ممبئی : ممبئی عید الاضحی پر امن وامان کو یقینی بنانے اور مویشیوں کی منڈی بند رکھنے کی تجویز کو بھی وزیر اعلیٰ دیویندر فڑنویس نے واپس لے لیا ہے۔ اس سے قبل عیدالاضحی کے دوران جانوروں کی منڈی بند رکھنے کی تجویز پیش کی گئی تھی, جس کی مسلمانوں نے مخالفت کی اور اس کے بعد اب اس فیصلہ کو بھی واپس لیا گیا ہے۔ ممبئی عیدالاضحی سے قبل مہاراشٹر کے وزیر اعلی دیویندر فڑنویس نے پرامن ماحول میں عیدالاضحی کے لئے ضروری احکامات جاری کئے ہیں۔ مسلم نمائندوں کی میٹنگ میں وزیراعلی نے مسلمانوں کے تمام مطالبات منظور کئے, اور دیونار میں بکرا منڈی میں سہولیات فراہم کرنے سے لے کر قربانی کے دوران ضروری اقدامات کرنے کی بھی یقین دہائی کروائی ہے۔ ابوعاصم اعظمی نے بتایا کہ بی جے پی لیڈر کریٹ سومیا اور نتیش رانے ماحول خراب کرنے کی کوشش کر رہے ہیں, وہ سوسائٹی پر دباؤ ڈالنے کے لئے قربانی نہ ہونے کا اعلان کر رہے ہیں, لیکن جن سوسائٹی میں قربانی ہوتی ہے, ان سوسائٹی میں قربانی کے عمل میں کوئی بھی رخنہ اندازی نہ ہو یہ مطالبہ بھی وزیر اعلیٰ سے کیا گیا۔ قربانی کے دوران شرپسندوں کی شرانگیزی پر نظر رکھنے اور سماج دشمن عناصر کے خلاف ضروری کارروائی کا بھی مطالبہ مسلم نمائندوں نے کیا۔ وزیر اعلیٰ نے یقین دلایا کہ ہر سال کی طرح امسال بھی قربانی کا عمل پرامن طریقے سے اختتام پذیر ہوگا۔ انہوں نے مسلمانوں کے تمام مطالبات کو منظور کرتے ہوئے ہر مسئلہ پر خصوصی غور و خوص کیا ہے۔ ابو عاصم اعظمی نے کہا کہ قربانی پر شرپسندوں کی شرانگیزی پر قدغن لگانے کی ضرورت ہے, تاکہ حالات پرامن رہے۔ دیونار میں جانوروں کے بیوپاریوں کو کسی بھی قسم کی کوئی دشواری نہ ہو, اس کی بھی ہدایت دی گئی ہے, ساتھ ہی ۳۶ گھنٹے تک جانوروں کی گاڑیاں خالی نہ ہونے سے بیوپاریوں کی پریشانی پر بھی بات کی گئی, ساتھ ہی اضافی فیس وصولی پر بھی وزیر اعلی نے روک لگائی ہے۔

اہم میٹنگ میں وزیر اعلی دیویندر فڑنویس نے یقین دلایا کہ ہر سال کی طرح اس بار بھی عید الاضحی پر سہولیات فراہم کی جائیں گی، امن و امان کا خیال رکھا جائے گا۔ جانوروں کی منڈی بند رکھنے کی تجویز واپس لے لی گئی اور قربانی کے جانوروں کی 200 روپے فیس کم کر کے 20 روپے کردی گئی۔ بدعنوانی کرپشن میں ملوث افراد کے خلاف کارروائی کا حکم بھی وزیر اعلی نے جاری کیا, نفرت پھیلانے والے ہندو مسلم تفریق پیدا کر کے عید پر ماحول خراب کرنے کی کوشش کر رہے ہیں، ان فرقہ پرستوں کی زبان بندی کا بھی مطالبہ اعظمی نے کیا ہے ۔ قربانی کے دوران نظم و نسق کی برقراری پر خاص توجہ دینے کی وزیر اعلی نے ہدایت کی ہے۔

