بھیونڈی : انتظامی بے ضابطگی اور بدعنوانی کے ایک معاملے میں بھیونڈی میونسپل کارپوریشن کی سابق میڈیکل آفیسر ڈاکٹر ودیا شیٹی کے خلاف میونسپل کارپوریشن کے چیف آڈیٹر کے ذریعے کی جانے والی خفیہ تحقیقات کی رپورٹ کی بنیاد پر کارروائی کرنے کا حکم دیا گیا ہے۔ میونسپل کمشنر نے مذکورہ حکم مرکزی ہیلتھ مہم ممبئی کے جوائنٹ ڈائریکٹر مہیش بوٹلے کے ذریعے سابق انچارج میڈیکل آفیسر کے خلاف کارروائی کرکے اس کی رپورٹ پیش کرنے کے لئے دئیے گئے حکم کے بعد دیا ہے۔ سابق میئر جاوید دلوی نے سابق انچارج میڈیکل آفیسر ڈاکٹر ودیا شیٹی اور صحت محکمہ کے دیگر ملازمین کے خلاف انتظامی بے ضابطگیوں اور اقتصادی بدعنوانی کا الزام عائد کرتے ہوئے محکمہ صحت عامہ کو تحقیقات کرکے ان کے خلاف فوجداری کا معاملہ درج کرنے کا مطالبہ کیا تھا۔ سابق میڈیکل آفیسر ڈاکٹر ودیا شیٹی نے بتایا کہ ان کے خلاف تحقیقات جاری ہے جس میں وہ اپنا مؤقف پیش کریں گی۔
غور طلب ہے کہ میونسپل کارپوریشن کے عوامی محکمہ صحت اور طبی شعبے کے تحت شہر کے مختلف علاقوں میں 15 صحت کے سب مرکز موجود ہیں۔ ان صحت مراکز میں آنے والے مریضوں کے علاج کے لئے حکومت کی جانب سے ہر سال لاکھوں روپے کی ادویات فراہم کی جاتی ہے۔ بی جے پی اور شیوسینا کے کارپوریٹروں نے سابق میئر جاوید دلوی سے شکایت کی تھی کہ گزشتہ سنہ 2015 سے 2019 کے درمیان حکومت کی جانب سے بھیجی جانے والی دوائیوں کے اندراج کے معاملے میں انچارج میڈیکل آفیسر ڈاکٹر ودیا شیٹی کے ذریعے انتظامی بے ضابطگیوں اور بڑے پیمانے پر مالی بدعنوانی کرنے کا ارتکاب پایا گیا تھا۔ کارپوریٹروں کے ذریعے کی جانے والی شکایت کے بعد سابق میئر نے ڈاکٹر ودیا شیٹی سمیت محکمہ صحت کے دیگر ملازمین کے خلاف تحقیقات کرکے ان کے خلاف فوجداری کا معاملہ درج کرانے کا مطالبہ محکمہ صحت عامہ سے کیا تھا۔
سابق میئر کے مطالبے پر سابق میونسپل کمشنر منوہر ہیرے نے میونسپل کارپوریشن کے چیف آڈیٹر کالیداس جادھو کو تفتیشی افسر کے طور پر مقرر کرکے ڈاکٹر ودیا شیٹی سمیت صحت محکمہ کے دیگر ملازمین کے خلاف خفیہ تحقیقات کرکے رپورٹ پیش کرنے کا حکم دیا تھا۔ جس کے بعد کالیداس جادھو نے خفیہ تحقیقات کرکے سماعت بھی کی تھی لیکن اس سماعت میں ڈاکٹر ودیا شیٹی کی جانب سے اس معاملے کے متعلق اہم دستاویزات پیش نہیں کئے گئے تھے۔ ڈاکٹر ودیا شیٹی نے گوڈاؤن میں آگ لگنے کے سبب اہم دستاویزات جل جانے کا بہانہ بتایا تھا لیکن اس کے لئے انہوں نے پولیس اسٹیشن میں کوئی شکایت درج نہیں کرائی تھی۔ جس کے بعد تفتیشی افسر میونسپل کارپوریشن کے چیف آڈیٹر جادھو نے رپورٹ تیار کرکے ریاستی صحت محکمہ کو روانہ کردیا تھا۔ میونسپل کارپوریشن کے چیف آڈیٹر کی رپورٹ کی جانچ کرنے کے بعد قومی صحت مہم ممبئی محکمہ کے جوائنٹ ڈائریکٹر ، مہیش بوٹلے نے میونسپل کمشنر ڈاکٹر پنکج آشیہ کو مکتوب لکھ کر سابق انچارج میڈیکل آفیسر ڈاکٹر ودیا شیٹی کے خلاف کارروائی کرکے رپورٹ پیش کرنے کا حکم دیا ہے۔
واضح ہو کہ اپنا نجی اسپتال چلانے والی ڈاکٹر ودیا شیٹی کو انچارج میڈیکل آفیسر کے عہدے پر تقرری سابق میونسپل کمشنر اچیوت ہانگے کے ذریعے کی گئی تھی۔ ڈاکٹر ودیا شیٹی اپنی تقرری کے بعد سے ہی ہمیشہ تنازعات میں گھری رہیں ، جس کی وجہ سے انہیں میڈیکل آفیسر کے عہدے سے بھی دستبردار کردیا گیا تھا ۔
مقامی شہریوں کا الزام ہے کہ میونسپل کارپوریشن کی ملی بھگت سے شہر کے غریب اور ضرورت مند مریضوں کے علاج کے لئے لاکھوں روپے کی دوائیں صرف میونسپل کارپوریشن کے کاغذات پر ہی ہوتی ہیں ۔ شہریوں کا الزام ہے کہ گذشتہ 10 سالوں میں میونسپل کارپوریشن کے تمام 15 صحت مراکز ایک ساتھ کھلتے ہی نہیں تھے۔ اس کے علاوہ زیادہ تر صحت مراکز میں ڈاکٹر دستیاب نہیں تھے ، جہاں ڈاکٹر ملتے تھے وہاں دوائیاں نہیں ملتی تھی۔
اس ضمن میں ڈاکٹر ودیا شیٹی سابق انچارج میڈیکل آفیسر نے اپنے رد عمل کا اظہار کرتے ہوئے کہا کہ میونسپل کارپوریشن کی جانب سے تحقیقات کی جارہی ہے جہاں وہ اپنا موقف پیش کریں گی۔ تحقیقات مکمل ہونے سے قبل تحقیقات پر اثر انداز ہونے والا کوئی بیان نہیں دینا چاہتی۔