ممبئی : مہاراشٹر سماجوادی پارٹی لیڈر ورکن اسمبلی ابوعاصم اعظمی نے احمد نگر میں توہین رسالت پر مسلمانوں کے احتجاجی مظاہرہ پر پولیس کارروائی کو غلط قرار دیا ہے. انہوں نے کہا کہ اہلیہ نگر میں جس طرح سے توہین رسالت کا ارتکاب کر کے آئی لو محمد زمین پر تحریر کر کے رنگولی بنائی گئی اور اس پر درگا دوڑ کا انعقاد کیا گیا تھا. ایسے میں مسلمانوں کا مشتعل ہونا فطری ہے۔ انہوں نے کہا کہ اس معاملہ میں پولیس نے میاں بیوی پر کیس درج کر لیا ہے. لیکن احتجاجی مظاہرہ کرنے والے مسلمانوں پر ہی توڑ پھوڑ اور تشدد برپا کرنے کا کیس درج کر لیا گیا ہے. ابوعاصم اعظمی نے کہا کہ آئی لو محمد کے نام پر ملک اور مہاراشٹر میں تشدد کی سازش کون کر رہا ہے, اس کے پس پشت کیا محرکات کار فرما ہے اس کی بھی تفتیش ہونی چاہئے. انہوں نے کہا کہ مسلمان آقا نامدار محمد مصطفی صلی اللہ علیہ وسلم سے محبت کرتا ہے اور ان کے نام کی بے حرمتی وہ قطعی برداشت نہیں کرسکتا. روز توہین رسالت صلی اللہ علیہ وسلم کا ارتکاب ہوتا ہے اور مسلمان اگر اس پر احتجاج کرتا ہے تو اس پر ہی کارروائی ہوتی ہے اس پر ڈنڈے چلائے جاتے ہیں۔

ابوعاصم اعظمی نے کہا کہ آئی لو محمد کے نام پر فرقہ پرست عناصر ماحول خراب کرنے کی کوشش کر رہے ہیں اور ہندوؤں اور مسلمانوں میں نفرت پیدا کر کے تشدد برپا کرنے کی سازش کر رہے ہیں. کچھ فرقہ پرستوں نے تو اب آئی لو محمد بنام آئی لو مہادیو بھی شروع کردیا ہے. انہوں نے کہا کہ احمد نگر اہلیہ نگر میں جس طرح سے حالات خراب ہوئے ہیں اس سے یہ محسوس ہوتا ہے کہ شرپسند عناصر نے آئی لو محمد کے نام پر ریاست میں امن وامان خراب کرنے کی سازش رچی ہے۔ ابوعاصم اعظمی نے نام لئے بغیر ایک ریاستی وزیر کو ہدف تنقید بناتے ہوئے کہا کہ مذکورہ بالا وزیر ریاست میں امن وامان مکدر کرنے کیلئے ایسی اشتعال انگیزی اور مسلمانوں کے خلاف زہر افشانی کرتا ہے, جس کا حقائق سے کوئی سروکار نہیں ہوتا. ممبئی میں بھی اس نے ماحول خراب کرنے کی کوشش کی تھی۔ اعظمی نے مطالبہ کیا ہے کہ توہین رسالت اور اہم اشخاص کی توہین کے خلاف ایک ایسا قانون تیار کیا جائے جس میں 10 سال سے زیادہ کی سزا ہو لیکن سرکار نے اب تک اسمبلی میں اس بل کو منظور نہیں کیا ہے اور حالات ابتر ہوگئے ہیں اس لئے میرا مطالبہ ہے کہ سرکار اس قسم کے قانون منظور کرے, جس سے اہم اشخاص کی توہین کا ارتکاب کرنے والوں کو ضمانت میسر نہ ہو۔

