ممبئی : مہاراشٹر پردیش کانگریس کمیٹی کے ریاستی صدر ہرش وردھن سپکال اور ریاستی کارگزار صدر و سابق وزیر محمد عارف نسیم خان نے ایک مشترکہ پریس کانفرنس سے خطاب کرتے ہوئے ریاستی پولیس کے ذریعے مذہبی مقامات پر لاؤڈ اسپیکر کے استعمال کے سلسلے میں جاری کیے گئے۔ نئے سرکیولر کو آڑے ہاتھوں لیا اور اسے فوری طور پر منسوخ کرنے کا مطالبہ کیا۔ تلک بھون میں ہوئی اس پریس کانفرنس میں عارف نسیم خان نے کہا کہ مہاراشٹر میں حکمراں بی جے پی حکومت عوامی مسائل جیسے مہنگائی، بے روزگاری، کسانوں کی بدحالی، صنعتی زوال اور امن و قانون کی بگڑتی صورت حال سے عوام کی توجہ ہٹانے کے لیے جان بوجھ کر مذہبی جذبات کو بھڑکانے والے موضوعات کو ہوا دے رہی ہے۔ انہوں نے کہا کہ مساجد میں لاؤڈ اسپیکر کے استعمال کے سلسلے میں پولیس کی جانب سے جاری کردہ تازہ سرکیولر نہ صرف آئینی حقوق کی خلاف ورزی ہے, بلکہ ریاست کے پرامن ماحول کو متاثر کرنے والا قدم بھی ہے۔

نسیم خان نے یاد دلایا کہ سال 2022 میں عدالت نے مذہبی مقامات پر لاؤڈ اسپیکر کے استعمال کے لیے واضح ہدایت دی تھی کہ صبح 6 بجے سے رات 10 بجے تک ایک مخصوص آواز کی حد کے دائرے میں اس کا استعمال کیا جا سکتا ہے۔ لیکن اب پولیس نے 11 مئی کو ایک نیا سرکیولر جاری کیا ہے، جس میں عبادت گاہوں میں لاؤڈ اسپیکر لگانے کے لیے تعمیراتی نقشے کی منظوری، پراپرٹی کارڈ اور بلدیاتی اداروں کی تصدیق کو لازمی قرار دیا گیا ہے۔ انہوں نے اس سرکیولر کو سخت تنقید کا نشانہ بناتے ہوئے کہا کہ یہ اقدام پولیس کے ذریعے مذہبی امور میں صریح مداخلت ہے، جو کہ آئینی طور پر دی گئی مذہبی آزادی کے خلاف ہے۔ نسیم خان نے کہا کہ یہ ایک فرقہ وارانہ ذہنیت کا عکاس قدم ہے جو ریاستی حکومت کی خاموش منظوری کے بغیر ممکن نہیں۔ انہوں نے وزیر اعلیٰ دیوندر فڑنویس سے پرزور مطالبہ کیا کہ وہ اس غیر آئینی اور اشتعال انگیز سرکیولر کو فوراً منسوخ کرنے کا حکم جاری کریں، تاکہ عوام کے اندر پھیلنے والی بے چینی اور بداعتمادی کا ازالہ ہو سکے۔

