ کیا گیاکہ ہم پریشان حال اور ستائے ہوئے لوگوں کو شہریت دینے کے خلاف نہیں ہیں لیکن جس طرح مذہبی تفریق اور ایک مخصوص طبقے کو نشانہ بناتے ہوئے بل اکثریت کے زعم میں منظور کراویا گیا ہے،یہ طریقہ ایک مخصوص طبقے کو محروم کرنے کی حکومت کی کوشش بدترین انسانی جرم اور آئین ہند کا بھونڈا مذاق ہے۔یہ آندولن ممبئی آزاد میدان سمیت صوبہ بھر کے تمام اضلاع بطور خاص اورنگ آباد،ناندیڑ،جالنہ،پر بھنی،لاتور،ہنگولی،بیڑ، عثمان آباد،تھانہ، بھیونڈی، رائے گڑھ،رتنا گیری،سندھو درگ،ناسک،مالیگاؤں،دھولیہ،جلگاؤں،احمد نگر،نندور بار،پونہ،ستارہ،کولھا پور، شولا پور،سانگلی،،ناگپور،امراؤتی،اکولہ،بلڈانہ ایوت محل،چندر پور، وردھا،بھنڈارہ،گوندیا،واشم کے تمام شہروں اور تعلقوں میں منظم طریقے پر منعقد کئے گئے اور کلکٹر،ڈپٹی کلکٹر اور تحصیلدار کومیمورنڈم دیئے گئے۔اس کے باوجود اگر حکومت نے ہوش کے نا خن نہیں لئے تواس سے بڑا اقدام کیا جائے گا جس کا خمیازہ بھگتنے کے لئے حکومت تیار رہے۔آزاد میدان کے دھرنے میں مولانا محمد ذاکر قاسمی،ایڈوکیٹ پٹھان تہور خان،عشرت علی خان،مولانا برہان الدین قاسمی،مولانا نوشاد صدیقی، یونس بھائی دکا و دیگر شریک تھے۔