میرا روڈ (ایسٹ)، 2٩ ستمبر 2025 : ودربھ ویلفیئر ایسوسی ایشن، میرا-بھایندر یونٹ کے زیر اہتمام منعقدہ “اسٹوڈنٹس ایوارڈ ڈسٹری بیوشن پروگرام 2024-25” میں اکولہ مغرب اسمبلی حلقہ کے مقبول رکنِ اسمبلی جناب ساجد خان پٹھان نے اپنے خطاب میں کہا کہ تعلیم ہی ترقی کی اصل کنجی ہے۔ انہوں نے طلبہ کو محنت اور لگن کے ساتھ آگے بڑھنے کی تلقین کرتے ہوئے کہا کہ انسانیت اور بھائی چارے کی بنیاد درگزر اور محبت پر قائم ہے۔ جذباتی انداز میں انہوں نے کہا: ’’ودربھی بھائیوں کا یہ اعزاز میرے لیے رکنِ اسمبلی بننے کی خوشی سے بھی بڑھ کر ہے۔‘‘صدارت و مہمانانِ خصوصی پروگرام کی صدارت یونٹ صدر فیض اللہ شیخ نے کی۔ مہمانِ خصوصی مہاراشٹر پردیش کانگریس کمیٹی کے سینئر نائب صدر اور سابق ایم ایل سی جناب سید مظفر حسین کی نمائندگی ان کی صاحبزادی محترمہ آفرین مظفر حسین نے کی۔ اس موقع پر ڈاکٹر اسد اللہ خان غازی، ممتاز انڈسٹریلسٹ جناب سیف اللہ خان، اے ڈی جی پی آئی انڈین آرمی کے جناب مدھو سودن سوریے، گجانن ناگے سمیت کئی سماجی شخصیات موجود رہیں۔ ہونہار طلبہ کی پذیرائی تقریب میں ودربھ سے تعلق رکھنے والے ایس ایس سی، ایچ ایس سی، ڈپلومہ، گریجویٹ اور پوسٹ گریجویٹ سطح کے ہونہار طلبہ کو شیلڈ اور اسناد پیش کر کے تعلیمی یگانگت کا پیغام عام کیا گیا۔ شریک معززین و عہدیداران اس موقع پر ودربھ ویلفیئر ایسوسی ایشن ممبئی کے صدر ڈاکٹر ناظم الدین قاضی، جنرل سکریٹری سید ناصر علی، میرا-بھایندر یونٹ کے جنرل سکریٹری نعمت خان پٹیل، پروگرام انچارج کبیر شیخ، سابق صدر ایس۔ اے۔ خان، عبد الرحمن شیخ، خالد اختر خان، ڈاکٹر رفیق شیخ، پرمود سانگوڈے، زبیر قریشی، شریف الدین شیخ، پرویز ساحل، سید طارق غفار، مرزا اسماعیل بیگ، ڈاکٹر عبدالجلیل شیخ، محمد فیروز شیخ، عبدالشکیل جمادار، اقبال احمد خان، انصار صوفی، نجم الدین شیخ، سہیل احمد، محمد رفیع، حسن رادھنا پارہ، سید شفاقت علی، میڈیا انچارج و ایڈیٹر ظفر صدیقی، عارف شیخ، تجمل خان، شکیل خان، غالب جمادار سمیت بڑی تعداد میں عہدے دار اور سماجی کارکن شریک رہے۔ نتیجہ ریڈ الرٹ کی وارننگ کے باوجود یہ پروگرام جوش و خروش اور شاندار کامیابی کے ساتھ اختتام پذیر ہوا۔ اس تقریب نے یہ ثابت کر دیا کہ تعلیم اور قابل طلبہ کا اعزاز ہی معاشرے کی سب سے بڑی طاقت ہے۔

ممبئی : ممبئی پولیس نے دسہرہ پر دیوی وسرجن کی تصاویر اور ویڈیو وائرل کرنے پر پابندی عائد کر دی ہے, اگر کوئی 2 اکتوبر سے 4 اکتوبر کے درمیان ساحل سمندر پر دیوی کی مورتی کی تصاویر اور تصویر کشی کرتا ہے تو اس پر کارروائی ہوگی, کیونکہ اس سے مذہبی جذبات مجروح ہونے کے ساتھ نظم و نسق کا مسئلہ بھی لاحق ہے, ایسی صورتحال میں پولیس نے اپیل کی ہے کہ ساحل سمندر پر صاف صفائی اور مورتی کی تصاویر اور منظر کشی کرنا ممنوعہ ہے, اگر کوئی اس کی خلاف ورزی کرتا ہے تو اس کے خلاف 163 کے تحت کارروائی ہوگی. ڈی سی پی آپریشن اکبر پٹھان نے ممبئی پولیس کمشنر دیوین بھارتی کے حکم پر ایک حکمنامہ جاری کرتے ہوئے یہ واضح کیا ہے کہ سمندر اور دیگر مقامات پر وسرجن کی عکس بندی اور تصاویر کشی ممنوعہ ہے۔ اس کے ساتھ ہی اسے سوشل میڈیا پر نشر کرنے پر بھی پابندی عائد کی گئی ہے. کیونکہ ایسے میں امن وسلامتی مکدر ہونے کا خطرہ لاحق ہے اور مذہبی جذبات مجروح ہونے کا اندیشہ ہے, ایسے میں اگر کوئی ساحل سمندر پر مورتی کی عکس بندی کرنے کے ساتھ کھنڈٹ مورتی کی تصاویر اور ویڈیو وائرل کرتا ہے تو اس پر کارروائی ہوگی. یہ حکمنامہ 2 اکتوبر سے 4 اکتوبر تک نافذ العمل رہے گا۔ شہر میں نظم و نسق کی برقراری کیلئے وسرجن کے دوران مورتیوں کی تصاویر وائرل کرنے پر مکمل پابندی عائد کر دی گئی ہے. اکثر وسرجن کے بعد مورتیاں ساحل پر آجاتی ہیں. ایسے میں کھنڈٹ مورتیوں یعنی ٹوٹی ہوئی مورتیوں کی تصاویر اور ویڈیو وائرل ہونے سے کشیدگی پیدا ہونے کے ساتھ مذہبی جذبات بھی مجروح ہوتے ہیں. اس لئے پولیس نے یہ حکمنامہ جاری کر کے وسرجن کے دوران ساحل سمندر کی صاف صفائی اور مورتیوں کی تصاویر اور منظر کشی پر پابندی عائد کردی ہے