(محمد یوسف رانا)
۳؍ مئی کے بعد ریاستی علاقوں کا جائزہ لینے کے بعد ریاست میں لاک ڈاؤن کے تعلق سےفیصلہ لیا جائے گا۔ کل (پیر) وزیر اعظم کے ساتھ ویڈیو کانفرنس میں اس معاملے پر تبادلہ خیال کیا جائے گا اس طرح کا اظہار وزیر اعلی ادھو ٹھاکرے نے آج سہ پہر براہ راست نشریات کے ذریعے عوام سے خطاب کے دوران کیا- وزیراعلیٰ نے اعتماد کا اظہار کرتے ہوئے کہا کہ اگر ملک کے تمام مذاہب نے ملک کے تئیں یکساں فرض شناسی اور انسانیت کا مظاہرہ کیا تو کرونا کے خلاف جاری جنگ میں ہمیں جیت حاصل ہوگی۔
وزیر اعلی نے ریاست کے عوام کو اکشے ترتیا اور مسلمان بھائیوں کو رمضان کی مبارکباد پیش کی۔ انہوں نے مہاتما بسویشور جینتی کے موقع پر بھی مبارکباد پیش کی۔ انہوں نے کہا کہ کرونا سے متاثرہ علاقوں میں حکومت نے شرائط و ضوابط کے تحت۲۰؍اپریل کے بعد کچھ کاروبار شروع کرنے کی منظوری دے دی ہے۔ ریاست میں زرعی کاموں، زرعی اجناس اور ضروری اشیاء کی نقل و حمل کا کام جاری ہے۔ کپاس کی خریداری کے مراکز شروع کردیئے گئے ہیں۔ پھلوں کی آمدورفت شروع ہوگئی ہے۔ ہم گھر پر پھل پہنچانے کی کوشش کر رہے ہیں۔ وزیر اعلی نے کہا کہ مہاراشٹر کے اضلاع کی حدود بند ہیں، انہیں نہیں کھولا جائے گا لیکن کچھ اضلاع کی صورتحال کا جائزہ لینے کے بعد فیصلہ کیا جائے گا کہ آیا ۳؍ مئی کے بعد وہاں کچھ اور نرمی کی جاسکتی ہے یا نہیں۔
حب الوطنی اور انسانیت کو ترجیح دینے اور تمام تہواروں کو گھروں میں آسان طریقے سے منانے پر ریاست کے تمام لوگوں کا شکریہ ادا کرتے ہوئے وزیر اعلی ادھو ٹھاکرے نے ریاست کے مسلمانوں سے رمضان کے دوران گھر میں نماز ادا کرنے کی اپیل کی۔انہوں نے کہا کہ آج کی صورتحال میںصبر وضبط کا مظاہرہ کرنا ہی ہماری طاقت ہے موجودہ حالات میں ڈاکٹر، نرسیں، حفظان صحت کا عملہ، صفائی کامگار اور پولیس ہمارے لئے ایک مسیحاہیں۔ جو ہماری صحت کے لئے اپنی جان کو خطرے میں ڈال رہے ہیں۔ ان کی خدمات کا اعتراف کرنا بہت ضروری ہے۔
وزیر اعلی نے مرکزی وزیر نتن گڈکری کا بھی شکریہ ادا کیا کہ انہوں نے بغیر کسی سیاست کے مہاراشٹر کے لئے ہر ممکن مدد کا وعدہ کیا ہے جس کے ہم شکر گذار ہیں۔ وزیر اعلیٰ نے یہ بھی کہا کہ دوسری ریاستوں کے مزدور مہاراشٹر میں پھنسے ہوئے ہیں انہیں اپنے وطن بھیجنے کے لئے لائحہ عمل اور منصوبہ بندی جاری ہے۔ اگرچہ لاک ڈاؤن کی وجہ سے ٹرین شروع نہیں ہوگی، لیکن مرکزی حکومت کی رہنمائی اور منظوری کے بعد انہیں بحفاظت گھر بھیجنے کا انتظام کیا جائے گا۔وزیر اعلی نے یہ بھی بتایا کہ بڑے صنعت کاروں جیسے ٹاٹا، ریلائنس، وِپرو، مہیندر اینڈ مہندر، برلا اور دیگر نے ریاست کی بہت مدد کی ہے اور ان سب کا شکریہ ادا کیا ہے۔ وزیر اعلی نے بتایا کہ ریاست سے کچھ طلبا کو لانے کے انتظامات کیے جارہے ہیں جو راجستھان کے کوٹہ شہر میں پھنسے ہوئے ہیں۔
