مشہور مجاہد آزادی اور گاندھی جی جان بچانے والے بطخ میاں کی بہادوری کی تعریف کرتے ہوئے اردو ایکشن کمیٹی کے صدر و روزنامہ قومی تنظیم کے مدیر اعلیٰ ایس ایم اشرف فرید نے کہا کہ انہوں نے گاندھی جی کی جان بچاکر انہوں نے پورے ملک پر احسان کیا تھا۔ یہ بات انہوں نے چھتیس گڑھ کے سابق ڈائریکٹر جنرل آف پولس محمد وزیر انصاری کے ذریعہ مشہور مجاہد آزادی بطخ میاں انصاری سے متعلق انکی مرتب کردہ کتاب ’بطخ میاں کی انوکھی کہانی‘ کا رسم اجراء انجام دیتے ہوئے کہی۔

انہوں نے کہا کہ بطخ میاں انصاری انگریزوں کی ملازمت میں تھے، اور جب گاندھی جی چمپارن آئے تو ان کے کھانے میں زہر ملانے کی ہدایت انگریزوں نے بطخ میاں کو دی۔ مگر آخری لمحہ میں بطخ میاں کی ایمانی حمیت نے گاندھی جی کو اس دودھ کو پینے سے منع کر دیا، جس سے انکی جان بچ گئی۔ بعد میں بطخ میاں اور ان کے پورے خاندان کے اوپر انگریزوں نے زبردست مظالم ڈھائے۔ بطخ میاں کے اس کارنامہ کو وزیر انصاری نے اپنی کتاب میں مرتب کیا ہے۔

نشست کی صدارت کرتے ہوئے انہوں نے کہا کہ وزیر انصاری کی تعریف کرتے ہوئے کہا کہ جس جنون کے ساتھ وہ اردو زبان کے ساتھ ہونے والی ناانصافیوں نیز فراموش مسلم مجاہدین آزادی کے بارے روشناس کرایا، اس سے لوگوں کو زبردست واقفیت حاصل ہوئی۔

انہوں نے اردو کی مقبولیت کا ذکر کرتے ہوئے کہا کہ یہ زبان کبھی مٹنے والی نہیں ہے۔ زبان کی حفاظت میں ہمارے تہذیب اور ثقافت کی حفاظت مضمر ہے۔ بہار میں اردو کو دوسری سرکاری زبان کا درجہ حاصل ہے۔ ابھی فی الحال بہار میں اردو کے مسئلوں کو فوری توجہ دینے کی ضرورت ہے۔ اردو ٹی ای ٹی کے بچے انصاف کیلئے برسوں سے بھٹک رہے ہیں۔ دوسری زبانوں کے بچوں کو دس فیصد کٹ آف مارک کم کر کے پاس کر دیا گیا، مگر اردو کے بچوں کے ساتھ ایسا نہیں کیا جا رہا ہے۔

سابق ڈائرکٹر جنرل پولیس وزیر انصاری نے کہا کہ میرا مقصد گمشدہ مجاہدین آزادی اور ہیروؤں کو تلاش کر کے منظر عام پر لانا ہے۔ خاص طور پر وہ مسلمان جنہوں نے جنگ آزادی کے دوران اپنا کردار ادا کیا ہے۔ خواہ وہ شاعری کے تعلق سے ہو، یا ادب سے یا کسی اور توسط سے ادا کیا ہو، ان کے بارے میں معلومات اکٹھا کر کے لوگوں تک پہنچانا ہے۔ انہوں نے کہا کہ ہماری نئی نسل اپنے بزرگوں کے کارنامے سے ناواقف ہے، اور ہمارا فرض ہے کہ ہم نئی نسل تک اپنے ہیروز اور مجاہدین آزادی یا اسلاف کے کارناموں کو پہنچائیں۔ انہوں نے کہا کہ اس لئے وہ مختلف مقامات کا دورہ کر کے ایسے ہیرو کو تلاش کر رہے ہیں، تاکہ ان پر لکھا جا سکے، اور ہماری نئی نسل اور آئندہ آنے والی نسل اس سے واقف ہو سکے۔