پریس کانفرنس کے بعد محمد عارف نسیم خان نے عیدالاضحیٰ کے پیش نظر دیونار مذبح خانے کا بھی معائنہ کیا۔ اس موقع پر انہوں نے مذبح خانے کے افسران، انتظامیہ کے نمائندوں، قربانی کے جانوروں کے تاجروں اور خریداروں سے تفصیلی بات چیت کی۔ انہوں نے جانوروں کی خرید و فروخت، صفائی ستھرائی، پانی کی فراہمی، روشنی، ٹریفک کنٹرول، ٹوکن سسٹم اور دیگر سہولیات کے متعلق معلومات حاصل کیں اور افسران کو سختی سے ہدایت دی کہ وہ عوام اور تاجروں کو درپیش تمام مسائل کو ترجیحی بنیادوں پر حل کریں۔ نسیم خان نے کہا کہ قربانی کے تہوار میں لاکھوں افراد کا تعلق ہوتا ہے اور انتظامیہ کی معمولی لاپروائی بھی بڑے مسائل پیدا کر سکتی ہے۔ اس لیے متعلقہ اداروں کو مکمل مستعدی اور حساسیت کے ساتھ اپنے فرائض انجام دینے چاہئیں۔ انہوں نے اس بات پر زور دیا کہ حکومت کو چاہیے کہ وہ مذہبی تہواروں کے دوران نہ صرف سہولیات فراہم کرے بلکہ مذہبی جذبات کا احترام کرتے ہوئے غیر ضروری پابندیوں اور سرکاری کارروائیوں سے گریز کرے۔

ممبئی مہاراشٹر کے ناندیڑ دھرم آباد میں عیدالاضحی پر مسلمان قربانی نہ کرے اس لئے بجرنگ دل کے غنڈے ہتھیاروں سے لیس مسلمانوں کو علاقہ میں جاکر دھمکیاں دی ہیں, جس سے ریاست کا ماحول خراب ہونے کا خطرہ اور فرقہ وارانہ تشدد کا بھی اندیشہ ہے۔ایسی صورتحال میں امن وامان کی صورتحال کو برقرار رکھنے کیلئے پولیس و انتظامیہ سخت کارروائی کرے اور شرپسندوں پر قدغن لگایا جائے, کیونکہ بجرنگ دل کے غنڈوں کی یہاں دہشت گردی عروج پر ہے۔

ریاست کے ناندیڑ ضلع کے دھرم آباد ضلع دیگلور تعلقہ میں امن وامان کو یقینی بنانے کیلئے ریاستی وزیر اعلی اور پولیس سربراہ ڈی جی پی کو رکن اسمبلی اور سماجوادی پارٹی لیڈر ابو عاصم اعظمی نے فرقہ پرستوں اور شرپسندوں پر کارروائی کا مطالبہ کیا ہے۔ اعظمی نے سنگین الزام عائد کیا ہے کہ بجرنگ دل کے کارکنان یہاں دھرم آباد علاقہ میں ہتھیاروں کے ساتھ گشت کر رہے ہیں, اور مسلمانوں کو دھمکی دینے کے ساتھ عید الاضحی پر قربانی نہ کرنے کیلئے خوفزدہ کرنے اور ماحول خراب کرنے کی کوشش کر رہے ہیں, اور ہندو انتہا پسندوں نے مسلمانوں سے قربانی نہ کرنے کا انتباہ دیا ہے۔ ابوعاصم اعظمی نے انتظامیہ سے اس معاملہ میں فوری طور پر مداخلت کرنے کا مطالبہ کرتے ہوئے وزیر اعلی اور ڈی جی پی کو ایک مکتوب بھی ارسال کیا ہے۔ انہوں نے مکتوب میں کہا ہے کہ دھرم آباد کے ایک مقامی شیخ لعل احمد نے شرپسندوں کی شرانگیزی سے متعلق انہیں آگاہ کیا ہے۔ انہوں نے بتایا ہے کہ عید الاضحی پر بجرنگ دل کے شرپسند عناصر قربانی نہ کرنے کی ہدایت دینے کے ساتھ مسلمانوں کو دھمکیاں بھی دے رہے ہیں, انہوں نے کہا کہ بجرنگ دل اور آر ایس ایس کی دہشت گردی پر قدغن لگایا جائے اور ماحول خراب کرنے والوں پر کارروائی کی جائے, تاکہ دھرم آباد میں عید الاضحی پر امن وسلامتی بر قرار رہے۔ اعظمی نے اپیل کی ہے کہ عید الاضحی پر دھرم آباد میں پولیس کا سخت حفاظتی بندوبست کیا جائے, تاکہ سماجی ہم آہنگی بر قرار رہے اور مسلمان اپنا تہوار پرامن طریقے سے منا سکے۔

