ممبئی : داعش اور اسٹوڈنٹس اسلامک موومنٹ آف انڈیا (سیمی) کے سابق رکن ثاقب ناچن کے سمیت اس کے۲۲معتمد خاص ارکان و رشتہ داروں کے گھروں مہاراشٹر انسداد دہشت گردی دستہ اے ٹی ایس نے چھاپہ مار کارروائی کرتے ہوئے کئی اہم دستاویزات اور اسباب ضبط کرنے کا دعوی کیا ہے۔ اے ٹی ایس کو اطلاع ملی تھی کہ ثاقب ناچن اور اس کے معتمد خاص کے گھروں پر اہم دستاویزات اور دیگر اسباب چھپائے گئے ہیں, جس کے بعد اے ٹی ایس کارروائی کو انجام دیتے ہوئے گزشتہ شب ۲ بجے چھاپہ مار کارروائی شروع کی اور یہ کارروائی صبح ۴ بجے تک جاری رہی, جس کے بعد اے ٹی ایس کی ٹیم ممبئی روانہ ہوگئی۔ اس آپریشن کے دوران اے ٹی ایس کی ٹیم نے پورے علاقہ کا محاصرہ بھی کیا تھا۔

بوریولی پڑگھا میں اے ٹی ایس نے عابد اشرف ملا، معاذ ملا، عاقب ثاقب ناچن، عبدالطیف شاداب کاسکر، ارمیش عرفان ملا، ہاشم ندوی، فاروق ملا، نبیل ملک کھوت، قیص عارف کھوت، کیف ناچن، ساحل منیار، عدنان ملا، شیرو دیوکر، شرجیل ناچن، ساجد ناچن، ذیشان ملا، عاطف ملا، شمس کھوت اسجد ملا، رائف کھوت، عابد کھوت چھاپہ مار کارروائی کو انجام دیا ہے اس دوران کچھ سفر حج پر گئے تھے۔ اس لئے وہ گھر پر موجود نہیں تھے, اس معاملہ میں اے ٹی ایس نے کارروائی کو انجام دیا اور گھروں کی تلاشی کے دوران کسی کو بھی گرفتار نہیں کیا ہے۔ زبیر ملا چھوٹی مسجد کے ساکن جو زمین کی دلالی کرتا ہے, حج کے سفر پر تھا زبیر ملا ۲۰۰۲ اور ۲۰۰۳ بم دھماکوں میں مجرم قرار دیا گیا اور اسے سزا بھی ہوئی ہے, اب وہ دلی میں داعش کے کنکشن کے معاملہ میں ثاقب ناچن کے ساتھ دلی جیل میں مقید ہے۔ عبدالطیف کاسکر گوڈام میں زیر ملازمت ہے یہ بھی دلی داعش کیس میں فرحان سوسے کا دوست ہے۔ شمس کھوت، رئیس کھوت، عابد اشرف ملا، معاذ اشرف ملا، قیص آصف کھوت تلاشی کے دوران گھر پر موجود نہیں تھے, جبکہ ساحل منیار کے کلیان کے گھر پر چھاپہ مار کارروائی کی گئی وہ بھی یہاں موجودنہیں تھا۔

اے ٹی ایس نے ثاقب ناچن کو ۲۰۱۷ سے ہی دوبارہ دہشت گردانہ سرگرمیوں میں سرگرم پایا تھا۔ اس دوران اے ٹی ایس نے اس پر نظر رکھی تھی اور اس پر کیس بھی درج کیا گیا تھا, لیکن اس معاملہ میں داعش کے کیس میں این آئی اے نے ثاقب ناچن کو گرفتار کر لیا تھا پہلے اس کے فرزند عاقب ناچن کو گرفتار کیا گیا تھا اور پھر ثاقب کی بھی گرفتاری عمل میں لائی گی اے ٹی ایس نے کارروائی کے دوران کئی اہم دستاویزات ضبط کرنے کا بھی دعوی کیا ہے, جس کی تفتیش کی جائے گی اور پھر اسی مناسبت سے کارروائی میں پیش رفت ہوگی ۔ مہاراشٹر اے ٹی ایس نے ممبئی تھانہ بھیونڈی کلیان سمیت ۱۵ مقامات پر چھاپہ مار کارروائی کی ہے, اور اسی دوران داعش کے مشتبہ ارکان کے خلاف بھی کارروائی کی گئی ہے اس کارروائی میں اے ٹی ایس کو کافی اہم دستاویزات اور ثبوت ملنے کی امید ہے ۔ اے ٹی ایس نے اس معاملہ میں جو کارروائی کی ہے ان پر ملک مخالف اور غیر قانونی سرگرمیوں میں ملوث ہونے کا الزام ہے۔ اے ٹی ایس اس معاملہ میں مزید کارروائی کر رہی ہے, جبکہ اب تک کسی کی تلاشی کے بعد گرفتاری عمل میں نہیں لائی گئی ہے۔