وزیر اعلیٰ ادھو ٹھاکرے نے بتایا کہ ریاست کی صورتحال کا جائزہ لینے مرکزی حکومت کی جانب سے بھیجی گئی ٹیم ایک ہفتہ سے ریاست میں خیمہ زن ہے اور ہم نے ان سےگذارش کی ہے کہ وہ ہماری ناہلی کی نشاندہی کریں اور اگر کوئی کوتاہی ہے تو ہم نے انتظامیہ کو ان کی ہدایت پر عمل کرنے کی ہدایت بھی کی ہے۔
انہوں نے یہ بھی واضح کیا کہ ممبئی اور پونے کی عوام کو غفلت سے باہر آنا ہوگا کرونا وائرس خطرناک ہے اور ہماری ذرا سی لاپرواہی ہمیں بڑا نقصان دے سکتی ہے۔ وزیر اعلی نے واضح کیا کہ 80 فیصد کرونا کے متاثرین میں کرونا کی علامتیں ظاہر نہیں ہوتی ہے۔ وزیر اعلی نے کہا کہ ایک دوسرے سے دور رہنا بے حد ضروری ہے۔ انہوں نے بتایا کہ 20 فیصد لوگوں میں شدید علامات پائی جا رہی ہیں۔ انہوں نے کہا کہ یہاں ایک سوال پیدا ہوتا ہے کہ صورتحال کب بدلے گی، جب لاک ڈاؤن ختم ہوگا، لیکن اس لاک ڈاؤن کی وجہ سے ہم وائرس کے اثرات کو روکنے میں کامیاب رہے ہیں ۔ہم نے مریضوں کی بڑھتی تعداد کو کنٹرول کیا ہے۔ انہوں نے کہا کہ اس ضمن میں، ماہرین کی رہنمائی، دنیا بھر کے موجودہ واقعات پر توجہ مرکوز کرتے ہوئے، ہم تحقیق پر توجہ دے رہے ہیں۔ ہم کسی ایک معمولی نقطہ کو نظرانداز نہیں کرتے ہیں۔ ہمارے ملک کی ساری دنیا میں تعریف کی جارہی ہے، ہمارے ملک نے صبر، تحمل اور اعتماد کی طاقت سے بحران کا سامنا کیا ہے۔ وزیراعلیٰ نے یہ بھی کہا کہ سب کا احتیاط اورکرونا کے خلاف جنگ میں سب کا اتحاد بے مثال رہا ہے۔
ریاست میں کرونا سے متاثرین کی تعداد میں اضافہ ہورہا ہے اور علاج مہیا کیا جارہا ہے، وزیر اعلی نے کہا کہ سوال یہ پیدا ہوتا ہے کہ کسی بھی واقعے کی صورت میں پولیس کیا کرتی ہے۔ لیکن آج وہی پولیس دن رات خدمات انجام دے رہی ہے، بدقسمتی سے دو پولیس اہلکار کرونا کی وجہ سے فوت ہوگئے، حکومت پولیس کے کنبے کے پیچھے کھڑی ہے ان سب کو مدد فراہم کرے گی۔ہمیں ان پر کسی قسم کا شک و شبہ نہیں کرنا چاہئے۔ کیونکہ پولیس، ڈاکٹر، نرسیں اور صحت کے کارکن اپنی صحت کو خطرے میں ڈال کر کام کررہے ہیں۔
وزیر اعلی نے کہا کہ ریاست میںعوام کی صحت کے لئے سہولیات میں مزید اضافہ کیا ہے ۔ مریضوں کوالگ تھلگ رکھنے کے لئے بڑے پیمانے پر انتظامات کیے گئے ہیں۔ انہوں نے بتایا کہ ہاٹ اسپاٹ اور کنٹینمنٹ زون کی تعداد کم ہو رہی ہے۔ انہوں نے کہا کہ مرکزی ٹیم نے ورلی کولی واڑامیں کرونا کے مریضوں کی تعداد میں کمی کرنے والے اقدامات کی سراہنا کی ہے۔ مہاراشٹر میں اب تک 1 لاکھ 8 ہزار 972 ٹیسٹ ہوچکے ہیں جن میں سے 1 لاکھ 1 ہزار 162 افراد کی کرونا رپورٹ منفی آئی ہے۔ بدقسمتی سے 323 افراد ہلاک ہوئے۔ انہوں نے کہا کہ ریاست میں پلازما تھراپی کی اجازت دی گئی ہے۔