ممبئی : کانپور میں آئی لو محمد لکھنے پر کیس درج کئے جانے کے خلاف مہاراشٹر اور ممبئی میں احتجاجی مظاہرہ کا سلسلہ دراز ہے ممبئی میں آئی لو محمد صلی اللہ علیہ وسلم وسلم کے بینر نکالنے پر تنازع کے بعد اب ممبئی میں پولیس سوشل میڈیا پر نظر رکھ رہی ہے اس کے ساتھ ہی بینر تنازع کو حل کر نے کیلئے پولیس نے مسلمانوں سے اپیل کی ہے کہ وہ عوامی مقامات پر بینر لگانے سے گریز کرے کیونکہ اس سے نظم و نسق کا مسئلہ پیدا ہونے کا خطرہ لاحق ہے. ممبئی میں بینر کو نقصان پہنچانے یا شرپسند عناصر کی بینر کیخلاف شر انگیزی سے ماحول خراب ہونے کے خطرہ سے پولیس ذرائع نے انکار نہیں کیا ہے جبکہ پولس تمام پہلوؤں پر نگرانی رکھ رہی ہے۔

ممبئی ہی نہیں مہاراشٹر بھر میں آئی لو محمد صلی اللہ علیہ وسلم کے بینر آویزاں کئے جا رہے ہیں مہاراشٹر کے بیڑ، پربھنی، ناندیڑ، احمد نگر، ناسک، مالیگاؤں، اورنگ آباد، عثمان آباد، بھیونڈی، تھانہ سمیت تمام اضلاع میں آئی لو محمد کے بینر تلے جلوس نکالے جارہے ہیں گزشتہ شب اہلیہ نگر احمد نگر میں بھی کانپور میں آئی لو محمد لکھنے پر کیس درج کئے جانے کے خلاف احتجاجی مظاہرہ کیا گیا۔ اہلیہ نگر احمد نگر میں احتجاجی مظاہرہ کے دوران عاشقان رسول صلی اللہ علیہ وسلم نے ہاتھوں میں آئی لو محمد کی تختیاں اٹھا رکھی تھیں اس احتجاجی مظاہرہ میں ایک ہزار سے 12 سو مظاہرین شامل ہوئے تھے اس مظاہرہ میں تیرا میرا رشتہ کیا لا الہ اللہ، غلام ہے غلام ہے رسول کے غلام ہے, لبیک یا رسول اللہ لبیک یا رسول اللہ، دیکھو میرے نبی کی شان بچہ بچہ ہے قربان جیسے نعرے بھی لگائے گئے۔ پولیس نے اس موقع پر سخت حفاظتی انتظامات کئے تھے مہاراشٹر اور ممبئی میں آئی لو محمد کے بینر آویزاں کئے جانے کے ساتھ ہی احتجاجی مظاہرہ بھی کیا جارہا ہے۔

ممبئی کے بائیکلہ، ساکی ناکہ، گوونڈی میں بینر آویزاں کر نے پر تنازع پیدا ہوگیا تھا اس کے ساتھ ہی بائیکلہ میں آئی لو محمد کی تختیاں لے کر احتجاجی کر نے پر کیس درج کیا گیا پولیس نے اس کی وضاحت کی ہے کہ یہ کیس بلا اجازت جلوس نکالنے پر درج کیا گیا ہے۔

ممبئی : ممبئی، مہاراشٹر میں یوتھ کانگریس کو پہلی بار ایک خاتون صدر ملی ہے۔ تنظیم کے حال ہی میں مکمل ہونے والے اندرونی انتخابات میں زینت شبرین نے تاریخی کامیابی درج کی ہے۔ انہوں نے صدر کے عہدے کے لیے سب سے زیادہ یعنی 10,076 ووٹ حاصل کرکے ایک نیا ریکارڈ بنایا اور اپنے آٹھ دیگر حریفوں کو پیچھے چھوڑ دیا۔ آپ کو بتا دیں کہ کانگریس کے یوتھ ونگ میں عہدیداروں کا انتخاب 16 مئی سے 17 جون کے درمیان ہوا تھا۔ اس الیکشن میں صدر کے عہدے کے لیے نو امیدوار میدان میں تھے۔ اتوار کو نتائج کا اعلان کیا گیا جس میں زینت شبرین نے کامیابی حاصل کی۔ پیر کو پارٹی نے ایک سرکاری پریس ریلیز کے ذریعے ان کی جیت کی تصدیق کی۔