ممبئی : ممبئی گؤ سیوا آیوگ نے عید قرباں تک 3 جون تا 8 جون مویشیوں کی منڈی بند رکھنے کا اپنا متنازع حکمنامہ واپس لے لیا ہے صرف اتنا کہا ہے کہ قربانی کے دوران ممنوعہ جانوروں گؤ کشی نہ ہو, اس بات کو یقینی بنایا جائے۔ مہاراشٹر کے وزیر اعلی دیویندر فڑنویس کے ہمراہ مسلم نمائندوں کی میٹنگ کے بعد وزیر اعلی نے سرکلر واپس لینے کا حکم جاری کیا تھا, جس کے بعد گؤ سیوا آیوگ نے اپنا متنازع سرکلر اور حکمنامہ واپس لے لیا ہے۔ اس سرکلر میں یہ کہا گیا تھا کہ عید قرباں پر گؤ کشی پر قدغن لگانے کیلئے ریاست کے تمام اضلاع میں جانوروں کی منڈیوں کو 8 جون تک بند رکھا جائے, اس کی مسلمانوں نے مخالفت کی اور مسلم نمائندوں کی میٹنگ کے دوران وزیر اعلی نے اس حکمنامہ کو واپس لینے کا اعلان کیا تھا۔ اس لئے گؤ سیوا آیوگ نے باضابطہ طور پر سرکلر واپس لے لیا ہے اور اس کے بجائے ایک نیا سرکلر جاری کیا ہے, جس سے جانوروں کے بازار پر پابندی کو اٹھایا گیا ہے, اس کے ساتھ ہی گؤکشی قانون کو سختی سے نافذ کرنے کا بھی مطالبہ کیا گیا ہے۔

ریاستی سرکار کی گؤ کشی قانون کے نفاذ کی ذمہ داری ہے اور پولیس و انتظامیہ اس کیلئے مستعد ہے, لیکن گؤ سیوا آیوگ کا اس طرح کا متنازع سرکلر جاری ہونے کے بعد سماجوادی پارٹی لیڈر و رکن اسمبلی رئیس شیخ نے اسے غیر قانونی قرار دیا تھا اور کہا تھا کہ جو سرکلر جاری کیا گیا ہے, وہ سراسر غیر قانونی اور متنازع ہے۔ جبکہ آیوگ کو حکمنامہ جاری کرنے کا کوئی اختیار نہیں ہے, وہ سفارش کر سکتا ہے ایسے میں وزیر اعلی کے حکم کے بعد اب قربانی کے دوران جانوروں کی منڈیاں جاری رہے گی اور بکروں سمیت بھینس کے بازار پر کوئی پابندی نہیں ہے, اس لئے مسلمانوں سے اپیل کی گئی ہے کہ وہ افواہوں پر توجہ نہ دے۔

دیونار مذبح کے جنرل منیجر کلیم پٹھان نے بھی بتایا کہ دیونار بکرا منڈی جاری رہے گی اور گؤ سیوا آیوگ نے جو حکمنامہ جاری کیا تھا اسے اس نے واپس لے لیا ہے, اس لئے دیونار بکرا منڈی سے متعلق عوام افواہوں پر توجہ نہ دے۔ انہوں نے کہا کہ دیونار میں بکرا منڈی میں سہولیات کے ساتھ خریداروں کی سہولیات کا بھی انتظام کیا گیا ہے, یہاں اسٹالس کے ساتھ دیگر سہولیات بھی میسر ہے۔ انہوں نے کہا کہ دیونار بکرا منڈی میں ڈیڑھ لاکھ سے زائد بکروں کی آمد ہو چکی ہے, اور اس کے ساتھ ہی 80 ہزار سے زائد بکرے باقی ہے۔