ملحقہ مدارس میں درجہ 1 سے 8 (تحتانیہ سے وسطانیہ) ایس سی ای آر ٹی کی کتابیں اور درجہ 9 سے 12 (فوقانیہ سے مولوی) این سی ای آر ٹی کی کتابوں کو اسلامی کتابوں کے ساتھ نافذ کرنے اور اساتذہ کرام کو چھٹی شرح تنخواہ اور نئے اساتذہ کرام کو پے اسکیل دیئے جانے اور مدرسہ بورڈ کو ڈیجیٹل کرنے، مدرسہ بورڈ میں سرور نصب کرنے، آن لائن داخلہ، آن لائن رجسٹریشن، آن لائن امتحان فارم، آن لائن ایڈمٹ کارڈ فراہم کرانے پر بہار اسٹیٹ مدرسہ ایجوکیشن بورڈ کو رول ماڈل ان انڈیا قرار دیا گیا ہے۔یہ بات بہار اسٹیٹ مدرسہ ایجوکیشن بورڈ کے چیرمین عبدالقیوم انصاری نے آج یہاں جاری ایک پریس ریلیز میں کہی ہے۔

انہوں نے کہا کہ مورخہ 09 ستمبر 2021 کو انڈیا ہیبٹیٹ سنٹر میں رینو کا کمار سکریٹری مائنوریٹی افیئر، حکومت ہند و انوپ کمار ریٹائرڈ آئی اے ایس، چائلڈ رائٹ کمیشن حکومت ہند کی صدارت میں اور 3 دسمبر 2021 کو منعقدہ میٹنگ میں بہار اسٹیٹ مدرسہ ایجوکیشن بورڈ میں کئے گئے بدلاؤ کے ساتھ ہی محترمہ رینوکا کمار سکریٹری مائنوریٹی افیئر حکومت ہند نے تمام صوبہ کے اقلیتی فلاح کے سکریٹری و محکمہ تعلیم کے سکریٹری کو یہ ہدایت جاری کی ہے کہ مدرسہ میں پڑھنے والے طلباو طالبات ہندوستان کے بچے ہیں، اور ان کو رائٹ ٹو ایجوکیشن ایکٹ و چائلڈ رائٹ کے تحت تمام سہولتیں جو اسکول کے طلباء و طالبات کو دیئے جا رہے ہیں دیئے جائیں گے۔ اس کی روشنی میں ملحقہ مدارس کے تمام صدر مدرسین، امداد یافتہ و غیر امداد یافتہ، محکمہ تعلیم کے ’سمگر شکچھا‘ و ضلعی اقلیتی فلاح افسر سے رابطہ کر کے یو ڈائس نمبر حاصل کریں، اور نمبر حاصل کرنے کے بعد ضلع افسر سے مدرسہ میں پڑھنے والے طلباء و طالبات کیلئے مڈ ڈے میل، سائیکل، پوشاک، اسٹائپن، حوصلہ افزدائی رقم فوقانیہ میں اول درجہ سے پاس کرنے والے طلباء و طالبات کو 10 ہزار، مولوی میں اول درجہ سے پاس طالبات کو 15 ہزار کیلئے درخواست دیکر بچوں کو تمام سہولتیں فراہم کرائیں۔ جو صدر مدرسین اس کے تحت بچوں کو سہولت فراہم نہیں کرائیں گے ان کے خلاف قانونی کاروائی کی جائے گی، ساتھ ہی ضلع سطح پر کسی افسر کے ذریعہ بچوں کو سہلوت فراہم کرانے میں عدم توجہی دکھائی جاتی ہے تو اس کی شکایت دفتر بہار اسٹیٹ مدرسہ ایجوکیشن بورڈ کو دیں۔ نتیش کمار وزیراعلیٰ بہار نے اسکول کے مساوی مدرسہ میں پڑھنے والے طلباء و طالبات و اساتذہ کرام کو تمام سہولت دینے کا فیصلہ کیا ہے۔ اس پر عمل در آمد کرانا صدر مدرسین و ضلعی افسران کی ذمہ داری ہے۔

ملحقہ مدارس کے اساتذہ و طلباء و طالبات کیلئے ڈریس کوڈ نافذ کیا گیا ہے۔ لازمی طور پر ڈریس کوڈ کو صدر مدرسین اپنے مدرسہ میں نافذ کریں، اور اس پر عمل در آمد کو یقینی بنائیں۔ جانچ کے دوران پکڑے جانے پر قانونی کاروائی کی جائے گی۔

نتیش کمار وزیراعلیٰ بہار نے مدرسوں میں مدرسہ استحکام منصوبہ نافذ کیا ہے۔ جس کے تحت سبھی مدرسوں میں کمروں کی تعمیر، بیت الخلاء اور پانی کا انتظام کرانا ہے، ساتھ ہی ٹیبل، بنچ مہیا کرانے کا فیصلہ کیا ہے۔ صدر مدرسین کو ہدایت دی جاتی ہے کہ ضلع اقلیتی فلاح افسر کے پاس اس سلسلے میں درخواست دیں، اور اس درخواست کے ساتھ مدرسہ کے زمین کے دستاویز کی عکسی کاپی، ایل پی سی منسلک کریں تاکہ مدرسوں میں کمروں کی تعمیر کرائی جا سکے۔

انہوں نے کہا کہ نتیش کمار وزیراعلیٰ بہار نے بے روزگار نوجوانوں کیلئے”سہائتا“ منصوبہ نافذ کیا ہے، جو طلباء و طالبات مولوی پاس کر کے اپنی تعلیم منقطہ کر لئے ہیں وہ اپنے ضلع میں ڈی آر سی سی افسر سے رابطہ کر کے اپنا رجسٹریشن کرائیں۔ ان طلباء و طالبات کو 1000 روپئے ماہانہ دیا جائے گا۔ مدرسہ کے جو طلباء و طالبات مولوی پاس کر چکے ہیں اور آگے تعلیم جاری رکھ سکیں ان طلباء و طالبات کو کریڈٹ کارڈ منصوبہ کے تحت 4 لاکھ روپئے فراہم کرانے کا انتظام کیاگیا ہے۔ طلباء و طالبات اس منصوبہ سے بھی فائدہ حاصل کریں۔