اردو خالص ہندوستانی زبان ہے۔ جنگ آزادی میں اس زبان نے جو خدمت کی ہے، اس کا کوئی ہم پلہ نہیں۔ جنگ آزادی کے موقع پر جو بھی ولولہ انگیز نعرے دئے گئے، وہ سب اسی زبان میں موجود ہے۔ سن ۷۵۸۱ ء سے لیکر ۷۴۹۱ ء تک اردو زبان اور اردو اخبارات کے زبردست رول کی وجہ سے ہمیں آزادی نصیب ہوئی۔ مولوی محمد باقر وہ پہلے اردو صحافی ہیں، جنکو انگریزوں نے توپ سے اڑانے کا کام کیا۔ ترازو کے ایک پلہ پر اردو کو رکھا جائے، اور دوسرے پلہ پر سبھی کارنامے رکھے جائیں، تو پھر بھی اردو کا پلہ بھاری رہے گا۔ اس زبان کی اس قدر قربانیوں کے باوجود اس کے وجود کو مٹانے کی کوشش ہو رہی ہے۔ اس کی جو قربانیاں ہیں فسطائی طاقتیں اپنے نام سے موسوم کرنے کی کوشش کر رہی ہے۔ آزاد ہندوستان میں اس بیچاری اردو کے ساتھ ناانصافیوں کا سلسلہ جاری ہے۔

انہوں نے کہاکہ عظیم آباد کے شاعر بسمل عظیم آبادی کے انقلابی شعر سرفروشی کی تمنا اب ہمارے دل میں ہے۔ دیکھنا ہے زور کتنا بازوئے قاتل میں ہے نے شہید اشفاق اللہ خان اور رام پرشاد بسمل کے اندر انقلاب کا جوش بھر دیا اور ان لوگوں کی زبان پر ہر وقت جاری رہتا۔ اس کے علاوہ ہمارے اسلاف کی بڑی شخصیات ایسی ہیں جن کی قربانیوں کو اگر الگ کردیا جائے تو ہم آزادی کا تصور نہیں کرسکتے تھے۔ انہوں نے مزیدکہا کہ اردو والوں کو تعلیم کی طرف توجہ دینی چاہیئے اور تمام طرح کے اختلافات کو بھول کر متحد ہونا چاہیئے۔ اس موقع پر انہوں نے لگ بھگ درجنوں پلے کارڈ کے ذریعہ مجاہدین آزادی کی تصویر اور انکے بارے میں بتایا۔ انہوں نے منشی نول کشور، پریم چند، جیسے لوگوں کی قربانیوں کے بارے میں بتایا۔

معروف شاعر خورشید اکبر نے کہا کہ بطخ میاں انصاری کی قربانیوں سے گاندھی جی جان بچ گئی، مگر ناتھو رام گوڈسے کی گولی سے گاندھی جی کی جان ختم ہوئی۔ آج اس ملک میں اسی دو نظریہ پر کام ہو رہا ہے۔ ایک گاندھی کو بچانے والے اور دوسرے گاندھی کو مارنے والے۔ ہم لوگوں کو گاندھی کے نظریہ کو آگے بڑھانا چاہیئے، کیونکہ انکے ساتھ پورے ہندوستان کی عوام تھی۔

معروف صحافی ڈاکٹر ریحان غنی نے کہا کہ انصاری صاحب ایک بڑا کا م لے کر چل رہے ہیں۔ بھولے ہوئے لوگوں کی یاد تاذہ کرنے میں لگے ہیں۔ ہم لوگوں نے بھی بہار سے اس کی شروعات کی ہے۔ مولوی باقر کو اس ماہ میں یاد کیا گیا۔ آگے بھی اس طرح کا سلسلہ جاری رہے گا۔ اردو صحافت کے ۰۰۲ سال کا جشن منانے کی بھرپور تیاری چل رہی ہے۔ اگلے سال مارچ میں دو روزہ جشن منایا جائیگا۔ اردو کی صفوں میں اتحاد کی ضرورت ہے۔ چھوٹی چھوٹی باتوں کو فراموش کر کے آگے بڑھا جا سکتا ہے۔

ڈاکٹر اسلم جاودان نے اس اس موقع پر اپنی بات رکھتے ہوئے کہا کہ اردو رابطہ کی زبان ہے اور انصاری صاحب نے بڑے شاندار انداز میں اردو کی عظمت رفتہ کے بارے میں بتایا۔ مگر ضرورت اس بات کی ہے کہ ہم صرف مسئلہ کے بارے میں بات کریں، مگر اس کا کوئی حل نہیں نکالیں تو حالات کسیے سدھرینگے۔

نشست کی نظامت کرتے ہوئے ڈاکٹر انوارالہدیٰ نے وزیر احمد انصاری کا استقبال کیا اور انکے بارے میں مختصر تعارف پیش کیا۔ اس موقع پر ڈاکٹر اشرف النبی قیصر، محمد نوشاد انصاری، کلیم اللہ کلیم دوست پوری، پرویز عالم، ازہر اؒلحق، ضیاء الحسن، شاہد انصاری، ایم قیو جوہر، نور حسن آزاد، کہکشاں توحید، میزان توحید، کے علاوہ درجنوں لوگ موجود تھے۔ یہ تقریب وزیر انصار کے اعزاز میں منعقد کی گئی تھی۔