دھولیہ(اسٹاف رپورٹر) شہر دھولیہ میں مسلم آبادی کا قلب کہلانے والا علاقہ مولوی گنج میں گندگی کے متعلق بہت زیادہ خبر شائع ہوچکی ہے، لیکن گندگی کا انبار ختم نہیں ہوتا ہے۔ سماجی خدمتگار بار بار مطالبہ کرتے رہتے ہیں، لیکن بدعنوانی کو اتنا عام کردیا گیا ہے کہ سماجی اراکین کی باتوں کو نظر انداز کردیا جاتا ہے۔ ۱۵؍ اکتوبر کو ملک کے سابق صدر جمہوریہ اے پی جے عبدالکلام کی یوم پیدائش کے موقع پر شہر کی متعدد اسکولوں میں پروگراموں کا انعقاد کیا گیا تھا۔ مولوی گنج میں واقع کارپوریشن کی اسکول نمبر ۲۵؍ کے گیٹ پر کچرا اور گندگی ہمیشہ پائی جاتی ہے، اس ضمن میں کارپوریٹرس حضرات نے توجہ دینا ضروری نہیں سمجھا۔ بچوں کی صحت پر کتنے برے اثرات مرتب ہوں گے، اس کی پرواہ کسی کو نہیں ہے، کیونکہ کارپوریشن کی اسکولوں میں غریب گھرانوں کے بچے تعلیم حاصل کرتے ہیں۔ غریبوں کے لیے کون آواز اٹھائے گا؟ اسکول کے اسٹاف نے کئی بار سماج خدمتگاروں کے کانوں پر بات ڈالی ہیں لیکن وقتی طور پر صفائی ہوتی پھر سے گندگی کا انبار لگ جاتا ہے۔ کل سابق صدر جمہوریہ کے یوم پیدائش پر گیٹ کے باہر کچرا دیکھ کر چند اساتذہ نے ناراضگی کا اظہار کیا۔ اس ضمن میں شہر کے معروف سماجی کارکن جمیل یوسف شاہ اور عبدالحفیظ انصاری نے فوری طور پر کارپوریشن کے ہیلتھ افسر سے فون پر رابطہ کیا، عبدالحفیظ انصاری کے مطابق ہیلتھ افسر نے بہانہ بازی کرتے ہوئے انکار کردیا۔ صفائی انسپکٹر سے کچرے کے متعلق بات کی گئی تو اس نے کہا کہ ہماری کچھ مجبوریاں ہیں ہم یہ کام نہیں کرسکتے ہیں۔ عبدالحفیظ انصاری نے روزنامہ ممبئی رابطہ سے رابطہ قائم کرکے کہا کہ فون پر کارپوریشن کے صفائی انسپکٹر نے کہا کہ کچرے کا وزن کروانے کی جگہ ۹۰۰۰۰؍ روپئے بل میونسپل کارپوریشن نے روک رکھا ہے۔ جب تک بل ادا نہیں کردیا جاتا ہے، تب تک کچرا اُٹھانا اور صاف صفائی کرنا ہمارے اختیار میں نہیں رہے گا۔ ہیلتھ افسر، صفائی انسپکٹر اور ٹھیکیدار کے منفی جوابات سن کر سماجی خدمتگار مشتعل ہوگئے ہیں۔ کارپوریشن میں ٹیکس کی شرح کارپوریٹرس نے اجلاس میں زیادہ کر رکھی ہے، لیکن عوام کو سہولت دینے میں ناکام رہے ہیں۔ کروڑوں کا ٹھیکہ دینے کے بعد شہر میں گندگی اور کچرے کا ابنار لگا رہے گا تو اس کی ذمہ داری کون لے گا؟ روزانہ کچرے کا ڈھیر پڑا رہتا ہے، تعفن پھیلتا ہے، راہگیروں کو تکلیف پہنچتی ہیں اسی طرح اسکول کے معصوم بچوں کو کچرے اور گندگی سے روز سامنا کرنا پڑتا ہے۔اساتذہ کرام خود چاہتے ہیں کہ صاف صفائی کا خیال رکھا جائے لیکن مجبور ہوتے کہ شکایت کریں تو کس سے کریں۔ لیکن کچھ مخصوص مواقع پر صفائی کا خیال رکھنا نہایت ضروری ہوتا ہے۔ میزائل مین عبدالکلام کی یوم پیدائش پر صفائی نہ کروانے میں کارپوریٹرس کی نااہلی صاف طور پر ظاہر ہوتی ہے۔ اپنے وارڈ کی ریکھ دیکھ چھوڑ کر بی جے پی کے امیدوار کا کام کرنے والوں سے عام عوام بہت غصے میں ہیں۔ وارڈ کے ایک ووٹر نے کہا کہ کارپوریٹرس خود تو کام نہیں کررہے ہیں اور فرقہ پرست پارٹی کے امیدوار کو ووٹ دلانے کے لیے جھوٹ پر جھوٹ بول رہے ہیں۔ جو کام بی جے پی کے امیدوار نے نہیں کیا اسے بھی بی جے پی کےامیدوار سے منسوب کر رہے ہیں۔ ہمارے بنیادی مسائل پر بات نہیں کرنے پر آئندہ انتخابات میں انہیں شکست دے کر گھر پر بٹھا دیں گے۔