وزیر اعلی کو ابو عاصم اعظمی نے بتایا کہ جانوروں کی گاڑی خالی کروانے کے لئے اضافی فیس وصولی کی گئی ۲۰۰ کے بجائے ۵۰۰ روپیہ وصول کیا گیا, پارکنگ کا ۳ ہزار سے پانچ ہزار روپیہ جبرا وصول کیا گیا, جو بیوپاری کا بکرا عیدالاضحی میں فروخت نہیں ہوتا, اس کی فیس واپس کی جائے۔ پہلے دیونار بکرا کی فیس 200 روپیہ ہوا کرتی تھی, اسے 20 کیا جائے۔ دیونارمیں بکرا اتارنے کے پانچ دروازے گیٹ پانچ دھکا گیٹ کیا جائے, اس کے ساتھ ہی قربانی کے دوران خریداروں کی بھیڑ ہوتی ہے, گاہکوں کی سہولت کے لئے تین کھڑکی شروع کی جائے۔ یہ تمام مطالبات کو وزیر اعلی نے منظوری دیتے ہوئے ضروری احکامات بھی جاری کئے ہیں۔

عیدالاضحیٰ کے مقدس موقع پر، لوک سبھا رکنِ پارلیمنٹ اور ممبئی کانگریس کی صدر محترمہ پروفیسر ورشاتائی گائیکواڑ صاحبہ کی قیادت میں ایک وفد نے دیو نار بکرا منڈی (سلاٹر ہاؤس) کا دورہ کیا۔ اس موقع پر انہوں نے دیونار سلاٹر ہاؤس کے جنرل مینیجر جناب کلیم پاشا پٹھان سے خصوصی ملاقات کی اور منڈی میں موجود عوام و تاجروں کو درپیش مسائل پر تفصیل سے گفتگو کی۔

گفتگو کے اہم نکات درج ذیل رہے :

تاجروں کو درپیش مشکلات
جانوروں کی دیکھ بھال اور نگہداشت
منڈی میں صفائی کی صورتحال
ٹریفک کے مسائل اور ان کا حل
عام شہریوں کو ہونے والی دشواریاں

پروفیسر گائیکواڑ صاحبہ نے ان تمام مسائل کے جلد از جلد حل کے لیے متعلقہ حکام کو ضروری ہدایات دیں اور یقین دلایا کہ ممبئی کانگریس عوام کے ساتھ کھڑی ہے۔ اس اہم دورے میں محترم رکنِ اسمبلی جناب اسلم شیخ صاحب، محترم رکنِ اسمبلی جناب امین پٹیل صاحب، رکنِ اسمبلی ڈاکٹر جیوِتی تائی گائیکواڑ صاحبہ، سابق کارپوریٹر اور ممبئی کانگریس اقلیتی شعبہ کے سابق چیئرمین حاجی ببّو خان صاحب اور ممبئی کانگریس کے دیگر سینئر قائدین و عہدیداران بھی موجود تھے۔ یہ دورہ باہمی بات چیت، مسائل کی نشاندہی اور ان کے حل کے لیے مؤثر اقدام کی ایک مثبت کوشش تھی، جو عید جیسے مبارک موقع کو مزید بامعنی بناتا ہے۔

ممبئی : داعش اور اسٹوڈنٹس اسلامک موومنٹ آف انڈیا (سیمی) کے سابق رکن ثاقب ناچن کے سمیت اس کے۲۲معتمد خاص ارکان و رشتہ داروں کے گھروں مہاراشٹر انسداد دہشت گردی دستہ اے ٹی ایس نے چھاپہ مار کارروائی کرتے ہوئے کئی اہم دستاویزات اور اسباب ضبط کرنے کا دعوی کیا ہے۔ اے ٹی ایس کو اطلاع ملی تھی کہ ثاقب ناچن اور اس کے معتمد خاص کے گھروں پر اہم دستاویزات اور دیگر اسباب چھپائے گئے ہیں, جس کے بعد اے ٹی ایس کارروائی کو انجام دیتے ہوئے گزشتہ شب ۲ بجے چھاپہ مار کارروائی شروع کی اور یہ کارروائی صبح ۴ بجے تک جاری رہی, جس کے بعد اے ٹی ایس کی ٹیم ممبئی روانہ ہوگئی۔ اس آپریشن کے دوران اے ٹی ایس کی ٹیم نے پورے علاقہ کا محاصرہ بھی کیا تھا۔

