بھیونڈی: (نامہ نگار ) بھیونڈی میونسپل انتظامیہ کی جانب سے مانسون سے تقریبا ڈیڑھ ماہ قبل ہی نالا صفائی کا ٹھیکہ دے کر صفائی کا کام شروع کروایا جانا چاہئے تھا لیکن مانسون سے قبل نالے اور چھوٹی گٹروں کی صفائی پر توجہ نہیں دئے جانے کی وجہ سے ایک بار پھر بھیونڈی شہر پانی میں ڈوبنے کی کگار پر ہے جو باعث تشویش ہے۔ صرف یہی نہیں زیرزمین گٹر یوجنا دوسرے مرحلے کے تحت کئی سڑکوں پر پائپ لائن بچھانے کے لئے کھدائی کی گئی ہے جس کی وجہ سے سڑک کے دونوں جانب کی گٹریں پوری طرح سے مٹی سے بھری ہوئی ہیں۔ آئندہ کچھ دنوں میں مانسون کی آمد ہونے والی ہے جس کی وجہ سے گٹروں کا گندا پانی ایک بار پھر سڑکوں پر بہنے کے لئے تیار ہے۔ اس کے ساتھ ہی بڑے نالوں کی بھی مکمل طور پر صفائی نہ ہونے کی وجہ سے نالوں کا پانی چیمبر کے ڈھکن کے اوپر سے بہنے کے امکانات سے انکار نہیں کیا جاسکتا ہے۔

بھیونڈی میونسپل کارپوریشن نے پربھاگ سمیتی نمبر 5 میں بڑے نالوں کی صفائی کرنے کے لئے شبھم کنسٹرکشن کمپنی کو 23 ​​لاکھ 54 ہزار 587 روپے میں ٹھیکہ دیا ہے ، وہیں پر پربھاگ سمیتی نمبر 3 میں اسی کمپنی کو 21 لاکھ 4 ہزار 486 روپے میں نالا صفائی کے لئے ٹھیکہ دیا گیا ہے۔ واضح ہو کہ بھیونڈی میونسپل کارپوریشن کی حدود کے تحت نالوں کی کل لمبائی 42،685 میٹر ہے۔ بھیونڈی میونسپل کارپوریشن کی حدود کے تحت مجموعی طور پر چھوٹے بڑے ملا کر کل 92 نالے ہیں۔ جس میں میونسپل پربھاگ سمیتی نمبر 1 میں 17 نالا ، میونسپل پربھاگ سمیتی نمبر 2 میں 14 ، میونسپل پربھاگ سمیتی نمبر 3 میں 26 ، میونسپل پربھاگ سمیتی نمبر 4 میں 13 ، میونسپل پربھاگ سمیتی نمبر 5 میں 22 نالے شامل ہیں۔

عالمی وبائی بحران کا شکار بھیونڈی شہر کو اب بارش کے سیلاب کے قہر کی تباہی کا بھی سامنا کرنا ہے۔واضح ہو کہ لاک ڈاؤن کے دوران 90 فیصد مزدور شہر چھوڑ کر اپنے آبائی وطن چلے گئے ہیں جس کی وجہ سے نالا صفائی کروا رہے پربھاگ افسران اور ٹھیکیدار کو وقت پر مزدور نہیں ملنے سے صفائی کے کاموں میں رکاوٹ پیدا ہورہی ہے۔ میونسپل انتظامیہ مزدوروں کو روزانہ 606 روپے یومیہ مزدوری ادا کرکے نالوں کی صفائی کروا رہی ہے۔ اس میں بھی بڑی بدعنوانی ہونے سے انکار نہیں کیا جاسکتا ہے۔
میونسپل کمشنر ڈاکٹر پنکج آشیہ نے ٹھیکیداروں سمیت میونسپل افسران کو سخت انتباہ دیتے ہوئے کہا ہے کہ اگر نالوں اور گٹروں کی صفائی ٹھیک سے نہیں کی گئی تو متعلقہ افسران کے خلاف سخت کارروائی کی جائے گی۔ اس کے ساتھ ہی میونسپل کمشنر نے صفائی پر خصوصی توجہ دینے کے لئے پربھاگ افسران ، ہیلتھ انسپکٹر اور جونیئر انجینئروں کی ٹیم بھی تعینات کردی ہے۔

اس ضمن میں کارپوریٹر و سابق ہاوس لیڈر پرشانت لاڈ نے شدید ردعمل ظاہر کرتے ہوئے میونسپل انتظامیہ و اسٹینڈنگ کمیٹی پر نالا صفائی کام کے لئے غیر فعالیت کا الزام لگاتے ہوئے کہا کہ گزشتہ سالوں میں ہمیشہ مانسون کی آمد سے ڈیڑھ سے دو ماہ قبل ہی ٹینڈر نکال کر ٹھیکہ دیا جاتا تھا لیکن اس وقت ماہ جون میں یہ کام کیا گیا ہے۔اسی طرح میونسپل کارپوریشن اسٹینڈنگ کمیٹی بھی 23 جون کو جاگی اور جنرل میٹنگ کا انعقاد کر کے نالا صفائی کے متعلقہ عنوان پر سنجیدگی دکھائی جس پر حیرت ہو رہی ہے کہ اگر میونسپل انتظامیہ اس سے لا علم تھا تو اسٹینڈنگ کمیٹی کیوں خاموش تماشائی بنی ہوئی تھی۔جبکہ اسٹینڈنگ کمیٹی کو یہ اختیار حاصل ہے کہ 25 لاکھ روپے تک کا کام کرنے کے لئے مجاز رکھتی ہے اس کے باوجود 23 جون تک کس کے حکم کا انتظار کرتے رہے ۔واضح ہو جس طرح سے نالا صفائی کا کام شہر میں صل رہا ہے ایسا لگتا ہے کہ نالا تو کیا نالی کی بھی صفائی مکمل طور سے ہونا ممکن ہے۔اگر بارش میں شہر ڈوبا تو اس کا ذمہ دار میونسپل انتظامیہ ہوگی ۔مذکورہ قسم کا الزام کارپوریٹر و سابق ہاوس لیڈر پرشانت لاڈ نے عائد کیا ہے۔