(خیال اثر )
ایک وقت تھا جب آل انڈیا کانگریس پارٹی ہندوستان کے لئے شجر سایہ دار تھی. پنڈٹ جواہر لال نہرو سے لے کر راجیو گاندھی تک طویل عرصہ تک اس پارٹی نے بلا شرکت غیرے راج کیا تھا. ایک سے بڑھ کر ایک مختلف مذاہب کے بااثر افراد نے اس پارٹی کی بنیادوں کو استحکام عطا کیا تھا لیکن پھر یوں ہوا کہ چند تانا شاہوں نے وہ باد سموم چلائی کہ اس تناور درخت کے سارے برگ و ثمر خزاں رسیدگی کا شکار ہو گئے یکے بعد دیگرے دیگر مذاہب کے با اثر افراد کو کنارے لگانے کہ کوشش کرتے ہوئے انھیں گوشہ گمنامی میں گم کردیا یا پھر یہ با اثر افراد خود ہی اپنی عزت نفس کو محفوظ رکھنے کے لئے کنارے ہوتے گئے حالانکہ کانگریس پارٹی نے اپنے طویل ترین اقتدار کے دوران پوری شد و مد سے ایک مخصوص فرقے کی ترجمان بن کر اسے ہی پروان چڑھایا تھا. میرٹھ, ملیانہ,نیلی,مرادا آباد, اسام, بھاگلپور,گجرات, بھیونڈی, ممبئی مالیگاؤں, جلگاؤں دھولیہ جیسے شہروں میں فساد کے ذریعے صرف ایک مخصوص مذہب کے افراد کو نشانہ بنانا ان کی املاک کو بے دردی سے لوٹنا دور کانگریس کا وطیرہ رہا ہے. اندرا گاندھی کے قتل کے بعد دہلی کی سڑکوں پر سکھ فرقہ کے افراد کو گاجر مولی کی طرح کاٹنا بھی کانگریسی دور کے زیر سایہ ترتیب دیا گیا تھا. اندرا گاندھی بھی اتنی زیرک اور فطین تھیں کہ ایسے ہر سانحہ کے بعد وہ اس میں بیرونی ہاتھ کی گہار لگاتے ہوئے اپنا دامن صاف بچا لے جاتی تھیں. بابری مسجد اور رام مندر کا شوشہ بھی اسی پارٹی نے چھوڑا تھا. اندرا گاندھی کے قتل کے بعد جب راجیو گاندھی وزیر اعظم کی کرسی پر براجمان ہوئے تو انھوں نے چند نا عاقبت اندیش فرقہ پرستوں کی شہ پر بابری مسجد کے شیلا نیاس کو عملی جامہ پہنا دیا. یہی وہ ناعاقبت اندیشانہ فیصلہ تھا جس نے کانگریس پارٹی کی کشتی کو بیچ منجدھار میں اس بے دردی سے غرقاب کردیا کہ اس ڈوبتی کشتی کو آج تک تنکے کا سہارا بھی نصیب نہیں ہوا. نسل کشی کے شکار لاکھوں افراد کی آہیں آج بھی کانگریس پارٹی کو بری طرح خوف و ہراس میں مبتلا کر رہی ہیں. برسوں اقتدار کا مزہ لوٹنے والی کانگریس پارٹی آج اپنے زخموں کو چاٹتے چاٹتے لب گور ہو کر رہ گئی ہے.آج کانگریس پارٹی کے مسلم با اثر ذمہ داران یکے بعد دیگرے منظم سازش کے تحت کنارے لگائے جارہے ہیں. غلام بنی آزاد جیسے متعبر کشمیری مسلمان لیڈر کو اس بے دردی سے کنارے لگایا گیا کہ مسلم فرقہ عالم حیرانی میں گم ہو کر رہ گیا. غلام نبی آزاد ہر محاذ پر مسلم طبقہ اور کانگریس پارٹی کے درمیان ایک مضبوط کڑی کے مانند تھے. کانگریس پارٹی پر جب بھی برا وقت آیا غلام نبی آزاد نے ایک ایسے پل (بریج)کا کام کیا ہے جس پر چلتے ہوئے کانگریس پارٹی با آسانی اقتدار کی چوکھٹ تک پہنچ جاتی تھی. غلام نبی آزاد ہی کی طرح گجرات کے احمد پٹیل بھی تھے جو آج مرحوم ہو کر کانگریسی لیڈران خصوصاً سونیا گاندھی کو بہت یاد آرہے ہیں. مرحوم کی خوبیاں بیان کرتے ہوئے سونیا گاندھی تھک نہیں رہی ہیں. پنڈت جواہر لال نہرو, لال بہادر شاشتری, اندرا گاندھی اور راجیو گاندھی کے بعد کانگریس پارٹی میں عوام و خواص سے رابطے کی ایسی کوئی کڑی موجود نہیں رہی جو کانگریس پارٹی کو مقبول .عام بنا سکے. غلام نبی آزاد اور احمد پٹیل وغیرہ کانگریس کے لئے پالیسی ساز اور کنگ میکر کہلاتے تھے. آج غلام نبی آزاد تو سازش کے تحت کنارے لگا دئیے گئے اور احمد پٹل مرحوم ہو کر کانگریس پارٹی کو تنہا چھوڑ گئے اور اب کانگریس ہے جو اپنے اچھے دنوں کو یاد کرتے ہوئے اقتدار سے بے دخلی کے زخموں کو چاٹتے ہوئے اقتدار اعلی تک پہنچنے کے خواب دیکھ رہی ہے. آج ہندوستان کی گنگا جمنی تہذیب سسک سسک کر دم توڑ رہی اور کانگریس پارٹی خواب گم گشتہ میں گم ہے. مقام عبرت ہے کہ اتنا سب کچھ ہونے کے باوجود کانگریس پارٹی کے ذمہ داران ہوش کے ناخن لینے کو تیار نہیں. جس طرح کانگریس پارٹی نے ماضی میں مولانا عبدالکلام آزاد, بدرالدین طیب جی, سیف الدین کچلو, نفیسہ علی ,عبدالرحمن انتولے , پروفیسر اثیر وغیرہ کو گوشہ گمنامی میں گم کرنے کی رذیل کوشش کی تھی وہی وطیرہ آج بھی اختیار کر رکھا ہے. آج کانگریس پارٹی مٹھی بھر مفسدین کے اشاروں پر رقص فرما ہے اور کانگریس پارٹی کا یہ رقص لڑکھڑاتے قدموں سے آنے والے دنوں میں کانگریس پارٹی کو بالکل اسی طرح گمنامی کے دلدل میں غرقاب کردے گا جس طرح کانگریس ذمہ داران نے خصوصاً مسلم طبقہ کے نمائندہ افراد کو ماضی کی کوٹھریوں میں سزائے گمنامی دیتے ہوئے بے یار و مدگار چھوڑ دیا تھا .