بھیونڈی (فہیم انصاری)
بھیونڈی میونسپل کارپوریشن کے میئر کے انتخاب سے متعلق اپنے پارٹی کارکنان اور اپنے کارپوریٹروں کی غیر ذمہ دارانہ حرکتوں سے ناراض کانگریس پارٹی کے بھیونڈی شہر ضلع نائب صدر سہراب خان نے اپنی شدید ناراضگی کا اظہار کرتے ہوئے کہا کہ گزشتہ ماہ اپریل میں ہونے والے پارلیمانی انتخابات واکتوبر میں ہوئے اسمبلی انتخابات میں بہت سے پارٹی کے عہدیداروں وکارکنان کے ساتھ ہی کچھ پارٹی کے کارپوریٹروں نے آپسی اختلافات واقتصادی فائدے کے لئے کانگریس پارٹی کے امیدواروں کے خلاف کام کیا ہے، جس کے نتیجے میں مذکورہ دونوں انتخابات میں پارٹی کے امیدواروں کو کراری شکست کا سامنا کرنا پڑا ہے۔ اگر پارٹی اعلیٰ کمان کی جانب سے پارٹی مخالف کام کرنے کی پاداش میں ان لوگوں کے خلاف قانونی کارروائی کی گئی ہوتی تو ممکن ہے کہ مستقبل میں پھر کوئی بھی عہدیدار، کارکن وکارپوریٹر پارٹی اعلیٰ کمان کے احکامات کے خلاف کسی قسم کی کوئی بھی حکم عدولی کرنے کی جرآت نہیں کرتا، لیکن افسوس اس بات کا ہے کہ آج تک پارٹی مخالف کام کرنے کے پاداش میں ان لوگوں کے خلاف کوئی بھی قانونی کارروائی نہیں کی گئی ہے، اسی لئے ان کے حوصلے بلند ہیں۔ واضح ہوکہ بھیونڈی پارلیمانی انتخابات میں کانگریس پارٹی کے شکست کی وجہ بھی کانگریس کے کچھ کارپوریٹروں اور عہدیداروں کی پارٹی مخالف کام کرنے کی وجہ سے ہی پارٹی کو شکست کا منہ دیکھنا پڑا تھا، تعجب کی بات تو یہ ہے کہ پارلیمانی انتخابات میں شکست ہونے کے باوجود بھی کانگریس اعلیٰ کمان نے پارٹی مخالف کام کرنے والوں کے خلاف کوئی کارروائی نہیں کی جس کے نتیجے میں غداری کرنے والے لوگوں کے حوصلے اور بلند ہوگئے اور اسمبلی انتخابات میں بھی ایک مرتبہ پھر کانگریس کے کچھ کارپوریٹروں اور عہدیداروں کے ذریعے پارٹی مخالف کام کرنے کی وجہ سے ایک مرتبہ پھر کراری ہار کا سامنا کرنا پڑا۔ حیرت کی بات یہ ہے کہ آخران پارٹی مخالف کام کرنے والوں کی سرپرستی کون کررہا ہے؟ کانگریس پارٹی کے اعلیٰ کمان کو چاہئیے کہ وہ ان پارٹی کے غداروں کی سرپرستی کرنے والوں کی انکوائری کرکے قصوروار پائے جانے والوں کے خلاف سخت سے سخت کارروائی کریں، ورنہ کانگریس پارٹی کو مستقبل میں اس کا خمیازہ بھگتنا پڑسکتا ہے۔
اسی لئے جب بھی موقع آتا ہے پارٹی کے احکامات کو مان کراس پر عمل کرنے کے بجائے یہ بغلیں جھانکنے لگتے ہیں جس کی وجہ سے پارٹی کو شکست سے دوچار ہونا پڑتا ہے، اس لئے اب لازمی ہے کہ پارٹی مخالف کام کرنے والوں کے خلاف اعلیٰ کمان ضرور با ضرور قانونی کارروائی کرے تاکہ پھر کوئی پارٹی مخالف کام کرنے کی جرآت نہ کرسکے۔ جب کہ سماج وادی پارٹی کے نو منتخب رکن اسمبلی رئیس قاسم شیخ وبھیونڈی سماجوادی پارٹی کے ضلع صدر عرفات شیخ نے انتخابات کے نتائج آنے کے تیسرے دن ہی انہوں نے پارٹی مخالف کام کرنے کی پاداش میں اپنے دو عہدیداروں کو فوری طور پر پارٹی سے ہی برخاست کردیا تھا۔ اسے کہتے ہیں ڈسیپلین، اگر کانگریس پارٹی نے بھی فوری ایکشن لیا ہوتا تو شاید نتائج کچھ اور ہوتے۔ اس طرح سے کی گئی کارروائی سے اب کوئی مستقبل میں پارٹی مخالف کام کرنے کی جرآت نہیں کرسکے گا۔ میں سماجوادی پارٹی کو ان کے اس اقدام پر انہیں مبارکباد دیتا ہوں۔
واضح ہو کہ آئندہ ۵ دسمبر کو بھیونڈی میونسپل کارپوریشن کے میئر کا انتخاب ہونے والا ہے اوراس وقت بھی کچھ نام نہاد عہدیدار وکارپوریٹر پارٹی کے تائید کردہ میئر کے بجائے دوسرے خیمے میں جاکر اپنا مستقبل سنوارنے میں مصروف ہو گئے ہیں جو کسی المیہ سے کم نہیں ہے۔ ایک بات تو صاف ظاہر ہے کے بھیونڈی میونسپل کارپوریشن میں کل 90 کارپوریٹروں میں سے کانگریس پارٹی کے کل 47 کارپوریٹر ہیں اس کے باوجود اگر ہماری شکست ہوتی ہے تو یہ ہمارے لئے بڑے ہی افسوس کی بات ہے۔ اس لئے جو لوگ کسی کے بہکاوے میں آگئے ہیں وہ برائے مہربانی اپنے گھر میں واپس آجائیں اور اپنے قلع کو مضبوطی سے تھام لیں، یہی وقت کا تقاضہ ہے ورنہ کل سوائے پچھتاوے کے کچھ حاصل نہیں ہوگا۔