اسپیشل اسٹوری : وفا ناہید
کورونا وائرس نے جہاں انسانوں کو موت کی وادی کی سیر کرائی ہے وہی اس نے رشتوں کی پہچان بھی کرادی. ‘ ماں ‘ ایک ایسا شیریں لفظ ہے جس کا احساس ماں بننے کے بعد ہوتا ہے. ماں کی عظمتوں کو اگر بیان کیا جائے تو شاید زندگی کم پڑجائے. جو اولاد بڑھاپے میں اپنی ماں کو آشرم میں چھوڑ آتی ہیں اگر تخلیق کے عمل کے ان 360 درد کو چھوڑ بچے کے پیدائش کے وقت دردزہ کی اس ایک چیخ کا احساس کرلے تو پھر کبھی کوئی بیٹا اپنی ماں کو بڑھاپے میں بے یار و مددگار نہیں چھوڑے گا. دراصل آج شوشل میڈیا کی فیمس سائٹس فیس بک پر 4 جون 12 بج کر 38 منٹ پر اپلوڈ کیا گیا ایک ایسا ویڈیو ہے جسے دیکھنے کے بعد شاید ہی کوئی پتھردل ہوگا جس کی آنکھیں نم نہ ہو. اس ویڈیو میں ممتا کی ماری ایک لاچار اور بےبس 70 سالہ بوڑھی ماں ہے جو باندرہ ریلوے اسٹیشن پر بیٹھی ہے. لاک ڈاؤن کی وجہ سے ٹرینیں بند ہیں. 70 سالہ لیلاوتی 3 بیٹوں اور 2 بیٹیوں کی ماں ہے. جو راجدھانی دہلی کی ساکنہ ہے. ایک بیٹا ممبئی نگری میں رہتا ہے. جہاں صرف زندگی دوڑتی بھاگتی ہے. کسی کو کسی کے لئے کوئی وقت نہیں ہے. بس ہر کوئی ایک ہی دھند میں جئے جارہا ہے کہ پیسے کمانا ہے. لیلاوتی کا ممبئی میں رہنے والا بیٹا بیمار ہوگیا. تب اس نے اپنی ماں کو ممبئی آنے کا کہا. دہلی والے بیٹے کی زبانی ممبئی والے بیٹے کی بیماری کی خبر سن کر بوڑھی ماں کی ممتا تڑپ اٹھی. 70 سال کی عمر میں لیلاوتی نے تنہا دہلی کا سفر کیا اور بیٹے کے پاس پہنچ گئی. بیٹے کی تیماداری کی. بیٹا ٹھیک ہوگیا. اب اسے اس بڑھیا کی ضرورت نہیں تھی. انسان کا مطلب نکل جاتا ہے تو اس کے اندر کا شیطان اسے ورغلاتا ہے اور وہ ہر اچھے برے کے فرق کو بھول جاتا ہے یہاں تک کہ خود کو جنم دینے والی اس ہستی کو بھی جو درد کے ایک سمندر کو عبور کرکے اسے دنیا میں لاتی ہے. سچ ہے انسان بہت مطلب پرست ہے. اب ممبئی والے بیٹے نے شراب کے نشے میں ماں کو مارنا شروع کیا. شیطان تو انسان کے قلوب کو زنگ آلود کردیتا ہے اور ام الخبائث اسے حیوان بنادیتی ہے. لیلاوتی کےمطابق ان کے بیٹے نے انہیں 4 بار مارا. اس کا ایک ہی مطالبہ تھا کہ اب دہلی لوٹ جائے. لیکن لاک ڈاؤن کی وجہ سےلیلاوتی دہلی واپس نہیں جاسکتی تھی . کیونکہ ٹرین بند تھی اور ان کے پاس کرائے کی رقم بھی نہیں تھی. جس کی وجہ سے بیٹا شراب پی کر ماں کو مارتا اور دہلی لوٹ جانے کو کہتا. اس کا کہنا تھا کچھ بھی ہو بس اس کے گھر سے چلی جا. کرایہ نہیں ہے تو بھیک مانگ لے مگر ممبئی میں اب نہیں رہنا. تب روز روز بیٹے کی مار کھا کر لیلاوتی پیدل گھر سے ریلوے اسٹیشن کی جانب چل پڑی. یہ جانے بغیر کہ نہ راستے کا علم اور نہ منزل کا پتہ. سفر کے توشے کے نام پر اپنا بوڑھا جسم. جو بیٹے کی ممتا میں دوڑا چلا آیا تھا. کسی طرح پوچھتے پوچھتے وہ باندرہ ریلوے اسٹیشن پہنچی. پیدل چلنے سے پیاس لگ رہی تھی . صبح کی بھوکی پیاسی گھر سے نکلی تھی کہ اب اور بیٹے کی مار نہیں کھانی ہے. ریلوے اسٹیشن پر کسی نے انہیں پیاس لگنے کی وجہ سے ایک بوتل , تھوڑے سے دال چاول اور ایک بسکٹ کا پیکٹ تھمادیا . پیاس سے حلق سوکھ رہا تھا تو لیلاوتی نے پیٹ بھر کر پانی پیا اور تھوڑے سے دال چاول کھائے اور تھوڑے بچادیئے کہ بعد میں کام آئے گے. اب چاہے جیسے بھی ہو دہلی لوٹنا ہے. جب کہ دہلی والا بیٹا بھی ماں کو رکھنے کو تیار نہیں ہے. دوسرے بچے بھی ماں کو پاگل کہتے ہیں. اب ایسے میں دہلی واپس جانا ہے . لیلاوتی کا کہنا ہے بس دہلی پہنچ جاؤں. پھر وہاں جاکر بھیک مانگ کر گزارہ کرلوں گی . 87 سال کی طویل عمر گزار کر ان کا پتی اس دنیا سے رخصت ہوچکا ہے. بار بار روتے ہوئے وہ اپنے پتی کو یاد کرتی ہے کہ میرا آدمی نہیں ہے اس لئے سب مجھ سے منہ موڑ گئے. اسی لئے کہا جاتا ہے کہ شوہر شوہر ہوتا ہے وہ کتنی بھی زیادتی کرلے مگر بڑھاہے میں بیوی کا سہارا ہوتا ہے. بڑھاپا جو کہ کسی معصوم بچے سے کم نہیں ہوتا. تب میاں بیوی ایک دوسرے کا سہارا ہوتے ہیں. لیلاوتی کی درد بھری کہانی سن کر آنکھوں سے اشکوں کا سیلاب جاری ہوگیا. کہ اس لاک ڈاؤن نے جہاں مزدوروں اور تارکین وطن کو رلایا. کتنے مزدور ہلاک ہوئے مگر ایک ماں اپنی پیاسی ممتا کو لے کر ممبئی میں دربھٹکنے پر مجبور ہے- اس لاک ڈاؤن کا سب سے بڑا المیہ سگے بیٹے کا ماں کی ممتا کو رسوا کرنا ہے . جانے آگے یہ لاک ڈاؤن اور کیا کچھ دکھانے والا ہے.