اتوار کی رات جواہر لال یونیورسٹی دہلی میں اتوار کی رات طلبا و اساتذہ پر نقاب پوش افراد کی جانب سے کئےگئے حملے کے خلاف آج ریاستی راجدھانی لکھنؤ میں کانگریس ، سماج وادی پارٹی اور عام آدمی پارٹی کی طلبا تنظیموں نے احتجاج کر کے حملے کی مذمت کی۔احتجاج کے دوران کچھ طلبہ نے وزیر داخلہ امت شاہ کا پتلہ بھی نذر آتش کیا۔
کانگریس کی طلبہ تنظیم این ایس یو آئی نے پیر کی دوپہر حضرت گنج واقع گاندھی پرتما پر احتجاجی مظاہرہ کیا۔ تو سماج وادی پارٹی کی طلبہ تنظم اور عام آدمی کے طلبہ ونگ نے بھی اس معاملے میں مرکزی حکومت کو گھیرتے ہوئے احتجاج کیا۔طلبا نے جے این یو معاملے کی جلد از جلد غیرجانبدارانہ جانچ کرانے کا مطالبہ کرتے ہوئے الزام عائد کیا کہ اے بی وی پی اور دہلی پولیس میں ساز باز چل رہی ہے۔
احتجاج کرنے والے طلبہ کے مطابق دہلی پولیس کی سرپرستی میں ہی اے بی وی پی کے افراد نے بے خوف ہوکر یونیورسٹی کیمپس میں طلبہ و اساتذہ کے ساتھ بربریت کا مظاہرہ کیا ہے۔احتجاج کے دوران عام آدمی پارٹی کے طلبہ ونگ کی جانب سے وزیر داخلہ امت شاہ کا پتلا نذرآتش کیا جس کے بعد پولیس نے کچھ طلبا کو گرفتار بھی کیا۔
اترپردیش میں اتوار کی رات جے این یو کیمپس میں پیش آئے پرتشدد واقعہ کے بعد ہائی الرٹ جاری کیا گیا ہے۔سینئر پولیس افسران نے اضلاع کے پولیس سربراہوں کو الرٹ رہنے کی ہدایات جاری کرنے کے ساتھ تعلیمی اداروں کے کیمپسز میں طلبہ کی جانب سے ہونے والی ہر سرگرمی پرگہری نظر رکھنے کو کہا گیا ہے۔قابل ذکرہے کہ اترپردیش میں علی گڑھ مسلم یونیورسٹی کے علاوہ دیگر تعلیمی ادارے پیر سے کھل رہے تھے۔
علی گڑھ کے سینئر سپرنٹنڈنٹ آف پولیس آکاش کہاری نے کہا کہ احتیاطی قدم کے طور پر اے ایم یو کیمپس کے تمام حساس مقامات پر پولیس کو تعینات کیا گیا۔وہیں علی گڑھ مسلم یونیورسٹی میں حالات کے جائزے کے بعد سرمائی تعطیل میں مزید اضافہ کردیا گیا ہے لیکن ابھی اس بات کااعلان نہیں کیا گیا ہے کہ یونیورسٹی دوبارہ کب کھلے گی۔ پہلے کے اعلان کے مطابق آج سے اے ایم یو کو کھلنا تھا۔
لکھنؤ کے سبھی کالجز کی سیکورٹی میں اضافہ کردیا گیا ہے۔لکھنؤ یونیورسٹی،دارالعلوم ندوۃالعلماء اور بی بی اے یو کے گیٹ پر کثیر تعداد میں سیکورٹی اہلکار کو تعینات کیا گیا ہے۔یونیورسٹی گیٹ سے لے ہاسٹل کے آس پاس بھی بھاری تعداد میں پی اے سی اور یو پی پولیس کے دستے کو تعینات کیا گیا ہے۔
ملحوظ رہے کہ اتوار کی رات متعدد نقاب پوش غنڈہ نما افراد بشمول مرد وخواتین نے جے این یو کیمپس میں گھس کر طلبہ و اساتذہ کو لاٹھی ڈنڈوں سے بری طرح سے زدوکوب کیا تھا جن میں متعدد طلبہ و ٹیچر زخمی ہوگئے تھے۔تاہم زخمیوں کے حقیقی تعداد کا ابھی تک اندازہ نہیں ہوسکا۔ اندازے کے مطابق تقریبا 30 طلباوطالبات اور ٹیچر زخمی ہوئے تھے جنہیں دہلی کے ایمس میں علاج کے لئے داخل کرایا گیاتھا۔
جے این یو میں طلبہ و اساتذہ پر ہوئے حملے کے خلاف پوری طلبہ برادری میں اشتعال ہے اور آج جگہ جگہ اس حملے کے خلاف احتجاجی مظاہرے ہورہے ہیں۔