ممبئی پہلگام میں دہشت گردانہ حملے کے بعد ہندوستانی فوج نے جوابی کارروائی کرتے ہوئے ’’آپریشن سندور‘‘ کے تحت پاکستان پر زبردست حملہ کیا۔ اس آپریشن میں جہاں دشمن ٹوٹ گیا، وہیں 27 سالہ جوان مرلی نائک، کامراج نگر، ممبئی کا ساکن سرحد پر فائرنگ میں جام شہادت نوش کر گیا۔ ‎شہید مرلی نائک کی شہادت کی خبر جیسے ہی علاقے میں پہنچی، پورے کامراج نگر میں سوگ کی لہر دوڑ گئی۔ ہر آنکھ پرنم تھی اور ہر دل فخر سے لبریز تھا۔

علاقے کے سابق کارپوریٹر پرمیشور کدم نے کہا کہ مرلی بچپن سے ہی ایماندار اور ملنسار تھا اس کے علاوہ ایک قابل فوجی بھی تھا۔ انہوں نے چھوٹی عمر میں ہی ملک کی خدمت کا خواب دیکھا تھا۔ نامسا حالات کے بعد بھی مرلی نے فوج میں شمولیت اختیار کی۔ کچھ رشتہ داروں نے اسے فوج میں بھرتی ہونے سے بھی منع بھی کیا، لیکن مرلی کا جذبہ اٹل تھا۔ محنت اور لگن سے اس نے فوج میں بھرتی ہو کر اپنا خواب پورا کیا۔ ‎مرلی نائیک نے سال 2022 میں ہندوستانی فوج میں شمولیت اختیار کی۔ ناسک میں تربیت کے بعد انہیں آسام، پھر پنجاب میں پوسٹنگ ملی۔ ابھی ایک ماہ قبل انہیں جموں و کشمیر کے اڑی سیکٹر میں بھیجا گیا تھا جہاں وہ جمعہ کی صبح پاکستان کی طرف سے فائرنگ میں شہید ہوگئے تھے۔

شہید مرلی نائک کے جسد خاکی کو کل آندھرا پردیش میں ان کے آبائی گاؤں لے جایا جائے گا، جہاں پورے سرکاری اعزاز کے ساتھ ان کی آخری رسومات ادا کی جائیں گی۔

دھنگر برادری سے تعلق رکھنے والے مرلی بچپن سے ہی ملنسار اور زندہ دل تھے۔ ‎آج نہ صرف ممبئی بلکہ پورے ملک کو مرلی نائک پر فخر ہے۔ انہوں نے مادر ہند کی حفاظت کرتے ہوئے اپنی عظیم قربانی دی۔

ممبئی : ممبئی کے شہریوں کو بی ایم سی الیکشن سے قبل مہنگائی کا جھٹکا لگا ہے۔ بیسٹ بسوں کے کرایہ میں اضافہ کو منظوری دیدی گئی ہے۔ آج سے اضافی یعنی دوگنا اضافی کرایہ کا نفاذ ہوگا۔ جس سے اب بیسٹ کے مسافروں کو اضافی زائد کرایہ ادا کرنا ہوگا, جس کا اثر مسافروں کی جیب پر پڑے گا۔ بیسٹ انتظامیہ نے نیا کرایہ کا نفاذ ۹ مئی سے کرنے کا فیصلہ لیا ہے۔ کرایہ ۵،۱۰،اور ۲۰ کلو میٹر کے فاصلہ کا کرایہ میں اضافہ کیا گیا ہے۔ ۵ کلو میٹر کے فاصلہ کا کرایہ دوگنا کیا گیا ہے, ۵ کلو میٹر فاصلہ کا کرایہ ۶ روپیہ سے ۱۲ روپیہ, ۱۲ سال کے بچے کو کرایہ میں کوئی رعایت نہیں دی گئی ہے۔ یومیہ پاس ابھی ۶۰ روپیہ تھا, اب نیا کرایہ ۷۵ روپیہ کیا گیا ہے۔ ماہانہ پاس ۹۰۰ سے ۱۸۰۰ روپیہ ہے میونسپل کارپوریشن کے بچوں کے لئے چلو بس پاس کی سہولت دی گئی ہے۔ ممبئی میں بسوں کے کرایہ اور ٹکٹ میں اضافہ سے شہریوں کے جیب پر بوجھ پڑا ہے۔ ممبئی شہر و مضافاتی علاقوں میں شئیر ٹیکسی اور آٹو رکشہ بھی چلائے جاتے ہیں۔ لیکن کرایہ کے سبب کئی مسافر ان شئیر ذرائع نقل و حمل کی ادائیگی سے بھی قاصر ہے اور وہ بسوں سے سفر کرتے ہیں۔

