(محمد یوسف رانا)
دنیا بھر میں کرونا وائرس کے مریضوں میں اضافہ ہورہا ہے۔ ہندوستان میں کروناس مثبت مریضوں کی تعداددس ہزار سے زائد تجاوز کرچکی ہے۔ اب تک ساڑھے تین سو کے قریب افراد کی اس وباء کے ذریعے موت ہو چکی ہے۔ ہندوستان میں اب تک کی رپورٹ کے مطابق کرونا وائرس کا انفیکشن مہاراشٹر میں زیادہ ہوا۔ مہاراشٹر میں ۱۳ ؍اپریل رات تک کرونا سے متاثر مریضوں کی تعداد ۲۳۳۴ ؍ بتائی گئی جب کہ اس وائرس کی وجہ مہاراشٹر میں ۱۶۰ سے زائد مریضوں کی موت ہوئی ہے۔ جس میں سے ممبئی کے ۱۰۱ لوگ ہیں۔
ممبئی میں اب تک 1540 کورونا وائرس سے متاثر افراد کا اندراج کیا گیا ہے۔ پیر کے روز مہاراشٹر میں مجموعی طور پر 352 نئے مریضوں کا اضافہ ہوا۔ ان میں سے 242 نئے مریضوں کا تعلق ممبئی سے ہے۔ اسی طرح پیر کے روز ریاست میں کرونا کی وجہ سے ۱۱ لوگوں کی موت ہوئی جن میں ۹ ؍ ادراد کا تعلق ممبئی سے ہے۔ اس طرح ملک میں کروناوائرس سے مرنے والا ہر دوسرا شخص مہاراشٹر سے ہے اور ہر تیسرا شخص ممبئی سے ہے۔ ایسے میں وزیر اعلیٰ ادھو ٹھاکرے کے سامنے ریاست میں بڑھتے کرونا کے اثر کو ختم کرنے چلینج در پیش ہے۔
ملک کی معاشی راجدھانی ممبئی تیزی سے کرونا وائرس کے انفیکشن کا مرکز بنتی جارہی ہے۔ کہا جاتا ہے کہ ممبئی چین کے ووہان شہر کی طرح کرونا انفیکشن کامرکز بن رہا ہے۔ ممبئی میں کرونا مریضوں کی تعداد بڑھ رہی ہے اور اموات کی تعداد سب سے زیادہ ہے۔ان سب حالات کو دیکھتے ہوئے مہاراشٹر حکومت کی مشکلات بڑھتی جارہی ہیں۔اس کی وجہ ہے ممبئی کی جھگی بستیوں میں کرونا کے اثرات دھیرے دھیرے بڑھتے جارہے ہیں۔ دھاراوی جسے ایشیاء کی سب سے بڑی کچی آبادی کے نام سے جانا جاتا ہےاس کے علاوہ بہرام پاڑہ اور باندرا ٹرمینل کے قریب کرلا کی جری مری کی کچی بستیوںمیں کرونا کے وائرس نے اپنی جگہ بنانے میں کامیابی حاصل کر لی ہے۔
یکم مارچ سے ممبئی میں جزوی طور پر لاک ڈاؤن شروع کیا گیا تھا اور 23 مارچ کو ہر جگہ لاک ڈاؤن ہوا تھا۔ لیکن حکومت کی طرف سے بار بار اپیل کرنے کے باوجود، لوگوں نے گھروں سے باہر نکلنا ترک نہیں کیا ۔ تب حکومت نے لوکل ٹرین کی آمدورفت کو مکمل طور پر روک دیا۔ ریاست میں جیسے جیسےجانچ کا دائرہ وسیع ہوتا گیا مریضوں کی جانچ شروع ہوتی گئیانتظامیہ کی آزمائشوں میں بھی اضافہ ہوتا گیا ۔اسی کے ساتھ ممبئی میں کرونا سے متاثر مریضوں کی تعداد میں بھی اضافہ ہوتا رہا ۔