مہاراشٹر : ممبئی سماجوادی پارٹی لیڈر ابوعاصم اعظمی نے یہاں ممبئی کے مراٹھی پترکار سنگھ میں فیڈریشن آف مسجد کی پریس کانفرنس سے خطاب کرتے ہوئے کہا کہ ملک دستور اور سنودھان پر چلے گا۔ بمبئی ہائیکورٹ کا فیصلہ تمام مذہبی مقامات اور صوتی آلودگی کے اصولوں کی خلاف وزری پر ہے, لیکن اس کی آڑ میں بی جے پی لیڈر کریٹ سومیا صرف مسلمانوں کو ہی نشانہ بنانے کے ساتھ مسجدوں سے لاؤڈ اسپیکر اتارنے کا دعوی کر رہے ہیں۔ وہ پولیس پر مسلسل دباؤ بنا رہے ہیں, اس لئے دو فرقوں میں نفرت پیدا کرنے اور ماحول خراب کرنے و مذہبی منافرت پھیلانے کے الزام میں اس پر مقدمہ درج کرنے کا مطالبہ کیا گیا ہے, بصورت دیگر مقدمہ درج کرنے کیلئے کورٹ سے بھی رجوع کیا جائے گا, تاکہ جلد ازجلد اس پر مقدمہ درج ہو۔ ابوعاصم اعظمی نے کہا کہ مقامی لوگوں ہندوؤں کو اذان اور مسجدوں کے لاؤڈاسپیکر پرکوئی اعتراض نہیں ہے, لیکن کچھ شرپسند عناصر کی شکایت پر کارروائی کی جارہی ہے, صرف ووٹ بینک کے لئے ماحول خراب کیا جارہا ہے۔ مسجدوں کے لاؤڈاسپیکر کو اتارنے پر نظم و نسق کا خطرہ لاحق ہے۔ اس لئے پولس کو بھی اس پر توجہ دینا چاہئے, کیونکہ ممبئی میں بھی ہندو اور مسلمانوں میں تفریق پیدا کرنے اور مذہبی منافرت پھیلانے کی سازش کی جارہی ہے۔ انہوں نے کہا کہ مہاراشٹر میں کس طرح سے مذہبی منافرت پھیلائی جارہی ہے اور فرقہ پرستی عروج پر ہے, اس کی مثال کوکن میں ایک طالب علم نے پاکستان زندہ باد کا نعرہ بلند نہیں لیکن اس کا گھر زمین بوس کر دیا گیا۔ اگر کوئی چھترپتی مہاراج کی توہین کرتا ہے تو جیمس لینن کو امریکہ سے لانے کی بات آر آر پاٹل نے کی تھی, انہوں نے کہا کہ مسجدوں سے لاؤڈاسپیکر اتارنا غیر قانونی ہے ایک قوم کو نشانہ بنایا جارہا ہے۔ بھجن کرتن یوپی میں پوری رات بھر جاری رہتا ہے اس پر کارروائی کیوں نہیں کی جاتی ہے, بی جے پی لیڈر کریٹ سومیا کے دباؤ میں مسجد کے لاؤڈاسپیکر اتارنے پر پولس مجبور ہے۔ کریٹ سومیا پر کیس درج کیا جائے, کیونکہ وہ فرقہ پرستی کو فروغ دے کر ماحول خراب کرنے کی کوشش کر رہے ہیں۔ پولس کمشنر سے مطالبہ ہے کہ وہ مسجدوں کا لاؤڈاسپیکر اتارنے کی اجازت نہ دے کیونکہ وہ قانونی دائرے میں لاؤڈاسپیکر کا استعمال کرتے ہیں۔

