یونانی طب پربین الاقوامی کانفرنس سے خطاب کرتے ہوئے کابینی وزیر برائے آیوش، بندرگاہ، جہاز رانی و آبی گزرگاہ، حکومت ہند سربانند سونووال نے کہا کہ وزیر اعظم نریندر مودی کی دور اندیش قیادت میں حکومت ہند نے ہندوستانی نظام طب بشمول یونانی طب کی کثیر جہتی ترقی کو بہت اہمیت دی ہے۔ یہ بات انہوں نے سنٹرل کونسل فار ریسرچ اِن یونانی میڈیسن (سی سی آر یو ایم)، وزارت آیوش، حکومت ہند کے زیر اہتمام یونانی ڈے 2022 تقریبات کے حصے کے طور پرشیر کشمیر انٹرنیشنل کنونشن سینٹر میں منعقدہ پروگرام میں کہی۔

انہوں نے مزید بتایا کہ نریندر مودی کی قابل قیادت کی وجہ سے ورلڈ ہیلتھ آرگنائزیشن (ڈبلیو ایچ او) نے ہندوستان میں گلوبل سنٹر فار ٹریڈیشنل میڈیسن قائم کرنے کا فیصلہ کیا ہے، جو کہ محققین اور طلباء کو روایتی طب میں دنیا کی قیادت کرنے کا بہترین موقع فراہم کرے گا۔ انہوں نے مزید کہا کہ حکیم اجمل خان کے یوم پیدائش پر یونانی ڈے منایا جاتا ہے۔ جو کہ بہت اہمیت کا حامل ہے۔ کیونکہ یہ جامع طبی نظام ان کی اور دیگر بہت سے دانشوران کی خدمات کی وجہ سے ہمیں ورثے میں ملا ہے۔

جموں وکشمیر خطے کے بارے میں بات کرتے ہوئے انہوں نے کہا کہ ہم سب کو اس خوبصورت خطہ پر فخر ہے جو دنیا بھر میں سیاحوں کے لیے ایک کشش کے طور پر جگہ بنانے میں کامیاب رہا ہے۔ انہوں نے مزید کہا کہ جموں وکشمیر پودوں کے وسائل سے مالا مال ہے، جس نے دواؤں کے استعمال کے لیے تحقیق کرنے اور دریافت کی ضرورت پر زور دیا ہے، تاکہ بنی نوع انسانی مستفید ہوسکے۔ انہوں نے کہا کہ ریجنل ریسرچ انسٹی ٹیوٹ آف یونانی میڈیسن، سری نگر میں آیوش سنٹر آف ایکسیلنس فار ریجیمینل تھریپی کی توسیع کے لیے سات کڑور سے زائد رقم فراہم کیا گیا ہے۔ انہوں نے نوجوانوں کو مشورہ دیا کہ وہ وزیر اعظم کی قیادت میں جموں و کشمیر کے مختلف شعبہ جات میں ہو رہی ترقیاتی کاموں سے فائدہ اٹھائے۔

اپنے خطاب میں وزیر ڈاکٹر منجپرا مہندر بھائی نے کہا کہ غذا بہت اہم ہے، کیونکہ یہ توانائی کا بنیادی ذریعہ ہے۔ انہوں نے مزید کہا کہ یونانی طب صحت کو برقرار رکھنے اور بیماریوں سے تحفظ کیلئے صحت مند غذا کے رہنما اصول فراہم کرتی ہے۔ انہوں نے ادویات اور ادویاتی غذا کے ذریعے قوت مدافعت میں اضافہ اور کووڈ۔19 کے خلاف جنگ میں آیوش نظام کے کردار کی پذیرائی کی۔ انہوں نے یونانی طب میں تحقیق و ترقی میں سی سی آر یو ایم کے تعاون کی بھی تعریف کی۔

