(خیال اثر)
کل رضوان بھائی بیٹری والا اپنے سینکڑوں ورکروں کے ساتھ محمد آباد پہنچے یہ بستی شہر کے پکّے علاقے خلیل ہائی اسکول کے قریب(گولڈن نگر) میں واقع ہے محمد آباد کے لیے مہینوں سے جدوجہد کرنے والے رضوان بیٹری والا نے عوام کی شکایتیں سنی. عوام نے بتایا کہ یہاں کے چاروں کارپوریٹر متحدہ محاذ کے ہے جو کبھی جھانکنے نہیں آئے۔اور موجودہ ایم ایل ائے کے تخت نشین ہونے والے اوّل روز سے ہماری پریشانیوں کو دور کرنے کا جھانسہ دیتے آرہے ہیں یہی وجہ ہے کہ تھکی ہاری عوام کی آخری امید رضوان بیٹری والا پر آکر رک گلی.کل دوپہر رضوان بیٹری والا کی قیادت میں محمد آباد کے سینکڑوں مرد و خواتین کارپوریشن پہنچے اور کمشنر آفس کا زبردست گھیراؤ کیا. یہاں مظاہرین نے جم کر نعرے بازی کی جس میں کمشنر ہائے ہائے ڈپٹی کمشنر ہائے ہائے سٹی انجینئر ہائے ہائے کے نعرے لگائے گئے .اس کے بعد ڈپٹی کمشنر نے رضوان بھائی اور دیگر ذمہ داران کو اپنی آفس میں بلایا اور میٹنگ کی. اس میٹنگ میں رضوان بیٹری والا نے محمد آباد کی عوام کا مسئلہ اٹھاتے ہوئے کہا کہ یہاں پر ہمیشہ بارش کے ایّام میں گٹروں کا نکال نہ ہونے کی وجہ سے محلے کےتمام گھروں میں گندہ پانی گھس جاتا ہے جس کی وجہ سے ان غریبوں کو گھر سے بے گھر ہونا پڑتا ہےاور اسی وجہ سے ان کی روز مرہ کی زندگی میں کافی دشواری پیدا ہوجاتی ہے۔ رضوان بھائی نے کہا کہ پورے شہر میں غیر قانونی زمینیں 12/25 کے ٹکڑے بنا کر قسط وار فروخت کی جا رہی ہے. زمین مافیاوں کے خلاف کارپوریشن کی جانب سے کاروائی کیوں نہیں کی جاتی۔؟ کیوں شہر کی عوام کو دھوکا دیا جارہا ہے۔ رضوان بھائی کے اور بھی کئی چبھتے سوالات پر ڈپٹی کمشنر کا رجحان کچھ یوں تھا جیسے گدھے کے سر سے سینگ ہی غائب . رضوان بھائی نے سٹی انجینئر کو بھی آڑے ہاتھوں لیتے ہوئے سٹی انجینئر کو چور کہنے میں کوئی کسر نہیں چھوڑی جس کے بعد آخری وارننگ دیتے ہوئے کہا کہ جلد از جلد محمد آباد کی عوام کی پریشانیاں دور کی جائے ورنہ اس کے بعد مالیگاؤں عوامی پارٹی بڑی تحریک کھڑی کرے گی. نمائندہ سے گفتگو کرتے ہوئے رضوان بیٹری والے نے کہا کہ حالیہ برسات کے موسم میں صاف صفائی, جمع شدہ پانی اور گٹروں و نالوں کی صاف صفائی نہ ہونے کی وجہ سے شہریان کی آمد و رفت حتی کہ ان کے اپنے ذاتی مکانات سے باہر نکلنا تک دشوار ہو گیا ہے. عوامی نمائندگان اور صاف صفائی ذمہ داران خاموش تماشائی بنے شہر کو لاوارث چھوڑ رکھا ہے. تعجب خیز امر یہ ہے کہ مالیگاؤں میونسپل کارپویشن کمشنر و میئر و تمام ہی عوامی نمائندگان بلند بانگ دعوے تو کرتے ہیں لیکن ان کے تمام دعوے ضرورت پڑنے پر کسی سود خور بنیئے کے بہی کھاتے کے مانند اپنا حجم بڑھاتے رہتے ہیں.
محمد آباد کے تعلق سے کہا کہ نالوں, گٹروں اور بارش کا گندہ بدبو دار پانی ایک بڑے رقبے پر پھیل کر اپنی تمام تر غلاظت سمیت یہاں کے ساکینین کو دھیرے دھیرے موت کی جانب لے جا رہا ہے. اس علاقے کا کوئی مکان ایسا نہیں رہا جہاں کوئی نا کوئی کسی نا کسی بیماری میں مبتلا نہ ہو. تقریباً سال بھر سے یہی صورتحال ہے. یہاں رہنے والوں نے سبھی عوامی نمائندوں سے اس شکایت کو دور کرنے کا مطالبہ کیا مگر انہیں ہر جگہ سے صرف اور صرف وعدوں کی خیرات ملی. یہاں ایک مکان ایسا بھی ہے جہاں کا کوئی بھی فرد خواتین یا بچے بھی اپنے مکان کے باہر قدم نہیں رکھ سکتے کیونکہ ان کے دروازے سے لگ کر ہی گندہ بدبو دار پانی عوامی نمائندگان کے منہ پر کسی زناٹے دار طمانچے کی طرح اپنی گونج سنا رہا ہے . یہاں کی رخسانہ نامی خاتون خانہ نے شکایت کنندگان کے جم غفیر کی موجودگی میں با آواز بلند کہا کہ “ووٹیا لے کے واسطے تو سب اللہ رسول کا واسطہ دیئے رہین لیکن کام کرے کے بولو تو سب کی نانی مر جاتی “اس علاقے سے مجلس کے تین عوامی نمائندے ہیں ایک کانگریس کا نمائندہ ہے لیکن چاروں عوامی نمائندوں کی کارکردگی دیکھا جائے تو زیرو بھی نہیں ہے. سبھی عوامی نمائندگان شوشل اور پرنٹ میڈیا کے ذریعے اپنی کارکردگی کو زیرو سے ہیرو بنا کر خود کو نمایاں کرنے میں مصروف ہیں جبکہ مذکورہ علاقے کے ساکینین شب و روز یہی کہہ رہے ہیں کہ اب کہاں جائیں ہم یہ بتا اے زمیں اس علاقے کے عوامی نمائندگان کو ان کی لاپرواہی اور بے اعتنائی پر داد و تحیسن سے نوازئیے کہ یہی ان کے حق میں بہتر ثابت ہوگا اور ان کی عاقبت سنوارنے میں معاون و مدگار ہوگا کیونکہ یہی ان کے لئے انداز مسلمانی ہے.
تصویر میں کمشنر آفس کے باہر مرد و خواتین کو دھرنا دیتے ہوئے دیکھا جا سکتا ہے