ممبئی : پولس نے ۹ سال سے فرار مطلوب ملزم کو گرفتار کرنے کا دعویٰ کیا ہے جو قتل کے معاملہ میں مطلوب تھا اسے گوا اور کرناٹک میں تلاشی کے دوران گرفتار کیا گیا۔ ۲۰۱۷ کو ایک چائے فروش کے بھائی وسیع اللہ محسن کو فون کر کے اس کے شناسا نے بلایا اور پھر ایم آئی ڈی سی کی حدود میں ایک بھنگار کے گالے میں صاحب راؤ نے کہا کہ اس نے پولس کو خبر دی تھی جس کے بعد صاحب راؤ کے ہمراہ فیروز، صابر علی دیگر نے وسیع اللہ اور اس کے رشتہ دار کا محاصرہ کیا اور پھر وسیع اللہ لوکھنڈ پر پائپ سے حملہ کر دیا جس کے سبب اس کی موت واقع ہو گئی۔ پولس نے اس قتل کیس میں ۶ ملزمین کو پہلے ہی گرفتار کر لیا تھا۔ اس میں مطلوب ملزم مہتاب عالم عظمت اللہ مفرور ملزم تھا اور اسے بعد ازاں اشتہاری ملزم قرار دیا گیا تھا۔ اس کے بعد پولس کو مفرور ملزم سے متعلق اطلاع ملی کہ وہ اپنی شناخت چھپا کر کرناٹک میں اسکارپیو کا کام کرتا ہے۔ اسی بنیاد پر پولس نے اس کے رشتہ داروں اور اس کے سوشل میڈیا اکاؤنٹس سے اس کی تصدیق کی اور پھر اسے جال بچھا کر کرناٹک سے گرفتار کر لیا۔ یہ کارروائی ممبئی پولس کمشنر دیوین بھارتی کی ایما پر ڈی سی پی دتہ نلاوڑے ایم آئی ڈی سی کے سنئیر انسپکٹر گھنشیام نائر نے انجام دی ہے۔

ممبئی : مانخورد شیواجی نگر اسمبلی حلقہ میں بہت سے عوامی بیت الخلاء انتہائی خستہ حال (مرمت سے باہر) حالت میں ہیں۔ کئی مقامات پر مقامی شہریوں کو ان بیت الخلاء کی ضرورت نہیں ہے اور وہ غیر استعمال شدہ ہیں۔ مقامی ایم ایل اے ابو عاصم اعظمی نے مطالبہ کیا ہے کہ ایسے تمام غیر استعمال شدہ اور خستہ حال بیت الخلاء کو جلد از جلد بلڈوز کیا جائے اور اس زمین کو عوامی فلاحی کاموں کے لیے استعمال کیا جائے۔ ایم ایل اے اعظمی نے شہریوں کی سہولت کے لیے ان زمینوں پر ایک ‘جنرک میڈیکل شاپ’، صرف خواتین کے لیے ایک جدید ‘جم’ اور بچوں کے لیے ‘کنڈرگارٹن’ بنانے کا عزم ظاہر کیا ہے۔ اس سلسلے میں میونسپل کمشنر اور ‘ایم ایسٹ’ وارڈ کے انتظامی افسران سے خط و کتابت کی گئی ہے اور اس تجویز کو جلد از جلد منظور کرنے کا پرزور مطالبہ کیا گیا ہے۔ عوامی مقامات کو لوگوں کے براہ راست فائدے کے لیے استعمال کیا جانا چاہیے۔ غیر استعمال شدہ بیت الخلاء کو ہٹانے اور وہاں طبی اور سماجی سہولیات فراہم کرنے سے علاقے کی خواتین اور بچوں کو بہت فائدہ پہنچے گا۔ اگر انتظامیہ فوری اجازت دے تو ہم اصل کام شروع کر دیں گے۔

ممبئی ٹائیگر گروپ کے سر براہ اور آر پی آئی لیڈر سنجے کھنڈاکلے کی مشکلات میں اضافہ ہوگیا ہے. سنجے کھنڈاکلے کی حمایت میں مورچہ نکالنے والے مظاہرین کے خلاف بھی پولیس نے غیر قانونی طریقے سے مورچہ نکالنے, ٹریفک نظام میں خلل پیدا کرنے, سرکاری حکم کی حکم عدولی, حکم امتناعی کی خلاف ورزی سمیت بھارتیہ نیائے سنہتا بی این ایس کی دفعات 189(1),189(2),223,285,37,135 ممبئی پولیس ایکٹ کے تحت کیس درج کر لیا ہے اس میں پولیس نے مفرور ملزمین گوتم مورے, چھایا کھنڈاکلے, راجو سون کامبلے,جتیندر سونانونے, صدام ملانی, ریشماں خان, دلیپ کامبلے, گورکھ کامبلے, سجیت کامبلے سمیت 40 سے 50 افراد کے خلاف کیس درج کیا ہے۔ ملزمین پر الزام ہے کہ انہوں نے بلا اجازت مورچہ نکال کر نظم و نسق کا مسئلہ پیدا کیا اور ٹریفک میں خلل پیدا کی اسی لئے پولیس نے یہ معاملہ درج کیا ہے. سنجے کھنڈاکلے کی حمایت میں مورچہ نکال کر مظاہرین پولیس پر دباؤ ڈالنے کی کوشش کر رہے تھے, لیکن اس مورچہ کے بعد اب پولیس نے سنجے کھنڈاکلے کی تلاش میں شدت پیدا کر دی ہے, کیونکہ سنجے کھنڈاکلے پر زمین قبضہ کے معاملے میں ایف آئی آر درج کیا گیا ہے اور وہ اس معاملہ میں مطلوب ملزم ہے, ایسے میں مورچہ نکالنے کے بعد پولیس نے مفرور ملزم کی تلاش تیز کر دی ہے۔ یہ اطلاع ممبئی پولیس نے دی ہے,