ممبئی : مہاراشٹر سماجوادی پارٹی لیڈر اور رکن اسمبلی ابوعاصم اعظمی نے یکم مئی سے مراٹھی زبان لازمیت کے معاملہ میں رکشہ اور ٹیکسی ڈرائیوروں کو رعایت دینے اور انہیں مراٹھی سیکھنے تک مہلت دینے کی درخواست یہاں وزیر ٹرانسپورٹ پرتاپ سرمائک سے کی ہے ایک مکتوب ارسال کر کے اعظمی نے کہا کہ مراٹھی لازمیت کا نیا نیا قانون یکم مئی 2026 سے نافذ العمل ہو گا اس سے رکشہ اور ٹیکسی ڈرائیوروں، خاص طور پر بزرگوں میں تشویش کی لہر ہے۔ کسی بھی قانون کا مقصد اصلاحی ہوتا ہے لیکن اس سے کسی کی روزی روٹی نہیں چھیننی چاہیے۔ مہاراشٹر ایک ایسی ریاست ہے جو ملک بھر کے شہریوں کو روزگار فراہم کرتی ہے، اور یہی ہماری ریاست کی اصل شناخت ہے۔ بہت سے ڈرائیور جو دوسری ریاستوں سے یہاں مقیم ہے انہوں نے اپنی مادری زبان میں تعلیم حاصل کی ہے، اس لیے انہیں مراٹھی سیکھنے میں وقت درکار ہے اس حقیقت سے ہم انکار نہیں کر سکتے۔سائنسی نقطہ نظر سے، 45 سے 50 سال کی عمر کے بعد نئی زبان سیکھنا مشکل ہو جاتا ہے۔ اس لیے میرا مطالبہ ہے کہ اس اصول کو 18 سے 45 سال کی عمر کے نوجوانوں تک محدود رکھا جائے اور تجربہ کار اور بزرگ ڈرائیوروں کو اس سے مکمل استثنیٰ دیا جائے۔ ایسے ڈرائیوروں کے لیے جو اپنے خاندان کا واحد کفیل ہیں، حکومت کو ایک خصوصی افسر کا تقرر کرنا چاہیے اور انھیں کم از کم دو سال کی توسیع دینا چاہیے تاکہ ان کی روزی روٹی میں خلل نہ پڑے۔ مزید برآں، لینگویج ٹیسٹ فارمیٹ کو آسان اور آن لائن کیا جانا چاہیے، ڈرائیوروں کو ہر سال کم از کم چار مواقع ملیں۔ صرف زبان کی وجہ سے اجازت نامے منسوخ کرنا ناانصافی ہوگی۔ایک اور اہم نکتہ یہ ہے کہ کارپوریٹ سیکٹر میں مراٹھی کے استعمال پر اس طرح کی کوئی سختی نہیں ہے، کیونکہ یہ سیکٹر ریاست کے لیے اہم آمدنی کا ذریعہ سمجھا جاتا ہے۔ تاہم، ہمیں یہ نہیں بھولنا چاہیے کہ رکشہ اور ٹیکسی ڈرائیور بھی ریاست کی معیشت کا ایک اہم حصہ ہیں۔ وہ صبح سے لے کر رات گئے تک عوام کی خدمت کرتے ہیں۔جب بڑے کارپوریٹ گھرانے زبان کے ضوابط میں رعایت اور لچک حاصل کر سکتے ہیں، تو ان کم آمدنی والے ڈرائیوروں پر، جو سارا دن دھوپ اور بارش میں محنت کرتے ہیں، سخت ضابطوں کا بوجھ کیوں ؟ انصاف سب کے لیے برابر ہونا چاہیے۔ لہٰذا حکومت ضابطے لگانے کی بجائے ہر وارڈ کی سطح پر مفت تربیتی مراکز قائم کرے۔ ہمیں سمجھنا چاہیے کہ اگر ہزاروں ڈرائیورز بے روزگار ہو جائیں تو معاشرے میں معاشی تنگدستی کے باعث جرائم میں اضافے کے امکان کو رد نہیں کیا جا سکتا۔ ہندوستانی آئین کے آرٹیکل 21 کے مطابق ہر شہری کو عزت کے ساتھ جینے اور اپنی روزی کمانے کا حق حاصل ہے۔ سپریم کورٹ نے اولگا ٹیلس بمقابلہ بمبئی میونسپل کارپوریشن کیس میں بھی واضح کیا ہے کہ روزی روٹی کا حق زندگی کے حق کا ایک لازمی حصہ ہے۔ لہٰذا، کسی کا اجازت نامہ صرف اس لیے منسوخ کرنا کہ وہ زبان نہیں جانتے، سپریم کورٹ کے فیصلے کی خلاف ورزی ہوگی۔ اعظمی نے وزیر ٹرانسپورٹ پرتاپ سرنائک سے درخواست کی کہ اس اصول کو محض سیاسی مسئلہ نہیں بلکہ ایک تعلیمی اور سماجی مہم کے طور پر غور کریں تارکین وطن مہاجرین ریاستوں کے ڈرائیوروں کو مراٹھی سیکھنے کے لیے مناسب وقت دے کر اور بزرگوں کو مناسب رعایتیں دے کر مہاراشٹر کی جامع روایت کو برقرار رکھیں۔