ایڈوکیٹ خالد نے بتایا کہ مسجدوں کے لاؤڈاسپیکر پرکارروائی جاری ہے۔ بمبئی ہائیکورٹ نے ایک فیصلہ دیا تھا جس میں گائڈ لائن جاری کی گئی تھی۔ ایک نئی پٹیشن ہائیکورٹ میں داخل کی گئی اس میں جاگو نہرو نگر پٹیشن داخل کی تھی اس میں عدالت نے حوالہ دیا ہے کہ ۲۰۱۶ میں جو فیصلہ صادر کیا گیا اس میں گائڈ لائن طے کی گئی تھی۔ اس میں تمام چیزوں کی نشاندہی کی گئی ہے, صوتی آلودگی سے متعلق جو بھی فیصلہ صادر کیا گیا ہے۔ ہائیکورٹ نے اپنے حکم میں کہا ہے کہ مذہبی تقریبات میں تمام صوتی آلودگی پر پابندی عائد کی گئی ہے۔ یہ فیصلہ کسی ایک مذہب کے لئے نافذ نہیں کیا گیا یہ فیصلہ میں کورٹ نے عارضی حکم پر نظرثانی کی۔ کورٹ نے جو مشاہدہ کیا ہے لاؤڈاسپیکر کا استعمال سے قبل اسکی اجازت ضروری ہے, اس میں ڈسیبل بھی طے کئے گئے ہیں۔ مسجد نے لاؤڈ اسپیکر کی اجازت طلب کی تو ان کو اجازت ملی ہے, دونوں فیصلہ میں لاؤڈاسپیکر کی ساخت طے نہیں کی گئی ہے۔ باکس ٹائپ کی اجازت دی جارہی ہے, جو ہائیکورٹ کے فیصلہ میں اس کی شمولیت نہیں ہے, اگر مسجد پر تنصیب اسپیکرصوتی آلودگی کی خلاف وزری کرتے ہیں, تو اس پر کارروائی ہو گی, پہلی شکایت پر تنبیہ کرنا چاہیے۔ دوسری مرتبہ نوٹس اور تیسری مرتبہ جرمانہ اور کارروائی کا حق حاصل ہے۔صوتی آلودگی سے متعلق بیداری مہم چلانا بھی ضروری ہے۔ کسی ایک مذہب کو نشانہ نہیں بنایا گیا ہے یہ تمام مذہب پر نافذ العمل ہے۔

ایڈوکیٹ یوسف ابراہانی نے بتایا کہ کریٹ سومیا کی اشتعال انگیزی کے سبب ماحول خراب کرنے کی سازش شروع ہے۔ پولس اب ہر مسجد میں جا کر مسجدوں کے خطیب و امام اور ٹرسٹیوں کو ہراساں کرتی ہے۔ تمام مذہب کے لئے قانون یکساں اور مساوی ہے, لیکن قانون کا استعمال صرف مسلمانوں پر ہی کیوں کیا جارہا ہے, اس معاملہ میں جلد ہی کورٹ سے رجوع کیا جاتا ہے۔ بئیر بار کا لائسنس ۱۲ بجے تک ہے لیکن شب بھر بار جاری رہتا ہے, اس پر پولس کارروائی نہیں کرتا, بلکہ یہاں سے ہفتہ ملتا ہے, اس لئے پولس خاموش ہے اور صرف مسجدوں پر کارروائی کرتی ہے۔

ممبئی : عیدالاضحی کے پیش نظر تھانہ پولیس نے فرقہ پرستوں پر نظر رکھنے کے ساتھ ماحول خراب کرنے والوں پر کارروائی بھی شروع کر دی ہے۔ اس کے علاوہ سوشل میڈیا پر افواہ پھیلانے والوں پر بھی کارروائی کا انتباہ دیا ہے۔ یہ دعوی تھانہ پولیس کمشنر اشوتوش ڈومبرے نے کیا ہے۔ انہوں نے کہا کہ مہاراشٹر میں گؤ کشی پر مکمل پابندی ہے, اس پر عمل آوری لازمی ہے, اگر کوئی اس کی تابعداری نہیں کرتا ہے تو اس پر سخت کارروائی ہوگی۔ اس کے علاوہ شہر میں نظم ونسق کی برقراری کیلئے پولیس نے گشت میں اضافہ کر دیا ہے, اور عید الاضحی سمیت تیواسی عید تک بندوبست و اضافی دستوں کی تعیناتی کی گئی ہے۔