بوریولی پڑگھا میں اے ٹی ایس نے عابد اشرف ملا، معاذ ملا، عاقب ثاقب ناچن، عبدالطیف شاداب کاسکر، ارمیش عرفان ملا، ہاشم ندوی، فاروق ملا، نبیل ملک کھوت، قیص عارف کھوت، کیف ناچن، ساحل منیار، عدنان ملا، شیرو دیوکر، شرجیل ناچن، ساجد ناچن، ذیشان ملا، عاطف ملا، شمس کھوت اسجد ملا، رائف کھوت، عابد کھوت چھاپہ مار کارروائی کو انجام دیا ہے اس دوران کچھ سفر حج پر گئے تھے۔ اس لئے وہ گھر پر موجود نہیں تھے, اس معاملہ میں اے ٹی ایس نے کارروائی کو انجام دیا اور گھروں کی تلاشی کے دوران کسی کو بھی گرفتار نہیں کیا ہے۔ زبیر ملا چھوٹی مسجد کے ساکن جو زمین کی دلالی کرتا ہے, حج کے سفر پر تھا زبیر ملا ۲۰۰۲ اور ۲۰۰۳ بم دھماکوں میں مجرم قرار دیا گیا اور اسے سزا بھی ہوئی ہے, اب وہ دلی میں داعش کے کنکشن کے معاملہ میں ثاقب ناچن کے ساتھ دلی جیل میں مقید ہے۔ عبدالطیف کاسکر گوڈام میں زیر ملازمت ہے یہ بھی دلی داعش کیس میں فرحان سوسے کا دوست ہے۔ شمس کھوت، رئیس کھوت، عابد اشرف ملا، معاذ اشرف ملا، قیص آصف کھوت تلاشی کے دوران گھر پر موجود نہیں تھے, جبکہ ساحل منیار کے کلیان کے گھر پر چھاپہ مار کارروائی کی گئی وہ بھی یہاں موجودنہیں تھا۔

اے ٹی ایس نے ثاقب ناچن کو ۲۰۱۷ سے ہی دوبارہ دہشت گردانہ سرگرمیوں میں سرگرم پایا تھا۔ اس دوران اے ٹی ایس نے اس پر نظر رکھی تھی اور اس پر کیس بھی درج کیا گیا تھا, لیکن اس معاملہ میں داعش کے کیس میں این آئی اے نے ثاقب ناچن کو گرفتار کر لیا تھا پہلے اس کے فرزند عاقب ناچن کو گرفتار کیا گیا تھا اور پھر ثاقب کی بھی گرفتاری عمل میں لائی گی اے ٹی ایس نے کارروائی کے دوران کئی اہم دستاویزات ضبط کرنے کا بھی دعوی کیا ہے, جس کی تفتیش کی جائے گی اور پھر اسی مناسبت سے کارروائی میں پیش رفت ہوگی ۔ مہاراشٹر اے ٹی ایس نے ممبئی تھانہ بھیونڈی کلیان سمیت ۱۵ مقامات پر چھاپہ مار کارروائی کی ہے, اور اسی دوران داعش کے مشتبہ ارکان کے خلاف بھی کارروائی کی گئی ہے اس کارروائی میں اے ٹی ایس کو کافی اہم دستاویزات اور ثبوت ملنے کی امید ہے ۔ اے ٹی ایس نے اس معاملہ میں جو کارروائی کی ہے ان پر ملک مخالف اور غیر قانونی سرگرمیوں میں ملوث ہونے کا الزام ہے۔ اے ٹی ایس اس معاملہ میں مزید کارروائی کر رہی ہے, جبکہ اب تک کسی کی تلاشی کے بعد گرفتاری عمل میں نہیں لائی گئی ہے۔