ممبئی18/ ستمبر دہشت گردی کے الزامات کے تحت گذشتہ پندرہ سالوں سے جیل میں مقید ایک 65 سالہ ضعیف شخص ابتک بامبے ہائی کورٹ سے ضمانت حاصل کرنے کے باجود جیل سے رہا نہیں ہوسکا ہے کیونکہ بامبے ہائی کورٹ نے اسے بطور ضامن کسی مقامی شخص کو عدالت میں پیش کرنے کا حکم دیا تھا۔ ملزم کفیل احمد کی گذشتہ سال بامبے ہائی کورٹ نے طویل قید اور مقدمہ کی سماعت میں ہونے والی تاخیر کی بنیاد پر ضمانت منظور کی تھی۔بامبے ہائی کورٹ کی دو رکنی بینچ کے جسٹس اے ایس گڈکری اور جسٹس آر آر بھونسلے نے کفیل احمد کی ضمانت منظور کرتے ہو ئے اسے مقامی ضامندار پیش کرنے کی شرط پر جیل سے رہا کیئے جانے کا حکم جاری کیا تھا۔ بامبے ہائی کورٹ میں کفیل احمد کے مقدمہ کی پیروی ایڈوکیٹ مبین سولکر نے جمعیۃ علماء مہاراشٹر(ارشد مدنی)کے توسط سے کی تھی۔ملزم کفیل احمد کا تعلق بہار سے ہے اور اس کی ضمانت لینے کے لیئے مہاراشٹر میں کوئی موجود نہیں ہے لہذا آج بامبے ہائی کورٹ میں ضمانت کی شرط میں تبدیلی کی عرضداشت صدر جمعیۃ علماء مہاراشٹر مولانا حلیم اللہ قاسمی کی ہدایت پر ایڈوکیٹ متین شیخ نے داخل کی ہے۔گذشتہ ہفتہ ملزم کفیل احمد کے لڑکے نے مولانا حلیم اللہ قاسمی سے ملاقات کرکے اس کے ضعیف والد کی جیل سے رہائی کی درخواست کی تھی جس کے بعد بامبے ہائی کورٹ میں پٹیشن داخل کی گئی۔ ملزم کفیل احمد کے خلاف دہلی میں بھی ایک مقدمہ زیر سماعت ہے جہاں اسے ضمانت مل چکی ہے اور دہلی کی عدالت نے کفیل احمد کو کسی بھی صوبے سے تعلق رکھنے والے شخص کو بطور ضمانتدار پیش کرنے کی اجازت دی تھی۔ایڈوکیٹ متین شیخ کی جانب سے داخل پٹیشن میں تحریرہے کہ ہائی کورٹ کی جانب سے ایک سال قبل ضمانت منظور ہوجانے کے باوجود ملزم کی ابتک جیل سے رہائی نہیں ہوسکی ہے کیونکہ مقامی ضامن دار کی جو شرط عدالت نے تجویز کی ہے ملزم اسے پورا کرنے میں ناکام ثابت ہوا ہے کیونکہ ملزم کا تعلق صوبہ بہار سے ہے اور مہاراشٹر میں اس کا کوئی جاننے والا نہیں ہے جو اس کی ضمانت لے سکے۔عرضداشت میں مزید تحریر ہے کہ جس طرح سے دہلی کور ٹ نے ملزم کو بیرون ریاست سے تعلق رکھنے والے ضامندار کو پیش کرنے کی اجازت دی ہے بامبے ہائی کورٹ بھی ملزم کو ایسی سہولت دے تاکہ پندرہ سالوں سے جیل میں مقید ملزم کی رہائی عمل میں آسکے۔ ملزم کفیل احمد کی عرضداشت پر اگلے ہفتے کسی دن سماعت متوقع ہے۔

واضح رہے کہ ملزم کفیل احمد پر عروس البلاد ممبئی کے تین مختلف مقامات پر ہوئے بم دھماکہ معاملہ بنام 13/7 ممبئی سلسلہ وار بم دھماکہ میں دیگر ملزمین کے ساتھ ملوث ہونے کا الزام ہے۔ملزم کفیل احمد سمیت دیگر تمام گیارہ ملزمین کے خلاف تعزیرات ہند کی دفعات 302,307,326,325,324,379,109,120-B,اورغیر قانونی سرگرمیوں کی روک تھام کے قانون، دھماکہ خیز مادہ کے قانون اور مکوکا قانون کی مختلف دفعات کے تحت مقدمہ چارج فریم کیا تھا۔ اس معاملے کا سامنا کررہے ملزمین نقی احمد وصی احمد، ندیم اختر اشفاق شیخ، ہارون عبدالرشید نائیک،کفیل احمد محمد ایوب انصاری،، اسعد اللہ اختر جاوید اختر عرف ہڈی، سید اسماعیل آفاق علیم لنکا، صدام حسین فیروز خان، زین العابدین عبدالرزاق کو جمعیۃ علماء مہاراشٹر قانونی امداد کمیٹی قانونی امداد فراہم کررہی ہے۔سیشن عدالت میں ملزمین کے دفاع میں ایڈوکیٹ عبدالوہاب خان، ایڈوکیٹ شریف شیخ، ایڈوکیٹ حسنین قاضی و دیگر پیش ہورہے ہیں۔