زینت شبرین کا منفرد امتیاز یہ ہے کہ ان کا تعلق کسی سیاسی گھرانے سے نہیں ہے۔ اپنی جیت کے بعد، انہوں نے کہا کہ وہ ممبئی یوتھ کانگریس کو ممبئی کے نوجوانوں کی آواز بنانے کے لیے کام کریں گی۔ انہوں نے کہا کہ انڈین یوتھ کانگریس، جو کہ غیر سیاسی پس منظر سے آتی ہے، نے انہیں اتنا بڑا پلیٹ فارم دیا ہے۔ وہ انڈین نیشنل کانگریس، ممبئی کانگریس، مہاراشٹر کانگریس، اور ممبئی یوتھ کانگریس فیملی کی ان پر اعتماد کرنے کے لیے شکر گزار ہیں۔ شبرین نے مزید کہا کہ تنظیم کانگریس کے رکن پارلیمنٹ راہول گاندھی اور آئی وائی سی کے قومی صدر ادے بھانو چِب کی قیادت میں جمہوریت اور آئین کے تحفظ کے لیے لڑتی رہے گی۔ انہوں نے یہ بھی کہا کہ وہ تنظیم کو مضبوط بنانے کے لیے مسلسل کوششیں کریں گی۔

شبرین نے واضح کیا کہ ان کی ترجیح ممبئی کے نوجوانوں سے متعلق مسائل کو اٹھانا ہوگی۔ وہ شہر کے نوجوانوں کو درپیش روزگار، تعلیم اور دیگر چیلنجوں سے نمٹنے میں فعال کردار ادا کرنے کا ارادہ رکھتی ہے۔ انہوں نے کہا کہ اس کا مقصد نوجوانوں کی آواز کو بااختیار بنانا ہے۔ زینت شبرین کی جیت سے پارٹی کارکنوں میں کافی جوش و خروش پایا جاتا ہے۔

پنجاب، 22 ستمبر : رضا اکیڈمی ممبئی کے سربراہ الحاج محمد سعید نوری کی قیادت میں ایک بڑا وفد پنجاب کے شدید سیلاب زدہ علاقوں میں راحت رسانی کی سرگرمیوں میں مصروف ہے۔ قافلہ ممبئی سے دہلی کے راستے لدھیانہ پہنچنے کے بعد پٹھان کوٹ، امرتسر، جالندھر اور گرداسپور کے متاثرہ دیہات کا دورہ کر رہا ہے۔

الحاج محمد سعید نوری نے کہا کہ مشکل کی اس گھڑی میں پوری قوم کو سیلاب متاثرین کی مدد کے لئے آگے آنا چاہیے۔ انہوں نے بتایا کہ پنجاب کے متعدد اضلاع میں تباہ کن سیلاب نے گاؤں کے گاؤں بہا دیے، گھروں کا سارا سامان برباد ہوگیا اور ہزاروں مویشی بھی بہہ گئے۔ بارڈر کے قریب کے علاقے سب سے زیادہ متاثر ہوئے ہیں جہاں کئی جانور بہہ کر سرحد پار چلے گئے اور بعض کسانوں کے بچے بھی پانی میں بہہ گئے۔

ادارۂ شرعیہ پنجاب کے مولانا فاروق رضوی کے مطابق نقصان اس قدر شدید ہے کہ اس کا اندازہ لگانا مشکل ہے۔ ایسے میں رضا اکیڈمی ممبئی، آل انڈیا سنی جمعیت العلماء ممبئی، جمعیت علمائے اہلسنت ممبئی اور ادارۂ شرعیہ پنجاب مشترکہ طور پر متاثرین کو اشیائے ضروریہ، غذائی سامان، جانوروں کے چارے اور کھیتوں کے لئے ڈیزل فراہم کر رہے ہیں۔

متاثرہ کسانوں کی فوری ضرورت کو دیکھتے ہوئے الحاج محمد سعید نوری نے اعلان کیا کہ کھیتوں کو دوبارہ تیار کرنے میں مدد دینے کے لئے 100 ٹریکٹروں میں ڈیزل مفت فراہم کیا جائے گا۔ رضا اکیڈمی نے یہ بھی فیصلہ کیا ہے کہ جانوروں کے لئے چارے کی فراہمی کو یقینی بنایا جائے گا تاکہ زندہ بچ جانے والے مویشیوں کو خوراک میسر آسکے۔

پنجاب کے علما اور مقامی رہنماؤں نے رضا اکیڈمی کی اس بڑی انسانی خدمت کا خیر مقدم کرتے ہوئے کہا کہ یہ اقدام متاثرین کے لئے زندگی کی نئی امید لے کر آیا ہے. اس وفد میں مولانا اعجاز کشمیری ممبئ, مولانا عباس رضوی ممبئ, حافظ قاری محمد نورانی شاہ جامعہ مجددیہ رضویہ پھگواڑہ کپورتھلہ پنجاب, حافظ طالب حسین رضوی غوثیہ مسجد جالندھر پنجاب, مولانا ذاکر حسین رضوی جالندھر پنجاب, مولانا اصغر علی جالندھر پنجاب, کے علاوہ پنجاب کے دیگر اضلاع کے علماء وائمہ شامل رہے جن کے نام معلوم نہ ہوسکے