افتتاحی تقریب میں جناب پرمود کمار پاٹھک، اسپیشل سکریٹری، وزارت آیوش، شری وویک بھاردواج، ایڈیشنل چیف سکریٹری، محکمہ صحت و طبی تعلیم، جموں وکشمیر، وید جینت دیوپجاری، چیئرمین، نیشنل کمیشن فار انڈیا سسٹم آف میڈیسن، پروفیسر طلعت احمد، وائس چانسلر، کشمیر یونیورسیٹی، پروفیسر اکبر مسعود، وائس چانسلر، بابا غلام شاہ بادشاہ یونیورسیٹی، پروفیسر عاصم علی خان، ڈائریکٹر جنرل، سنٹرل کونسل فار ریسرچ اِن یونانی میڈیسن (سی سی آر یو ایم) اور ڈاکٹر مختار احمد قاسمی، ایڈوائزر (یونانی)، وزارت آیوش نے بھی اظہار خیال کیا۔

دو روزہ بین الاقوامی کانفرنس میں ذیلی موضوعات ”غذا اور غذائیت۔ صحت کے شعبے کی ایک اہم شاخ“، ”عالمی صحت کے لیے یونانی طب“، ”غذا اور غذائیت۔ یونانی طب میں قوت مدافعت میں بہتری کا اہم عنصر“، ”دوران وباء کے اسباق“، ”اچھی صحت و تندرستی کی پائیدار ترقی کا ہدف-3 کا حصول“، ”غیر متعدی امراض کے لیے روایتی طبی نظام“ اور ”صحت و تندرستی“ پر ایک مذاکرہ اور آٹھ سائنسٹفک اجلاس منعقد کئے گئے۔

کانفرنس میں طب اور متعلقہ سائنس سے تعلق رکھنے والے متعدد قومی اور بین الاقوامی ماہرین اور نامورحضرات اپنے علم، تجربات اور مہارت سے شرکاء کو مستفید کیا۔ اس موقع پر یونانی طب اور متعلقہ سائنس کی ترقی میں کوشاں صنعتی، اکادمی اور تحقیقی اداروں سے وابستہ افرادنے کثیر تعداد میں شرکت کی۔

افتتاحی اجلاس میں سی سی آر یو ایم کے ذریعہ شائع کردہ کانفرنس سووینئر اور آٹھ کتابوں کا اجراء، حیدرآباد میں سی سی آر اے ایس کے تحت کام کرنے والے نیشنل انسٹی ٹیوٹ آف انڈین میڈیکل ہیریٹیج کے ذریعہ تیار کردہ دو یونانی ای کتابوں کا اجراء، یوگا انسٹرکٹرز کو مبارکباد دینے کے لیے وائی سی بی سرٹیفکیٹس کی تقسیم، یوگا ایم او یو کا تبادلہ اور لائیو یوگا پرفارمنس، سی سی آر یو ایم ایپس کی ریلیز اور آر آر آئی یو ایم، سری نگر کو این اے بی ایچ کی ایکریڈیشن سرٹیفکیٹ پیش کی گئی۔

سی سی آر یو ایم کی کتابیں ’اور ینٹیشن گائیڈ لائنز فار کمیونٹی ہیلتھ آفیسرز (انڈریونانی اسٹریم)‘، ’اینٹی آرتھرائٹس پلانٹس ان یونانی میڈیسن‘ ’ہیپاٹو پروٹیکٹو پلانٹس ان یونانی میڈیسن‘، ’گلمپسیس آف اکٹیوٹیز اینڈ اچیومینٹس‘، ’ایڈوانسڈ انالائٹکل میتھڈ س فار کوائلیٹی کنٹرول آف یونانی ڈرگس- عرقیات (ڈسٹللیٹس)‘، ’ریاض الادویہ(اردو ترجمہ)‘، ’ادویہ کبیدیہ-قدیم وجدید تحقیقات کی روشنی میں‘ اور ’نیشنل فارمولری آف یونانی میڈیسن، جلد چہارم، سکینڈ ایڈیشن‘ کا اجرا عمل میں آیا۔

’سنگل یونانی ڈرگس‘، ’یونانی ٹریٹمنٹ گائیڈلائنز فار کامن ڈسیزز‘ اور ’نو یور ٹیمپرامنٹ‘ ایپس کو لانچ کیے جانے پر وزیر آیوش جناب سربانند سونووال کی یونانی و دیگر شراکت داروں نے ستائش کی کیونکہ یہ سنٹرل کونسل فار ریسرچ اِن یونانی میڈیسن، وزارت آیوش کی جانب سے یونانی طب کے میدان میں اپنی نوعیت کا پہلا پیش رفت ہے۔