ممبئی : شہزاد بھٹی گینگ و نیٹ ورک کو اب مرکزی وزارت داخلہ نے دہشت گرد نیٹ ورک قرار دیا ہے جس کے بعد اب شہزاد بھٹی سے وابستگان کے خلاف کارروائی میں تفتیشی ایجنسیوں کو راحت میسر ہوئی ہے سوشل میڈیا پر نوجوانوں کو ورغلانے اور اسلحہ جات کی فراہمی کے عمل میں بھی شہزاد بھٹی نیٹ ورک ملوث پایا گیا ہے اس کے خلاف مختلف ۹ ایف آئی آر درج کی گئی ہے ملک میں دہشت گردی سرگرمیوں اور بدامنی پھیلانے کی سازش میں شہزاد بھٹی گینگ نے کئی ایسے نوجوانوں کو بھی ملوث کیا تھا جو نابالغ بھی تھے .مہاراشٹراے ٹی ایس نے شہزاد بھٹی گینگ کے خلاف آپریشن انجام دیا تھا جس میں کئی نوجوانوں کو سوشل میڈیا پر اس سے رابطہ رکھنے کے الزام میں بازپرس کے لیے طلب کیا گیا تھا اور بعد ازاں انہیں رہا بھی کیا گیا تھا لیکن سرکار نے شہزاد بھٹی گینگ پر ہی یو اے پی اے ایکٹ کا اطلاق کیا ہے اگر کوئی بھی اس گینگ یا نیٹ ورک سے وابستہ پایا جاتا ہے تو اس کی گرفتاری بھی یو اے پی اے کے تحت ہی ہو سکتی ہے اے ٹی ایس کے معتبر ذرائع نے بتایا کہ پہلے شہزاد بھٹی نیٹ ورک کو ٹھوس اقدام کرنے یا کارروائی کے لئے کوئی ایسی دفعہ نہیں تھی لیکن اب اس تنظیم گینگ اور نیٹ ورک کو ہی دہشت گرد قرار دیدیا گیا ہے اگر کوئی بھی اس نیٹ ورک سے وابستہ ہوتا ہے تو کارروائی بھی اسی مناسبت سے ہو گی یعنی ان کے خلاف بھی یو اے پی اے ایکٹ کے تحت کارروائی ہو گی اے ٹی ایس نے اس سے قبل شہزاد بھٹی سے تعلق رکھنے والے کئی نوجوانوں کو زیر حراست لیا تھا ان سے باز پرس کی اور انہیں بعد میں رہا کردیا گیا تھا اس کے ساتھ ہی اے ٹی ایس ذرائع نے دعویٰ کیا ہے کہ اے ٹی ایس کی کارروائی کے سبب شہزاد بھٹی سے زبرداست جھٹکا لگا ہے دبئی میں مقیم پاکستانی ڈان ہندوستان کے خلاف تشدد کی سازش میں ملوث ہے اور اس کو انجام دینے کےلیے وہ سوشل میڈیا پر نوجوانوں کو ورغلاتا ہے اس کے وہاٹس ایپ گروپ سے لے کر فیس بک سمیت انسٹاگرام اور ٹیلیگرام گروپ بھی ہے جس پر وہ غیر قانونی سرگرمی کو انجام دینے کےلیے نوجوانوں کی تقرری کرتا ہے.

ایسے میں دلی اسپیشل سیل اور اے ٹی ایس نے شہزاد بھٹی پر کارروائی کی ہے ملک میں ۲۰۰ سے زائد شہزاد بھٹی اراکین کو گرفتار بھی کیا گیا ہے شہزاد بھٹی پنجابی زبان بولتا ہے اور اسی طرح وہ سوشل میڈیا پر نوجوان کو اپنی طرف مائل کرتا ہے اے ٹی ایس ذرائع نے اپیل کی ہے شہزاد بھٹی نیٹ ورک سے سوشل میڈیا پر نوجوان دور رہیں کیونکہ اگر کوئی بھی اس نیٹ ورک سے وابستہ ہوتا ہے تو اس پر کاروائی یقینی ہے اس لئے نوجوانوں کو سوشل میڈیا کے استعمال میں احتیاط برتنا چاہئے اور کسی بھی انجان شخص سے رابطہ نہ رکھیں کیونکہ ایسے انجان رابطہ کاروں کے سبب ہی انہیں مشکلات کا سامنا کرنا پڑسکتا ہے ۔ شہزاد بھٹی سے وابستگان پر بھی اب یو اے پی اے ایکٹ اور ملک مخالف سرگرمیوں میں ملوث ہونے کے الزام میں کارروائی یقینی ہے اس لئے اس گروہ نیٹ ورک سے دور رہنے کی اپیل اے ٹی ایس ذرائع نے کی ہے ۔