مہاراشٹر حکومت اور بی ایم سی نے اپنی ساری توجہ اس بات پر مرکوز کی ہوئے ہے کہ ممبئی کی کچی آبادی میں کرونا کے نئے معاملات پر کس طرح سے روک لگائی جائے۔ ریاستی حکومت نے ممبئی میں چار کرونا کنٹرول زون قائم کیے ہیں اور ادھو ٹھاکرے نے لاک ڈاؤن کی مدت میں 30 اپریل تک توسیع کردی ہے۔ مگر اب وزیر اعظم نے لاک ڈاؤن کو 3 مئی تک لاگو رہنے کا اعلان کردیا ہے۔
مہاراشٹر میں میڈیکل ٹیم کلسٹر کنٹرول ایکشن پلان کے تحت کام کررہی ہیں۔ بی ایم سی کے اہلکار کنٹرول زون میں گھر گھر جاکر معائنہ کر رہے ہیں۔ کم رسک سے متعلق معلومات بھی فون پر جمع کی جا رہی ہیں۔ نگرانی کے کام کے لئے ممبئی میں پانچ ہزار سی سی ٹی وی کیمرے لگائے گئے ہیں۔ بی ایم سی نے 210 صحت مراکز بنائے ہیں۔ کارپوریشن کے ذریعہ 166 دواخانے جاری کئے گئے ہیں۔ ہر ایک کلومیٹر پر ایک صحت مرکز ہے۔ ہر کنٹرول ایریا میں کنٹرول افسر مقرر کیے گئے ہیں۔ میونسپل حکام اس علاقے میں ہر چیز پر نظر رکھے ہوئے ہیں۔ بی ایم سی میڈیکل کالج میں انٹرن ڈاکٹروں کو کرونا مریضوں کے علاج کے لئے بھی تربیت دی ہے تاکہ ضرورت پڑنے پر ان کا استعمال کیا جاسکے۔
ممبئی کے کستوربا، کے ای ایم، جے جے، جی ٹی اور سینٹ جارج کے اسپتالوں کے علاوہ، ریاستی حکومت نے وائرس سے متاثرہ افراد کے علاج کے لئے خصوصی اسپتالوں کا اعلان کیا ہے۔ یہ ممبئی سے باہر کے تمام سرکاری اسپتال ہیں جہاں کرونا سے متاثر مریضوں کا علاج کیا جاتا ہے۔ ممبئی کے اسپتالوں کے علاوہ ان اسپتالوں میں کل 2000 بستر ہیں۔ مرکزی اور ریاستی حکومت کی رہنمائی میں ان اسپتالوں ان مریضوں کا علاج کیا جارہا ہے۔
کورونا وائر س ممبئی جیسے میٹرو پولیٹین شہر کو پوری طرح سے جکڑنے کی کوشش میں لگا ہوا ہے ۔ اس کے باوجود لوگ سماجی دوری بنانے میں ابھی تک پوری طرح سے کامیاب نہیں ہو پارہے ہیں ۔ ممبئی میں ناگپاڑہ، نل بازار اور بوریولی سبزی منڈی یہ علاقے پوری طرح سے کرونا کے زیر اثر ہیں ۔ممبئی کی گھنی اور جھونپڑپٹی میں کرونا انفیکشن کے پھیلاؤ کو روکنا حکومت کے سامنے بڑا چیلنج ہے۔ جن کچی بستیوں سے کرونا سے مثبت مریض مل رہے ہیں ان علاقوں کے دیگر لوگوں کو کسی دوسری محفوظ جگہ پر منتقلی کر کے کچھ حد تک کرونا کے پھیلائو کو روک سکتی ہے۔ اگر حکومت سخت اقدامات نہیں کرتی ہے تو ممبئی میں ایک بڑا بحران پیدا ہوسکتا ہے۔