ممبئی : ممبئی اندھیری اوشیوارہ علاقہ میں نقب زنی کے معاملہ میں پولس نے ایک جرائم پیشہ چورکو گرفتار کر کے نقدی اور سونے کے زیورات و مسروقہ سامان ضبط کرنے کا دعوی کیا ہے تفصیلات کے مطابق ۲۹ دسمبر ۲۰۲۵ کو نامعلوم چور نے روشن دان توڑ کر گھر میں داخلہ لیا اور گھر میں موجود ایک لاکھ سے زائد نقدی اور سونے چاندی کے زیورات الماری سے لے کر فرار ہو گیا پولس کو سراغ ملا کہ ملزم اسی علاقہ کا ساکن ہے جس کی بنیاد پر تفتیش میں پیش رفت ہوئی اور ۳ جنوری کو اسے زیر حراست لیا گیا اس نے تفتیش میں اعتراف جر م کر لیا ملزم ایک جرائم پیشہ ہے اور اس کے خلاف ۱۴ معاملات درج ہیں اس نے زیورات جوہری کے یہاں فروخت کیے تھے اس کے پاس سے مکمل مسروقہ مال برآمد کرنے کا بھی دعویٰ پولس نے کیا ہے ۔یہ کارروائی ممبئی پولس کمشنر دیوین بھارتی کی ایما پر ایڈیشنل کمشنر پرم جیت سنگھ دہیا اور ڈی سی پی دکشت گیدام نے انجام دی ہے ۔

ٹھانے : امبرناتھ میونسپل کونسل کی سیاست میں ایک حیران کن پیش رفت سامنے آئی ہے۔ حالیہ بلدیاتی انتخابات کے بعد بھارتیہ جنتا پارٹی (بی جے پی) اور کانگریس نے مل کر اتحاد قائم کیا، جس کے نتیجے میں شیوسینا اقتدار حاصل کرنے میں ناکام رہی، حالانکہ وہ سب سے بڑی جماعت کے طور پر ابھری تھی۔

انتخابی نتائج میں شیوسینا کو سب سے زیادہ نشستیں حاصل ہوئیں، مگر واضح اکثریت نہ ملنے کے باعث وہ حکومت بنانے سے قاصر رہی۔ اس صورتحال کا فائدہ اٹھاتے ہوئے بی جے پی نے کانگریس اور دیگر اتحادی جماعتوں کے ساتھ مل کر اکثریتی عدد پورا کیا اور میونسپل کونسل میں نئی حکمرانی تشکیل دی۔

نئے اتحاد نے دعویٰ کیا ہے کہ اس کا بنیادی مقصد شہر کی ترقی، بہتر نظم و نسق اور مستحکم بلدیاتی انتظام فراہم کرنا ہے۔ اتحاد کے تحت بی جے پی کو کونسل میں اہم عہدہ سونپا گیا، جبکہ شراکت دار جماعتوں کو بھی اقتدار میں حصہ دیا گیا۔

اس سیاسی جوڑ توڑ پر شیوسینا نے سخت ردِعمل ظاہر کرتے ہوئے اسے عوامی مینڈیٹ کے خلاف قرار دیا اور الزام عائد کیا کہ اقتدار کی خاطر نظریاتی اختلافات کو نظر انداز کیا گیا ہے۔ پارٹی رہنماؤں نے کہا کہ شیوسینا ایک مضبوط حزبِ اختلاف کے طور پر عوامی مسائل کو اجاگر کرتی رہے گی۔

سیاسی مبصرین کے مطابق شہری بلدیاتی اداروں میں ایسے غیر روایتی اتحاد اب عام ہوتے جا رہے ہیں، جہاں نشستوں کا حساب اور مقامی سیاسی حالات، ریاستی اور قومی سیاست سے مختلف راستہ اختیار کرتے ہیں۔

امبرناتھ میونسپل کونسل میں بننے والا یہ نیا سیاسی اتحاد مہاراشٹر کی بلدیاتی سیاست میں بدلتے رجحانات کی عکاسی کرتا ہے اور آنے والے دنوں میں دیگر شہری اداروں پر بھی اس کے اثرات مرتب ہو سکتے ہیں۔

ممبئی بلدیاتی انتخابات سے قبل پارٹی سے ناراض لیڈران کی دیگر پارٹیوں میں ہجرت کا سلسلہ شروع ہو گیا ہے. مہاراشٹر نونرمان سینا کو بلدیاتی انتخاب سے قبل زبردست جھٹکا لگا ہے. ایم این ایس کے کئی لیڈران نے شیوسینا شندے سینا میں شمولیت اختیار کرلی ہے, اس کے ساتھ ہی راج ٹھاکرے کے قریبی سنتوش دھوری نے بی جے پی میں شمولیت اختیار کی تھی. اس کے بعد بھی اب پارٹی تبدیلی کا سلسلہ تھمنے کا نام نہیں لے رہا ہے اور ایم این ایس کے کئی اعلیٰ لیڈران نے شیوسینا ایکناتھ شندے میں شمولیت اختیار کر کے پارٹی سے بغاوت کا علم بلند کیا تھا۔ ممبئی میں بی ایم سی الیکشن سے قبل راج اور ادھو ٹھاکرے نے انتخابی اتحاد کیا تھا, لیکن ان پارٹیوں کے باغی لیڈران اب بھی پارٹی سے علیحدگی اختیار کر رہے ہیں, جس کے سبب دونوں پارٹیوں میں بغاوتوں کا سلسلہ دراز ہے ٹکٹ نہ ملنے سے نالاں کئی لیڈران اپنی پارٹی کا دامن چھوڑ کر دوسری پارٹیوں میں شرکت کر رہے ہیں۔ مہاراشٹر نو نرمان سینا کے جنرل سکریٹری راجا بھاؤ چوگلے، ایم این ایس کے ترجمان ہیمنت کامبلے، ایم این ایس چترپت سینا کے جنرل سکریٹری راہل توپالونڈھے، مہاراشٹر نو نرمان ودیارتھی سینا سندیش شیٹی، منور شیخ، اشیش مارک، پرتھمیش بنڈیکر، سنتوش یادو نے نائب وزیر اعلیٰ ایکناتھ شندے کی موجودگی میں شیوسینا میں شمولیت اختیار کی۔ اس موقع پر شندے نے ان سب کا پارٹی میں خیرمقدم کیا اور ان کے مستقبل کے لیے نیک خواہشات کا اظہار کیا۔ اس موقع پر شیو سینا کے جنرل سکریٹری راہل شیوالے، شیو سینا سکریٹری سوشانت شیلر، شیو سینا کی ترجمان شیتل مہاترے اور شیوسینا کے تمام مقامی عہدیدار اور کارکنان موجود تھے۔