بارامتی : کیا نیشنلسٹ کانگریس پارٹی (این سی پی) کے دو گروپ دوبارہ متحد ہو پائیں گے؟ مہاراشٹر کی سیاست میں یہ سوال اکثر اٹھتا ہے۔ ایم ایل اے روہت پوار نے بھی ایک نیوز چینل سے بات کرتے ہوئے اس معاملے پر تبصرہ کیا۔ سینئر لیڈر شرد پوار کے گروپ کے لیڈروں نے پہلے کہا تھا کہ این سی پی کے دو گروپوں کے دوبارہ اتحاد پر بات چیت رک گئی ہے۔ دریں اثنا شرد چندر پوار گروپ کے نوجوان لیڈر یوگیندر پوار نے ایک اہم انکشاف کیا ہے۔ انہوں نے کہا کہ جب آنجہانی ڈپٹی سی ایم اجیت پوار پارٹی میں سرگرم تھے تو این سی پی کے دو گروپوں کو ضم کرنے اور قیادت اجیت پوار کو سونپنے کا منصوبہ تھا۔ شرد چندر پوار گروپ کے نوجوان لیڈر یوگیندر پوار نے کہا کہ جب آنجہانی ڈپٹی سی ایم اجیت پوار پارٹی میں سرگرم تھے تو صورتحال مختلف تھی۔ موجودہ صورتحال مختلف ہے۔ دونوں حالات میں بہت فرق ہے۔ جب ‘دادا’ تھے تو دونوں گروپوں کو اکٹھا کرنے کے لیے بات چیت چل رہی تھی۔ اس وقت، این سی پی کو ایک متحد پارٹی بننا تھا، جس کی پوری قیادت اجیت دادا کو سونپ دی جانی تھی۔ تاہم، میں انضمام پر بات کرنے کے لیے پارٹی کا بہت چھوٹا رکن ہوں۔ آج تک یہ مذاکرات تعطل کا شکار ہیں۔ مجھے نہیں معلوم کہ سینئر قیادت کی سطح پر کوئی بات چیت ہو رہی ہے۔

یوگیندر پوار نے حال ہی میں بارامتی میں دلچسپی رکھنے والے امیدواروں کا انٹرویو کیا۔ انہوں نے بعد ازاں پریس کانفرنس سے خطاب کیا۔ یوگیندر نے مزید کہا کہ مالیگاؤں کوآپریٹیو شوگر فیکٹری کے انتخابات کے دوران ہمیں کہا گیا تھا کہ ہمارے امیدواروں کو جگہ دی جائے گی، لیکن ایسا نہیں ہوا۔ ہمیں آخری لمحات میں اپنا پینل کھڑا کرنا پڑا۔ تاہم اب صورتحال مختلف ہے۔ یوگیندر پوار نے وضاحت کی کہ شروع سے ہی پارٹی کارکنوں اور عہدیداروں میں یہ جذبہ رہا ہے کہ ایک آزاد پینل کھڑا کیا جائے۔ ایم پی سپریہ سولے اور ایم ایل اے روہت پوار بھی اس الیکشن میں دلچسپی لیں گے۔ مجھے یقین ہے کہ تمام سینئر رہنما ان کی حمایت کریں گے۔ ہم سینئر لیڈر شرد پوار سے فیکٹری کے آپریشنل ایریا میں انتخابی ریلی نکالنے کی درخواست کرنے کا ارادہ رکھتے ہیں۔

یوگیندر پوار نے کہا کہ انہیں ابھی تک کسی سے اتحاد کی کوئی تجویز نہیں ملی ہے۔ اگر ایسی کوئی تجویز آئی تو وہ اس پر غور کرے گا۔ تاہم وہ الیکشن لڑنے پر ڈٹے ہوئے ہیں۔ ابھی بھی کافی وقت ہے۔ دیکھتے ہیں اس دوران کیا ہوتا ہے۔ دریں اثناء شوگر فیکٹری کے آپریشنل ایریا میں مختلف گروپوں کے 130 سے ​​140 امیدوار انٹرویو کے لیے آئے ہیں۔ پوار نے کہا کہ وہ سومیشور کوآپریٹیو شوگر فیکٹری کا الیکشن اپنے طور پر لڑیں گے۔ انہوں نے کہا کہ انہیں ابھی تک اتحاد کی کوئی تجویز موصول نہیں ہوئی ہے۔ وہ شرد پوار سے درخواست کرنے کا ارادہ رکھتے ہیں کہ وہ اس الیکشن کے لیے ایک انتخابی ریلی نکالیں۔ ایم ایل اے روہت پوار اور ایم پی سپریہ سولے یقینی طور پر ان کی حمایت کریں گے۔