مالیگاؤں (پریس ریلیز ) ملک کی اہم حزب اختلاف کی جماعت کانگریس پارٹی نے اپنے نیوز چینل آئی این سی ٹی وی (انڈین نیشنل کانگریس ٹیلی ویزن) کو متعارف کرا دیا۔ اس میڈیا پلیٹ فارم کی شروعات ڈاکٹر بی آر امبیڈکر کے 130ویں یوم پیدائش کے موقع پر کی گئی اور باضابطہ طور پر 24 اپریل کو اس پر نشریات کا آغاز ہوگا۔ کانگریس کے ترجمان رندیپ سنگھ سرجے والا نے بی جے پی پر حملہ بولا۔ چینل کی افتتاحی تقریب کے موقع پر سب سے پہلے مہاتما گاندھی کے تعقل سے ایک شارٹ فلم دکھائی گئی۔ اس میں ہندوستان کی آزادی کے وقت مہاتما گاندھی کی بطور صحافی خدمات کو نمایاں کیا گیا۔ اس میں کئی اخباروں کی کٹنگ دکھائی گئیں جو ان کی ادبی خدمات کو ظاہر کرتی ہیں۔ کانگریس پارٹی نے اپنے میڈیا پلیٹ فارم کو ایسے وقت میں لانچ کیا ہے جبکہ حزب اختلاف کی جماعتیں میڈیا پر امتیازی سلوک کرنے کا الزام عائد کرتی رہتی ہیں۔ ان جماعتوں کا کہنا ہے کہ مرکزی دھارے کی میڈیا میں یا تو انہیں جگہ ہی نہیں دی جاتی یا پھر ان کا برائے نام ذکر کیا جاتا ہے۔ کانگریس کی جانب سے فراہم کی گئی معلومات کے مطابق آئی این سی ٹی وی پر پروگراموں کی باضابطہ طور پر شروعات 24 اپریل یعنی کہ یومِ پنچایتی راج کے موقع پر کی جائے گی۔ نیوز چینل کی لانچنگ کے موقع پر سرجے ولا کے علاوہ راجیہ سبھا میں قائد حزب اختلاف ملکارجن کھڑگے سمیت متعدد کانگریس لیڈران موجود تھے۔
اس موقع پر سرجے والا نے کہا، ’’ بابا صاحب کا یوم پیدائش ہے اور یہ دن ہندوستان کے آئین اور ائینی حقوق کا جشن ہے۔ بابا صاحب کی سالگرہ غلامی، قدامت پسندی اور توہم پرستی کے خلاف ایک جامع انقلاب کا بھی جشن ہے۔ بابا صاحب کی سالگرہ بغیر کسی دباؤ اور لالچ کے اظہار رائے کی آزادی کا بھی جشن ہے۔‘‘
انہوں نے کہا، ” اندھ بھکتی (عقیدت)، تاریکی ، ضمیر کی تنزلی، ذہنی غلامی، ایک متکبر حکمراں کی جبراً تھوپے جا رہے فرد پرستی کے ماحول اور اظہار رائے کی آزادی کو زنجیروں میں جکڑ دئے جانے کے دور میں آئی این سی ٹی وی کی شروعات کی جا رہی ہے۔‘‘ سرجے والا نے بتایا کہ اس چینل پر روزانہ آٹھ گھنٹے کی نشرعات ہوگی اور آگے اس کے وقت میں مزید اضافہ کیا جائے گا۔
دوسری طرف مہاراشٹر پردیس کانگریس کمیٹی کے صدر نانا پٹولے نے مہاراشٹر میں کانگریس پارٹی کو زمینی سطح پر مضبوط ومستحکم کرنے کی غرض سے منصوبہ بندی کرتے ہوئے ریاست کے مختلف علاقوں میں آبزرور و نگراں مقرر کئے ہیں مہاراشٹر پردیش کانگریس کی نائب صدر و شولاپور سے رکن اسمبلی محترمہ پرنیتی شندے نے اس ضمن میں مالیگاؤں کا دورہ کیا۔ واضح رہے کہ ڈاکٹر بابا صاحب امبیڈکر کے یوم پیدائش کے موقع پر کانگریس پارٹی کی جانب سے خون کے عطیہ کیمپ کا بھی انعقاد کیا گیا تھا مالیگاؤں شہر میں کثیر مسلم آبادی اور رمضان المبارک کے آغاز کی وجہ سے خون کے عطیہ کیمپ کو موقوف کیا گیا تاہم مالیگاؤں دورہ پر تشریف لانے والی محترمہ پرنیتی شندے کا کانگریس رابطہ آفس ہزار کھولی پر پرتپاک خیرمقدم کیا گیا۔ کانگریس صدر شیخ رشید صاحب کی موجودگی میں مہاراشٹر پردیش مہیلا کانگریس کی جنرل سکریٹری و میونسپل میئر محترمہ طاہرہ شیخ رشید نے گلہائے عقیدت پیش کئے۔ جبکہ کارپوریٹر زیب النساء نورواللہ انصاری (پپو اناؤنسر کی اہلیہ) نے بھی پھولوں کا نذرانہ پیش کیا۔ اس موقع پر پرنیتی شندے نے کہا کہ ریاستی صدر نانا پٹولے کی قیادت میں کانگریس پارٹی کو زمینی سطح پر مستحکم کرنے کیلئے کانگریس یارٹی کے ذمہ داران نکل پڑے ہیں۔ مہاراشٹر کی مہاوکاس اگھاڑی حکومت کے ذریعہ بھی عوامی کاموں کی تکمیل اور تعمیری منصوبہ بندی سے راحت پہونچانے کے علاوہ کورونا مہاماری میں کانگریس لیڈران منصوبہ بندی کے ذریعہ غریبوں اور کسانوں کیلئے ہرممکن تعاؤن فراہم کررہے ہیں۔ انہوں نے کہا کہ میں شولا پور سے تعلق رکھتی ہوں اسلئے یاورلوم صنعت کے مسائل سے بخوبی واقف ہوں۔ اسلئے اس صنعت کیلئے جو کچھ بن پڑے کرنے کی کوشش کرتی ہوں۔ محترمہ پرنیتی شندے نے سابق رکن اسمبلی آصف شیخ رشید کے کانگریس چھوڑنے پر اظہار تاسف کرتے ہوئے کہا کہ اب جبکہ کانگریس پارٹی کو بنیادی سطح پر مضبوط و مستحکم کیا جارہا ہے آصف شیخ رشید نے کانگریس کو چھوڑدیا ہے۔ انہوں نے اسمبلی ہاؤس میں آصف شیخ رشید کے ببانگ دہل بولنے اور آواز اٹھانے پر ان کی سراہنا کرتے ہوئے اس کو کانگریس پارٹی کے نقصان سے تعبیر کیا۔
اس موقع پر کانگریس صدر شیخ رشید، میئر طاہرہ شیخ رشید، کارپوریٹر زیب النساء نورواللہ انصاری، اصغر انصاری، شبیر موسیٰ ، حیدرشاہ اسماعیل شاہ، شیخ شاکر، عبدالحمید پانی والے، لطیف بھائی سمیت کانگریس پارٹی کے ذمہ داران موجود تھے۔