ممبئی : ممبئی میٹروپولیٹن ریجن ڈیولپمنٹ اتھارٹی (ایم ایم آر ڈی اے) نے اس ماہ ممبئی میں ایک اور میٹرو لائن پر آزمائشی رن شروع کرنے کی تیاری شروع کردی ہے۔ میٹرو 9 کوریڈور کے 4.973 کلومیٹر روٹ پر آزمائشی طور پر 10 مئی بروز ہفتہ سے بجلی کی فراہمی شروع کر دی جائے گی۔ میٹرو کا ٹرائل رن مئی کے آخری ہفتے میں 4.973 کلومیٹر روٹ پر بجلی کی فراہمی شروع کرنے اور ضروری معائنہ کرنے کے بعد شروع ہو سکتا ہے۔ اس روٹ پر میٹرو کے دروازے سال کے آخر تک عوام کے لیے کھل سکتے ہیں۔ میٹرو 9 دہیسر (مشرقی) اور میرا بھیندر کے درمیان 13.5 کلومیٹر کے راستے پر زیر تعمیر ہے۔ پورے روٹ کا سول ورک مکمل نہ ہونے کی وجہ سے ایم ایم آر ڈی اے نے 13.5 کلومیٹر روٹ پر بیک وقت سروس شروع کرنے کے بجائے دو مرحلوں میں سروس شروع کرنے کا منصوبہ بنایا ہے۔

پہلے مرحلے کے تحت دہیسر (مشرق) اور کاشیگاؤں میٹرو اسٹیشن کے درمیان میٹرو سروس شروع کرنے کا منصوبہ تیار کیا گیا ہے۔ میٹرو کے پہلے مرحلے میں اس کے 4.973 کلومیٹر روٹ پر چار اسٹیشن ہیں۔ میٹرو 9 کوریڈور کے پورے روٹ کا سول ورک 95 فیصد مکمل ہو چکا ہے۔ پچھلے مہینے، ایم ایم آر ڈی اے نے میٹرو بی کے منڈیلے اور ڈائمنڈ گارڈن میٹرو اسٹیشنوں کے درمیان میٹرو کا ٹرائل رن شروع کیا۔ اس روٹ پر سال کے آخر تک میٹرو سروس شروع ہونے کی امید ہے۔ میٹرو 9 کوریڈور دہیسر (مشرق) سے اندھیری (مشرق) تک میٹرو 7 کوریڈور سے اور دہیسر (مشرق) سے اندھیری (مغرب) تک میٹرو 2 اے کوریڈور سے منسلک ہے۔ میٹرو 9 کے پورے روٹ کے کھلنے کے بعد مسافر میرا بھائیندر سے اندھیری تک میٹرو سے سفر کر سکیں گے۔ میٹرو نائن کا کار شیڈ ابھی تک تیار نہیں ہوا۔ اس وجہ سے ایم ایم آر ڈی اے نے چارکوپ ڈپو سے میٹرو 9 ریک کو برقرار رکھنے کا منصوبہ بنایا ہے۔ اس وقت میٹرو 7 اور میٹرو 2 اے کوریڈور کے ریک چارکوپ ڈپو سے رکھے جاتے ہیں۔

میٹرو 9 کوریڈور کا تعمیراتی کام 2019 سے جاری ہے، اکتوبر 2024 تک پورے روٹ پر سروس شروع ہونا تھی، تعمیراتی کام میں تاخیر اور دیگر وجوہات کی وجہ سے ابھی تک میٹرو سروس شروع نہیں ہو سکی۔ اس کے ساتھ ساتھ جاری تعمیراتی کام کی وجہ سے مقامی شہریوں کو ٹریفک جام کا سامنا ہے۔ شہریوں کو سہولت فراہم کرنے کے لیے ایم ایم آر ڈی اے اب پورے روٹ کے بجائے اس روٹ کے اس حصے پر سروس شروع کرنے کا منصوبہ بنا رہا ہے جہاں کام مکمل ہو چکا ہے۔ اسی طرح اس سال میٹرو ٹو بی اور میٹرو 4 کے کچھ حصوں میں میٹرو چلانے کا منصوبہ تیار کیا گیا ہے۔