دھولیہ(اسٹاف رپورٹر) شریعت مخالف قانون بنے پر ملک میں ہر جگہ احتجاج کیا گیا ،چوٹی کے علمائے کرام نے اس ضمن میں کہہ دیا تھا کہ طلاق ثلاثہ کی نوبت ہی پیش نہ آنے دیں، ہمارا مسئلہ ہم خود ہی حل کرنے کی کوشش کریں۔علماء کی بات سن کرکورٹ کی دہلیز نہ چڑھ کر شرعی عدالت میں اگر طلاق ثلاثہ کا مسئلہ جاتا ہےتو شہر قاضی کے پاس پہنچنے سے قبل مسئلہ لے کر جانے والے مرد اور خواتین میں شرعی مسئلہ اور ملک کے قانون کا علم ہونا ضروری ہے۔شکایت کنندہ کی کم عملی کی وجہ سے شہر قاضی کو اپنا کام چھوڑ کر پولس اسٹیشن اور کورٹ کی دہلیز پر وقت گزارنا پڑ سکتا ہے۔ شہر دھولیہ میں ایک گھر کا آپسی تنازع طول پکڑا تو معاملہ شرعی عدالت میں پہنچا ۔ازدواجی زندگی میں کڑواہٹ پیدا ہوتی ہے تو دوریاں بڑھنا فطری عمل ہوتا ہے۔شہر دھولیہ کے چالیس گاؤں روڈ پولس اسٹیشن میں پولس سب انسپکٹر کے پاس سماجی خدمتگار ،شہر قاضی ،ایڈوکیٹ اور وکیل کی موجودگی میں طلاق اور خلع کے مسئلہ پر دیر تک زبانی بحث و تکرار چلنے کے بعد فیصلہ کچھ نہیں نکل سکا ۔شہر قاضی نے یکم اپریل ۲۰۱۹؁ کی تاریخ میں خلع نامہ کے کاغذات کو پیش کرکے اپنی ذمہ داری نبھانے کی صفائی پیش کی ، لیکن متاثرہ لڑکی نے اپنی ازدواجی زندگی میں ظلم و زیادتی کی بات کرکے معاملہ کے رخ کو موڑنا چاہا ۔ اصل مسئلہ خلع اور طلاق کا تھا ،شہر قاضی کے مطابق لڑکی کے اصرار کرنے پر خلع نامہ لکھ کر دیا گیا مزید ایک نوٹری لکھوا کر لڑکا اور لڑکی کی دستخط لے کر دونوں کو علٰحیدہ رہنے کی اجازت دے دی گئی۔لڑکی دنیاوی اعتبار سے تعلیم یافتہ ہیں اور تدریسی شعبہ سے جڑی ہوئی تھی لیکن شادی کے بعد مجبوری میں ملازمت چھوڑنا پڑی ،لڑکی کے مطابق خلع کا مسئلہ سسرال والوں کو صرف ڈرانے دھمکانے کے لیے تھا ۔ ازدواجی زندگی جیسی بھی تھی وہ ساتھ رہنے کے لیے تیار تھی ، لڑکی نے کہا کہ لڑکے نے طلاق کی نوٹری پر دستخط کرکے ظلم کیا ہے،جبکہ لڑکی کی دستخط بھی موجود تھی ۔ جب لڑکی سے سوال کیا گیاکہ تعلیم یافتہ ہونے کے باوجود تم جھوٹ کیوں بول رہی ہو ؟ دستخط کرنے سے پہلے پڑھ کر دستخط کرنا تھی تو لڑکی نے کہا کہ بینک کا فارم بھرتے ہوئے ہم فارم پورا نہیں پڑتے ہیں اور دستخط کرتے ہیں تو اتنے بڑے شہر قاضی کے کاغذات پر ہمیں بھروسہ نہیں ؟ ہم نے پڑھا نہیں اور دستخط کردی ،ہمیں لگا کہ ہمارا ازدواجی مسئلہ حل ہونے کے لیے دستخط لی گئی۔ لڑکی کی ماں کے مطابق شوہر لڑکی کو رکھنا ہی نہیں چاہتا تھا اس لیے اس نے پورا کھیل رچ کر طلاق دی ہے۔ پولس سب انسپکٹر بھی فریقین کی بات سن کر معاملہ کو سمجھنے سے قاصر رہے کیونکہ ۵؍ افراد کی بات سن کر شکایت کے متعلق فیصلہ کرنا مشکل ترین عمل ہوگیا تھا۔ لڑکی طلاق کے مسئلہ کی شکایت کا اندراج کروانی چاہتی تھی جبکہ سب انسپکٹر نے شکایت کا اندراج کرنے سے انکار کردیا ہے اور ایس پی آفس میں موجود خواتین پولس محکمہ میں شکایت درج کرنے کی بات کی۔ جب لڑکی سے اس کی منشاء پوچھی گئی تو اس نے کہا کہ میں اپنے شوہر کے ساتھ ہی رہتی تھی اور مستقبل میں بھی ان کے ساتھ رہنا چاہوں گی ورنہ قانونی لڑائی لڑ کر میرا حق حاصل کروں گی۔معاملہ گھنٹوں تک چلتا رہا لیکن حل کچھ نکل نہیں سکا۔ ایسے معاملہ میں لڑکی کا پولس اسٹیشن تک جانا اور وہاں شہر قاضی کو آکر صفائی پیش کرنے کے لیے گھنٹوں اپنا قیمتی وقت ضائع کرنے سے بہتر ہے کہ شہرمیں عالمہ فاضلہ اور طلاق ثلاثہ کا قانون جاننے والی خواتین کی تعداد کم نہیں ہے، شہری سطحی کمیٹی بناکر خواتین میں بیداری مہم کی اشد ضرورت ہے اسی طرح مرد حضرات میں بھی ازدواجی زندگی کی اہمیت کے معاملہ میں دیندار اور تعلیم یافتہ افراد کی مشترکہ کمیٹی بناکر ازدواجی زندگی کے معاملوں کو حل کرنا چاہیے ۔ ورنہ علم نہ ہونے کی صورت میں معاملہ مزید پیچیدہ ہوتا جائے گا ۔ معاملہ پیچیدہ ہوکر کورٹ پہنچا تو فریقین کے ساتھ شہر قاضی ،سماجی خدمتگاروں کا وقت بھی ضائع ہوسکتا ہے، جب وقت کورٹ میں ضائع ہونے کی نوبت پیش آسکتی ہے اصلاحی کاموں میں وقت لگا کر وقت کو قیمتی بنانا چاہیے۔