پرلی (مہاراشٹر): وزیراعظم نریندر مودی نے جمعرات کے روز کانگریس اور نیشنلسٹ کانگریس پارٹی (این سی پی) پر سخت تنقید کرتے ہوئے کہا کہ ان کے زیادہ تر لیڈر آج آپس میں ایک دوسرے سے نبرد آزما اور مفاد پرستی میں مصروف ہیں۔ مسٹر مودی نے بھارتیہ جنتا پارٹی کی انتخابی ریلی سے خطاب کرتے ہوئے کہا کہ ان کے مہا گٹھ بندھن میں جو نوجوان لیڈر تھے وہ بھی ساتھ چھوڑ رہے ہیں اور سینئر لیڈر مایوس ہیں۔ آج اگر ہمارے مهاگٹھ بدھن کے حق میں ماحول ہے تو اس کے پیچھے گزشتہ پانچ برسوں کی سخت محنت ہے۔ وہیں دوسری طرف کانگریس اور این سی پی کے رہنماؤں کااپنی مفاد پرستی میں لگے ہوئے ہیں۔انہوں نے کہاکہ ’’اپوزیشن پارٹی کے لیڈروں کو یہ فکر ستارہی ہے کہ بی جے پی کارکن اتنی محنت کیوں کر رہے ہیں۔ میں آج بیڑ سے انہیں بتا دوں کہ، بی جے پی کے پاس تندہی سے کام کرنے والے کارکن ہیں، جس کی بدولت وہ دلوں کو جیتتے ہیں اور پارٹیوں کو فتحیاب بناتے ہیں۔‘‘وزیراعظم نے کہا کہ آرٹیکل 370 کو ہٹانے کے فیصلے پر ایک لیڈر نے کہا تھا کہ یہ کسی کو قتل کرنے جیسا ہے، ایک لیڈر نے کہا کہ یہ ہندوستانی سیاست کا سیاہ دن ہے، ایک لیڈر نے کہا کہ یہ جمہوریت کے منافی ہے، ایک اور بڑے لیڈر نے کہا کہ ہندوستان میں جمہوریت ختم ہوگئی ہے، تو دیگر لیڈر نے کہا کہ اس فیصلے سے قومی سلامتی کو خطرہ پیدا ہوگیا ہے۔ یہ ہمارے مخالفین کی زبان ہے۔ مسٹر مودی نے کہا کہ ہم جموں و کشمیر میں دفعہ 370 کی مخالفت اس دن سے کرتے آرہے تھے، جس دن سے ہماری پارٹی کا جنم ہوا تھا۔ تاریخ میں جب بھی 370 پر بحث ہوگی تو ملک کے مفاد میں کئے گئے فیصلے کی مخالفت کرنے والوں کااور ان کے بیانات کا ذکر ضرور ہوگا۔ ملک کے اتحاد وسالمیت میں کانگریس کو ہندو مسلمان نظر آتا ہے۔ کانگریس کہتی ہے کہ کشمیر کا مسئلہ ہندوستان کااندرونی معاملہ نہیں ہے۔ کانگریس کے ایک اور لیڈر نے کہا کہ یہ ملک کو برباد کرنے والا فیصلہ ہے۔ انہوں نے پوچھا کہ کیا ایسے بیان دینے والوں کو آپ معاف کریں گے؟ مسٹر مودی نے کہا کہ مرکزی حکومت نے جل جیون مشن شروع کیا ہے۔ اس کے تحت آئندہ پانچ برسوں میں صرف پانی کے لئے ساڑھے تین لاکھ کروڑ روپے خرچ کئے جائیں گے۔ پانی کے لئے اتنی سنجیدہ کوشش ہندوستان میں تو کیا دنیا کے تاریخ میں بھی نہیں کی گئی ہوگی۔ مہاراشٹر میں بی جے پی نے 2022 تک ہر گھر پانی پہنچانے کاعزم کیا ہے۔ یہ عزم ایسے ہی نہیں کیا گیا، اس کے پیچھے مہاراشٹر حکومت کے گزشتہ پانچ برسوں کا ٹریک ریکارڈ شامل ہے۔ انہوں نے آبپاشی سے لے کر کمائی کی فکر، مہا گٹھ بندھن حکومت نے کی ہے۔ خشک سالی کی وجہ سے جب آفت آئی تو حکومت نے فوری طور پر مدد پہنچائی۔ ڈیزاسٹر ریلیف ہو یا فصل انشورنس، ہر طرح کی مدد پہنچائی۔ اب کسانوں کے کھاتوں میں راست امدادی رقم پہنچائی جا رہی ہے۔ مسٹر مودی نے کہا کہ آپ سب اس بات کے گواہ ہیں کہ پہلے کسی نہ کسی طرح سے ہر جگہ بچولیوں کی حکومت تھی۔ غریبوں کے راشن اورآپ کی کمائی تک میں کٹ لگتا تھا۔ بچولیوں کے کھیل کو مکمل طور پر بند کر دیا گیا ہے۔ آج تقریباً 400 منصوبوں کا پیسہ راست طور پر فائدہ کنندگان کے کھاتوں میں پہنچ رہا ہے۔ آج سڑک، ریل، پل اور اسپتال جیسی جدید سہولیات میں تیزی سے اضافہ ہورہا ہے اور یہ فوائد دور دراز کے علاقوں میں بھی مل رہے ہیں۔ تنہا مراٹھواڑہ میں ہی تقریباً 50،000 کروڑ روپے کی سڑک بن رہی ہیں۔ گزشتہ پانچ سالوں میں یہاں اپنی مدد آپ گروپوں کی تعداد میں کئی گنا اضافہ ہوا ہے۔ انہوں نے کہا کہ مہاراشٹر بی جے پی کا عہد ہے کہ آنے والے پانچ برسوں میں مزید ایک کروڑ بہنوں کو اس بچت گروپ کی مہم سے منسلک کیا جائے گا۔