پولیس کمشنر اشوتوش ڈومبرے نے کہا کہ تھانہ، کلیان، الہاس نگر، رابوڑی، بھیونڈی، ممبرا سمیت مسلم اکثریتی علاقوں اور حساس ترین علاقوں کی خصوصی نگرانی کے احکامات جاری کئے گئے ہیں۔ عید قرباں پر میونسپل کارپوریشن کی گائڈ لائن سمیت پولیس کی ہدایت پر عمل کرنا لازمی ہے۔ اس کو یقینی بنانے کیلئے پولیس نے قریشی برادری سمیت عمائدین شہر اور علماء کرام کی میٹنگ بھی منعقد کی تھی جس میں قریشی برادری نے یقین دلایا ہے کہ وہ ممنوعہ مویشی کی قربانی سے گریز کریں گے۔

تھانہ میں عید قرباں سے قبل فارم ہاؤس میں بکروں کی آمد اور یہاں سے بکروں کی خریداری کے دوران کسی بھی قسم کی دشواری نہ ہو اس لئے پولیس نے گشت میں اضافہ کر دیا ہے۔ اتنا ہی نہیں جانوروں کے بیوپاریوں کی ہراسائی نہ ہو اس کیلئے ضروری احکامات بھی جاری کئے گئے ہیں۔ بکروں اور قربانی کی جانوروں کی ائیر ٹیگنگ لازمی ہے, اس بات کا خیال بھی رکھنا ضروری ہے۔ اس میں جانوروں کی میڈیکل جانچ کے بعد ہی ائیر ٹیگنگ کی جاتی ہے۔ تھانہ پولیس کمشنر نے کہا کہ اسلام امن کا مذہب ہے اور ایسے میں فرقہ وارانہ ہم آہنگی کا قیام بھی ضروری ہے, اس لئے پولیس نے ضروری اقدامات کئے ہیں۔ پولیس کمشنریٹ میں عید الاضحی کے پیش نظر الرٹ جاری کیا گیا ہے, عید الاضحی کے دوران عید گاہ اور مسجدوں پر بھی خصوصی بندوبست ہوگا, اور ساتھ ہی قربانی کے عمل کے دوران مسلمانوں کو چاہئے کہ وہ سنت ابراہیمی کی ادائیگی کے دوران خون آلود کپڑوں اور خون آلود چھری چاقو کی نمائش نہ کرے, ساتھ ہی گوشت کو تھیلی یا برتن میں ڈھانپ پر اس کی نقل و حمل کرے۔ انہوں نے کہا کہ مہاراشٹر میں گؤ کشی پر مکمل پابندی ہے, اس لئے گؤ کشی سے متعلق پولیس کو ضروری ہدایت دی گئی ہے, اگر کوئی اس کی خلاف ورزی کرتا ہے تو اس پر سخت کارروائی ہوگی۔ انہوں نے کہا کہ پاکی نصف ایمان ہے اس لئے قربانی کے دوران فضلا اور دیگر چیزیں تھیلیوں میں پیک کر کے کوڑا دان میں ڈالے اور قربانی کے رہنمایانہ اصولوں اور اسلامی طریقہ پر عمل پیرا ہو۔ انہوں نے کہا کہ قربانی کے عمل کی تصاویر اور منظر کشی نہ کی جائے, کیونکہ اکثر لوگ اس تصاویر اور ویڈیو کو سوشل میڈیا پر اپ لوڈ کرتے ہیں, اس سے دوسروں کے مذہبی جذبات مجروح ہوتے ہیں اور اس سے مذہبی منافرت پھیلنے کا بھی خطرہ لاحق ہے, اس سے اجتناب کرنے کی تلقین پولیس کمشنر نے مسلمانوں سے کی ہے۔